Read sango 2 Samuel 20 Bible Online

2 Samuel 20 - sango bible

2 Samuel 20

¹Mbeni zo ti bingo kpale ayeke lani kâ, iri ti lo ayeke Sheba, molenge ti Bikri, zo ti mara ti Benjamin. Sheba ahuru tatalita, atene: “Nyen laa abongbi e na David, nyen? Mbeni ye abongbi e na molenge ti Yese? Azo ti Israel, ayeke nzoni zo oko oko akiri na da ti lo.”

²Tongaso azo ti Israel kue azia David si ala mu peko ti Sheba. Me azo ti Juda laa angba na tere ti gbia ti ala; ala mu peko ti lo, ti londo na yanga ti ngu ti Jourdain ngbii asi na Jérusalem.

³So gbia David asi na yangbo ti lo na Jérusalem awe, lo mu ambeni wali ti lo baleoko so lani lo zia ala ti bata yangbo so, lo zia ala na ya ti mbeni da so azo ayeke bata ni nzoni. Lo yeke mu na ala aye so kue alingbi na ala, me lo na ala aduti koli na wali pepe. A kanga ala na ya ti da ni ngbii asi na lango so ala kui na ni. Ala yeke tongana awali-mua, ataa so koli ti ala angba na fini.

⁴Gbia atene na Amasa: “Bongbi aturugu ti Juda kue! Mbi mu na mo lango ota titene mo ga na ala ge.”

⁵Amasa ague ti bongbi aturugu ti Juda, me lango so gbia afa na lo so ahon.

⁶Tongaso David atene na Abishai: “Fadeso, Sheba, molenge ti Bikri ayeke sara sioni mingi na e ahon ti Absalom. Mo mu aturugu ti mbi, mo tumba peko ti koli so kozo titene lo gue, lo honde tere ti lo na ya ti agbata so angangu gbagba ayeke na tere ni.”

⁷Aturugu so Yoab ayeke na li ti ala, ala na aturugu ti Kereti na ti Peleti, so ti tene akpengba turugu kue, ala mu peko ti Abishai, ala londo na Jérusalem ti tumba peko ti Sheba, molenge ti Bikri.

⁸So ala si nduru na tere ti kota têne so ayeke na Gabaon, Amasa awara ala. Yoab ayu bongo ti lo ti bira; lo kanga kamba ti ndö ti bongo, lo kanga yongoro zeme na tere ni, yongoro zeme ni ayeke na ya ti bozo ni. Na ndembe so Yoab ayeke gue nduru na Amasa, yongoro zeme ni ati.

⁹Yoab atene na Amasa: “Ita ti mbi, mo yeke senge?” Yoab agbu kua ti yanga ti Amasa na maboko ti lo ti koli ti su ngbangba ti lo.

¹⁰Amasa asara hange pepe na yongoro zeme so Yoab agbu na maboko ti lo. Tongaso, lo kpo ya ti Amasa si avi ti Amasa atuku na sese. Yoab akiri akpo Amasa ti fani use pepe, ngbanga ti so lo kui awe. Na pekoni, Yoab na ita ti lo Abishai akiri alondo ti tumba peko ti Sheba, molenge ti Bikri.

¹¹Mbeni turugu oko ti Yoab angba na tere ti kuâ ti Amasa si lo tene: “Zo so aye Yoab si lo yeke zo ti David, ayeke nzoni zo ni amu peko ti Yoab!”

¹²Andaa Amasa arule tere ti lo fade na ya ti mene ti lo wani na ndö ti lege. So turugu ni abaa azo ayeke luti ti baa kuâ ti Amasa, lo gboto kuâ ni, lo zia na ya ti mbeni yaka si lo bi kota bongo na ndö ni.

¹³Gi so lo zi kuâ ni na ndö ti lege awe, aturugu ayeke hon hongo na peko ti Yoab, ala luti pepe; ala yeke tumba peko ti Sheba, molenge ti Bikri.

¹⁴Lo hon na ya ti sese kue ti Israel, lo gue ngbii lo si na gbata ti Abel-Bet-Maaka. Azo ti mara ti Beri kue abongbi tere si ala mu peko ti lo.

¹⁵Yoab na aturugu ti lo angoro gbata ti Abel-Bet-Maaka na bira, ngbanga ti so Sheba ayeke kâ. Ala bongbi sese aga *koto na tere ti gbagba ti gbata ni. Na pekoni, ala to nda ti pika gere ti gbagba ni titene gbagba ni ati.

¹⁶Mbeni wali so ahinga ndo mingi adekongo na ya ti gbata ni kâ, atene: “Ala ma si! Ala ma si! Ala tene na Yoab, lo ga ge si; mbi yeke na mbeni tënë ti tene na lo.”

¹⁷Yoab aga nduru si wali ni ahunda lo, atene: “Mo Yoab laa?” Yoab akiri tënë: “Een, mbi laa!” Wali ni atene: “Mbi gbu gere ti mo, ma tënë ti mbi!” Yoab akiri tënë: “Mbi yeke ma mo.”

¹⁸Wali ni atene: “Ando, azo ayeke tene ka, atene: ‘Ayeke nzoni a hunda azo ti Abel-Bet-Maaka si tënë ahunzi!’

¹⁹Na sese ti Israel kue, gbata ti e ayeke oko ti agbata so siriri ayeke daa si ayeke sara ye na legeni. Me ti mo, mo ye ti gi lege ti buba gbata so azo ayeke ne ni mingi na sese ti Israel! Ye so ayeke ti *KOTA GBIA, mo ye ti buba ni ngbanga ti nyen?”

²⁰Yoab akiri tënë: “Oko pepe! Mbi leke na be ti mbi ti buba ye oko pepe wala ti kungbi ye oko pepe!

²¹Tënë ni laa pepe. Me tënë ni ayeke ti mbeni koli so ayeke zo ti sese ti ahoto ti Efraim; iri ti lo ayeke Sheba, molenge ti Bikri. Lo tomboka na tere ti gbia David. Ala zia gi lo oko na maboko ti mbi si fade mbi londo na gbata ni, mbi hon.” Wali ni atene na Yoab: “Nzoni! Fade e yeke bi li ti lo na mo na ndö ti gbagba.”

²²Wali ni ague, atene tënë ni na azo ti gbata ni na lege ti ndara. Nilaa ala fâ li ti Sheba, molenge ti Bikri si ala bi ni na Yoab. Yoab ahuru tatalita si aturugu ti lo alondo na gbata ni akiri na ndo ti ala. Yoab nga akiri na Jérusalem na tere ti gbia.

²³Yoab ayeke makonzi ti aturugu ti Israel kue. Benaya, molenge ti Yoyada ayeke makonzi ti azo ti Kereti na ti Peleti so ayeke aturugu ti batango gbia;

²⁴Adoram ayeke makonzi na ndö ti azo ti sarango kua ti ngangu; Yoshafat, molenge ti Ahilud ayeke zo ti tenengo peko ti tënë ti yanga ti gbia;

²⁵Sheva ayeke wakuasu; Sadok na Abiatar ayeke awayango-sandaga;

²⁶Ira, mbeni *hale ti Yair ayeke nga wayango-sandaga so ayeke sara kua na David.