Read sango Tongo nda ti aye 9 Bible Online

Tongo nda ti aye 9 - sango bible

Tongo nda ti aye 9

¹Nzapa asara tufa na ndö ti Noe na amolenge ti lo; lo tene na ala: “Ayeke nzoni ala du, ala wu mingi, ala mu ndö ti sese kue.

²Fade anyama kue na andeke ti nduzu kue ayeke sara mbeto ti ala si ayeke kpe ala. Mbi zia aye so kue ayeke tambula na sese, na asusu kue na maboko ti ala.

³Aye so kue ayeke tambula na sese si ayeke na fini, ayeke ga kobe ti ala gi tongana ti so mbi mu ando na ala akugbe ti kasa so. Mbi mu aye so kue na ala.

⁴Me gi ye oko: nyama so mene angba na ya ti tere ti lo, ala te lo pepe, ndali ti so fini ayeke na ya ti mene ti lo.

⁵Fini ti ala nga ayeke na ya ti mene ti ala. Ndani laa, tongana mbeni nyama wala mbeni zo afâ mba ti lo, fade mbi yeke hunda na nyama ni wala na zo ni mene ti mba ti lo. Fade mbi yeke hunda na zo oko oko tënë na ndö ti fini ti mba ti lo.

⁶Zo so atuku mene ti mba ti lo, fade gi mba ti lo zo laa ayeke tuku mene ti lo, ngbanga ti so Nzapa asara zo si zo ni akpa gi lo Nzapa.

⁷Ti ala, ala du, ala wu mingi, ala mu ndö ti sese kue, ala ga mingi na ndö ti sese.”

⁸Nzapa atene na Noe na amolenge ti lo:

⁹“Mbi yeke sara *mbuki ti mbi na ala, na *ahale ti ala so ayeke ga ande na peko ti ala,

¹⁰nga na aye so kue ayeke na fini si ayeke na tere ti ala so: andeke, anyama ti kodro, na anyama ti ngonda so kue ayeke na tere ti ala, so ti tene anyama na andeke so kue alondo na ala na ya ti mangboko si asigigi so, na anyama ti sese kue.

¹¹Mbi yeke leke ande mbuki ti mbi na ala: ngu ayeke kiri ti suku ti mu ndö ti sese kue pepe; sukungo ngu ni ayeke kiri ti fâ aye so kue ayeke na fini pepe, wala ti buba sese pepe.”

¹²Nzapa akiri atene: “Baa, mbi yeke zia mbeni ye na popo ti mbi na ala titene ala na aye so kue ayeke na fini si ayeke na tere ti ala, abaa ni si ala dabe ti ala na tënë ti mbuki ni. Ye ni ayeke ngba kpu na kpu ndali ti azo so ayeke ga na peko ti ala.

¹³Mbi zia *kongö ti mbi na ya ti ambinda titene aga mbeni ye so ayeke fa tënë ti mbuki so ayeke na popo ti mbi na aye ti sese.

¹⁴Lakue, tongana mbi sara titene mbinda abongbi na le ti nduzu, na ndö ti sese si azo abaa kongö so asigigi na le ti nduzu,

¹⁵mbi yeke dabe ti mbi na tënë ti mbuki so ayeke na popo ti mbi na ala, na aye so kue ayeke na fini. Aye so kue ayeke na fini, fade sukungo ngu ni ayeke buba ala pepe.

¹⁶Tongana kongö ayeke sigigi na le ti nduzu, mbi yeke baa ni si mbi dabe ti mbi na tënë ti mbuki so ayeke ngba kpu na kpu na popo ti mbi na aye so kue ayeke na fini na ndö ti sese.”

¹⁷Nzapa akiri atene na Noe: “Kongö ni si ayeke ye so afa atene, mbi leke tënë ti mbuki na popo ti mbi na aye so kue ayeke na fini na ndö ti sese.”

¹⁸Amolenge ti Noe so alondo na ya ti mangboko, asigigi ayeke Sem, Kam na Yafet. Kam ayeke babâ ti Kanaan.

¹⁹Na lege ti amolenge ti Noe ota so laa azo asigigi, awu, amu ndö ti sese kue.

²⁰Noe ayeke wafango-yaka; lo yeke kozo zo so afâ yaka ti vinye.

²¹Lo nyon vin ti yaka ni; vin ni asara lo si lo lango na gbe ti da ti lo bongo, tere ti lo senge.

²²Kam, babâ ti Kanaan abaa tere ti babâ ti lo so ayeke senge so si lo gue, lo tene tënë ni na a-ita ti lo use so ayeke na gigi.

²³Sem na Yafet amu kota bongo ti Noe, ala zia na ndö ti go ti ala use kue. Ala tambula akiri gi na mbage ti peko ti ala si ala bi bongo ni na ndö ti babâ ti ala so tere ti lo ayeke senge so. Ala baa ndo gi na mbeni ndo nde, ala baa tere ti babâ ti ala so ayeke senge so pepe.

²⁴So vin ni ahon na le ti Noe awe si lo ma tënë ti ye so tanga ti molenge ti lo asara na lo,

²⁵lo tene: “Deba aga na li ti Kanaan! Fade lo yeke ga ndangba ti angbaa ti a-ita ti lo!”

²⁶Na pekoni, lo tene: “E gonda KOTA GBIA, Nzapa ti Sem. Fade Kanaan aga ngbaa ti Sem.

²⁷Ayeke nzoni Nzapa azi lege kota na Yafet. Lo duti na da ti Sem si Kanaan aga ngbaa ti lo!”

²⁸Na peko ti ngu so asuku si amu ndo kue so, Noe aduti na gigi ngu ngbangbo ota na baleoku.

²⁹Ngu ti lo kue ayeke ngbangbo gumbaya na baleoku si lo kui.