Read sango Tongo nda ti aye 8 Bible Online

Tongo nda ti aye 8 - sango bible

Tongo nda ti aye 8

¹Nzapa adabe ti lo na Noe, na anyama kue ti ngonda, na ala ti kodro so kue ayeke na tere ti lo na ya ti mangboko ni. Nzapa asara si mbeni pupu alondo, aya na ndö ti sese si ngu ni ato nda ti kiri.

²Lege ti angu ti gbe ti sese so ali mingi so akanga; fenetere ti yayu nga akanga. Ngu-Nzapa akai ti pikango ni.

³Ngu ni akiri yeke-yeke si azia sese ni. Na lango ngbangbo oko na baleoku ni si ngu ni ato nda ti kiri.

⁴Na lango baleoko na mbarambara ti nze mbarambara ni, mangboko ni ague, aduti na ndö ti hoto ti Arara.

⁵Ngu ni angba ti kiri na gbeni ngbii asi na nze baleoko ni. Na kozo lango ti nze baleoko ni, ali ti ahoto asigigi.

⁶Na peko ti lango baleosio, Noe azi fenetere so lo leke na tere ti mangboko ni.

⁷Lo mu *kpakpo, lo bi lo na gigi. Kpakpo ni ague, aga, ague, aga, ngbii ngu ni ahole na ndö ti sese ni.

⁸Na pekoni, lo mu *mbipa, lo bi lo na gigi titene lo gue, lo baa wala na ndö ti sese, ngu ni akiri na gbeni awe.

⁹Me mbipa ni ague, awara mbeni ndo ti luti daa pepe. Lo kiri na tere ti Noe na ya ti mangboko ni, ngbanga ti so ngu ni amu ndö ti sese kue. Noe ayoro maboko ti lo, lo mu mbipa ni si lo kiri na lo na ya ti mangboko ni.

¹⁰Lo kiri lo ku lango mbarambara, lo mu mbipa ni si lo bi lo na gigi.

¹¹Na lakui, mbipa ni akiri na Noe. Mbeni kete fini maboko ti keke ti olive ayeke na yanga ti lo. Noe ahinga atene, na ndö ti sese, ngu ni akiri na gbeni awe.

¹²Lo kiri lo ku lango mbarambara, lo mu mbipa ni si lo bi lo na gigi. Mbipa ni ahon si lo kiri na tere ti Noe mbeni pepe.

¹³Na kozo lango ti kozo nze so Noe awara ngu ngbangbo omene na oko, ngu ni ahole na ndö ti sese awe. Noe azi li ti mangboko ni; lo baa ndo na gigi si lo baa so ndö ti sese ahole awe.

¹⁴Na lango baleuse na mbarambara ti use nze ni, sese ni ahole biani biani.

¹⁵Nzapa atene na Noe:

¹⁶“Sigigi na ya ti mangboko ni, mo na wali ti mo, amolenge ti mo, na awali ti amolenge ti mo.

¹⁷Mo sigigi na amara ti nyama so kue ayeke na tere ti mo na ya ti mangboko ni, amara ti ndeke nde nde, anyama ti kodro, na anyama so kue ayeke hara harango na sese. Ayeke nzoni anyama ni awu amu ndö ti sese kue; ala du, ala wu mingi.”

¹⁸Noe asigigi, lo na amolenge ti lo, wali ti lo, na awali ti amolenge ti lo.

¹⁹Anyama kue, anyama so kue ayeke hara harango na sese, andeke kue na aye so kue ayeke tambula na sese, ala londo gi na lege ti amara ti ala si ala sigigi na ya ti mangboko ni.

²⁰Noe aleke mbeni gbalaka ndali ti KOTA GBIA. Na popo ti anyama so kue ayeke *nzoni, na andeke so kue ayeke *nzoni, lo mu oko na ya ti mara oko oko ti mu na *sandaga so a yeke gbi ni kue na wâ na KOTA GBIA na ndö ti gbalaka ni.

²¹KOTA GBIA ama nzoni fion ti sandaga ni, anzere na lo si lo tene na be ti lo, lo tene: “Mbi yeke kiri ti deba sese ndali ti zo pepe. Biani, ti londo na ndembe so zo ade maseka, be ti lo aye ti sara gi ye ti sioni. Tongaso mbi yeke kiri ti buba aye so ayeke na fini so tongana ti so mbi sara so pepe.

²²Na ndembe so sese ayeke ngba, fade lungo le ti kobe wala kongo le ti kobe, ndo-wâ na de, ngoi ti ngu-Nzapa na buru, bi na lâ ayeke hunzi laoko pepe.”