Read sango 2 Samuel 2 Bible Online

2 Samuel 2 - sango bible

2 Samuel 2

¹Na peko ti aye so, David ahunda *KOTA GBIA, atene: “Mbi lingbi ti gue na mbeni gbata ti Juda?” KOTA GBIA akiri tënë: “Mo gue senge.” David ahunda ndo, atene: “Mbi lingbi ti gue na ndo wa?” KOTA GBIA akiri tënë: “Mo gue na Hebron.”

²David ague kâ, lo na awali ti lo use, Ahinoam, zo ti Yizreel na Abigail, wali-mua ti Nabal, zo ti kodro ti Karmel.

³David amu nga azo so ayeke na tere ti lo si ala gue; zo oko oko ague na asewa ti lo si ala duti na ya ti agbata so ayeke nduru na Hebron.

⁴Azo ti Juda aga na Hebron si ala tuku mafuta na li ti David titene lo ga gbia ti Juda. Mbeni zo aga atene na David: “Azo ti Yabesh so ayeke na sese ti Galaad laa alu lani Saul.”

⁵David atokua na azo ti Yabesh so ayeke na sese ti Galaad atene: “Ayeke nzoni KOTA GBIA asara tufa na ndö ti ala, ngbanga ti so ala bata be ti ala na gbia ti ala Saul si ala lu kuâ ti lo so.

⁶Fadeso, ayeke nzoni KOTA GBIA abata tënë ti yanga ti lo nga na ye so ayeke mbirimbiri na ala. Mbi nga, fade mbi yeke sara nzoni ye na ala ndali ti nzoni ye so ala sara so.

⁷Ala gbu ngangu, ala sara ye ti koli! Gbia ti ala Saul akui awe; me mbi laa azo ti Juda atuku mafuta na li ti mbi titene mbi ga gbia ti ala.”

⁸Andaa makonzi ti aturugu ti Saul, Abner, molenge ti Ner, amu lani Ishebaal, molenge ti Saul ague na lo na kodro ti Mahanaim.

⁹Kâ, lo zia Ishebaal gbia na ndö ti asese ti Galaad, ti Aser, ti Yizreel, ti Efraim, ti Benjamin; so ti tene na ndö ti Israel kue.

¹⁰Ishebaal ayeke na ngu baleosio si lo ga gbia ti Israel; lo le-gbia ngu use. Gi azo ti Juda laa amu peko ti David.

¹¹Ngoi so David aduti gbia na Hebron na ndö ti azo ti Juda ayeke ngu mbarambara na nze omene.

¹²Abner, molenge ti Ner na aturugu ti Ishebaal, molenge ti Saul alondo na Mahanaim ti gue ti tiri bira na mbage ti Gabaon.

¹³Yoab, so iri ti mama ti lo ayeke Seruya na aturugu ti David, ala nga alondo ti gue ti tiri bira. Abongbi ti aturugu use so kue awara tere nduru na ndo so a yeke bata ngu daa na Gabaon. Aturugu ti Abner aluti na mbage, ala ti Yoab aluti na mbeni mbage.

¹⁴Abner atene na Yoab: “Mbi ye titene afini turugu ti e alondo atiri koli na koli na dawa ti e, e baa.” Yoab akiri tënë: “Nzoni!”

¹⁵Afini turugu ni alondo ti gue. Wungo ti ala alingbi tere: ala ti mara ti Benjamin, ala so ayeke tiri bira ndali ti Ishebaal, molenge ti Saul ayeke baleoko na use, ala ti David ayeke baleoko na use.

¹⁶Turugu oko oko agbu li ti wato ti lo, lo kpo kate ti wato ti lo ni na yongoro zeme si ala kue akui legeoko. Nilaa azo adi iri ti ndo so ayeke na Gabaon so Yaka ti atêne.

¹⁷Na lango ni so, bira aza wâ ngangu mingi. Abner na azo ti Israel ati na gbe ti aturugu ti David.

¹⁸Yoab, Abishai na Asael, so iri ti mama ti ala ayeke Seruya ayeke lani kâ. Gere ti Asael ayapu na loro tongana ti dengbe.

¹⁹Asael atumba peko ti Abner; lo gue na mbage ti maboko ti koli wala na mbage ti maboko ti wali pepe.

²⁰Abner abaa ndo na peko si lo hunda ndo, lo tene: “Mo Asael laa?” Asael akiri tënë: “Een, mbi laa.”

²¹Abner atene na lo: “Mo tumba peko ti mbeni zo nde, mo gue na mbage ti maboko ti koli wala na mbage ti maboko ti wali. Mo gbu mbeni fini turugu oko, mo mu aye ti bira ti lo.” Me Asael ake, lo ngba gi ti tumba peko ti Abner.

²²Abner akiri atene na Asael: “Zia ti tumba peko ti mbi! Mo ye titene mbi fâ mo ngbanga ti nyen? Na pekoni, mbi yeke baa ita ti mo Yoab na dawa ti mbi tongana nyen?”

²³Me Asael ake ti zia peko ti Abner. Tongaso Abner amu ngbonda ti likongo ti lo, lo koro na ya ti Asael; likongo ni asigigi na peko ti lo. Asael ati si lo kui gi na ndo so. Azo so kue asi na ndo so Asael ati daa so, ala luti.

²⁴Yoab na Abishai atumba peko ti Abner. So lâ ayeke gue ti kui, ala si na Gibea-Ama, na mbage ti To ti Gia. Gibea-Ama ayeke na lege so ague na benyama ti Gabaon.

²⁵Aturugu ti mara ti Benjamin abongbi tere ti ala na peko ti Abner, ala ga tongana zo oko si ala luti na li ti mbeni hoto.

²⁶Abner airi Yoab si atene na lo: “Fade e yeke ngba ti fâ tere ti e na yongoro zeme lakue? Mo hinga, mo tene, vundu ayeke ga na peko ti ye so e yeke sara so pepe? Lawa laa mo yeke tene na azo ti mo titene ala zia lege ti tumbango peko ti a-ita ti ala ti fâ ala so?”

²⁷Yoab akiri tënë: “Nzapa ayeke na fini! Tongana mo tene fade tënë tongaso pepe, ka azo ti mbi ayeke ngba ti tumba peko ti a-ita ti ala ngbii asi kekereke na ndaperere.”

²⁸Yoab ahuru didi si aturugu ti lo kue aluti, ala zia lege ti tumbango peko ti azo ti Israel; bira ni ahunzi.

²⁹Abner na aturugu ti lo atambula bi bi bi na lando ti Jourdain, ala fâ ngu ni, ala hon na popo-hoto ti Bitron si ala si na Mahanaim.

³⁰So Yoab azia ti tumba peko ti Abner awe, lo bongbi aturugu ti lo kue. Gi aturugu ti David baleoko na gumbaya laa ayeke na popo ti aturugu ni pepe; Asael nga ayeke daa pepe.

³¹Me aturugu ti David afâ aturugu ti mara ti Benjamin na ti Abner ngbangbo ota na baleomene.

³²A mu kuâ ti Asael a gue na ni na Betlehem si a lu ni na ya ti du ti kuâ ti babâ ti lo. Yoab na aturugu ti lo atambula bi bi bi ngbii ala si na Hebron na yanga ti ndaperere.