Read sango 2 Samuel 23 Bible Online

2 Samuel 23 - sango bible

2 Samuel 23

¹Tanga ti atënë ti David ayeke so: Tënë ti David, molenge ti Yese, tënë ti zo so Nzapa ayo lo na nduzu; tënë ti gbia so Nzapa ti Jacob atuku mafuta na li ti lo, lo so azo ti Israel ahe bia mingi na iri ti lo.

²Yingo ti *KOTA GBIA atene tënë na lege ti mbi; tënë ti lo ayeke na menga ti mbi.

³Nzapa ti Israel atene tënë, Kota Têne so azo ti Israel ayeke luti na ndö ni atene na mbi: “Gbia so ayeke bata azo ti lo mbirimbiri si lo yeke bata azo ti lo na lege ti kpengo mbeto ti Nzapa,

⁴lo yeke tongana lumiere ti ndaperere na le ti nduzu so mbinda ayeke daa pepe; lo yeke tongana lâ so ayeke sara titene pere asigigi na peko ti so ngu-Nzapa apika.”

⁵Sewa ti mbi ayeke tongaso na le ti Nzapa pepe? Ndali ti so mbi na lo, e sara *mbuki ti lakue lakue, a leke andia ti mbuki ni kue awe. Asongo benda nga na aye ti nzoni kue ti mbi, lo lingbi ti sara si amai maingo pepe?

⁶Me azo so kue ayeke sara mbirimbiri ye pepe, ala yeke tongana amaboko ti keke ti ki so a bi ni. Zo ti gbu ni na maboko senge ayeke daa pepe.

⁷Zo so aye ti gbu ni, ayeke nzoni lo mu wen wala keke ti likongo, lo gbu na ni. A yeke gbi ni gi na ndo ni so.

⁸So ayeke iri ti akpengba turugu ti David: Ishebaal, zo ti kete mara ti Hakmoni; lo yeke na li ti aturugu ti batango gbia, mbeni iri ti lo ayeke Adino, zo ti kete mara ti Esni; lo laa na ya ti lango oko, lo fâ azo 800 na likongo ti lo.

⁹Na peko ti Ishebaal ayeke Elazar, molenge ti Dodo, molenge ti mbeni zo ti kete mara ti Ahoa. Elazar ayeke na popo ti akpengba turugu ota so ala na David adekite na azo ti Filistii, na ndembe so azo ti Filistii ni abongbi tere ti ala ti tiri bira; aturugu ti Israel akpe.

¹⁰Me Elazar alondo si lo fâ azo ti Filistii ngbii maboko ti lo awoko si angba gi na tere ti yongoro zeme ti lo. Na lango ni so, *KOTA GBIA asara si azo ti Israel aso benda. Aturugu ni akiri na tere ti Elazar gi ti ro aye ti azo so akui so.

¹¹Na peko ti Elazar ayeke Shama, molenge ti Age, zo ti kete mara ti Harar. Azo ti Filistii abongbi tere ti ala lani na Lehi, ndo so yaka ti lantii ayeke daa. Na ndo so laa aturugu ti Israel akpe na dawa ti azo ti Filistii.

¹²Me Shama aluti ti lo na ya ti yaka ni, lo mu ni si lo fâ azo ti Filistii. KOTA GBIA asara si azo ti Israel aso benda.

¹³Na ngoi ti fango ale ti kobe, akpengba turugu ota asigigi na popo ti aturugu ti batango gbia, ala ga awara David na ya ti du ti têne ti Adulam. Andaa aturugu ti Filistii asara bâbâ ti ala na popo-hoto ti azo ti Refa.

¹⁴David ahonde tere ti lo na mbeni ndo so singo daa ayeke ngangu; andaa ambeni turugu ti Filistii aduti ti bata ndo na Betlehem.

¹⁵Gi hio tongaso, nzara ti mbeni ye agbu David si lo tene: “Zo wa laa ayeke gue ti to ngu ti du ti ngu so ayeke na yanga ti gbata ti Betlehem ti ga na ni titene mbi nyon?”

¹⁶Tongaso akpengba turugu ota so ali na ya ti bâbâ ti azo ti Filistii na ngangu, ala to ngu ti du ti ngu so ayeke na yanga ti gbata ti Betlehem, ala ga na ni na David; me lo ke ti nyon ngu ni. Lo tuku ngu ni na sese tongana *sandaga ti samba ndali ti KOTA GBIA.

¹⁷Lo tene: “KOTA GBIA, mbi lingbi ti sara ye tongaso oko pepe! Ngu so ayeke tongana mene ti azo so aka tere ti ala na kuâ ti gue ti to ngu ni so pepe?” Nilaa David ake ti nyon ngu ni. Baa ye so akpengba turugu ota so asara laa.

¹⁸Abishai, ita ti Yoab, so iri ti mama ti lo ayeke Seruya, lo yeke na popo ti aturugu ti batango gbia. Lo laa lo yo lani likongo ti lo na nduzu si lo koro ya ti azo 300; iri ti lo awu tongana ti akpengba turugu ota so.

¹⁹Azo agonda lo mingi na popo ti “aturugu ti batango gbia” so, lo ga makonzi ti ala, me lo lingbi na “akpengba turugu ota” so pepe.

²⁰Benaya, molenge ti Yoyada ayeke mbeni kpengba turugu; lo yeke zo ti kodro ti Kabseel, lo sara akota ye mingi. Lo laa lo fâ azo ti mara ti Moab use so iri ti ala Ariel; lo laa na ngoi ti *neze, lo zu na ya ti du ti ngu si lo fâ mbeni bamara.

²¹Lo laa lo fâ mbeni zo ti Ezipte so ayo mara ni use ape; likongo ayeke na maboko ti zo ti Ezipte ni. Benaya amu keke si lo gue na tere ti zo ti Ezipte ni, lo gboto likongo ti koli so na maboko ti lo si lo fâ lo na ni.

²²Baa ye so Benaya, molenge ti Yoyada asara si iri ti lo awu na popo ti akpengba turugu ota so laa.

²³Lo laa azo agonda lo mingi na popo ti aturugu ti batango gbia; me lo lingbi na akpengba turugu ota so pepe. David amu lo titene lo duti na li ti aturugu ti batango lo.

²⁴Azo so ayeke na popo ti aturugu ti batango gbia ayeke Asael, ita ti Yoab; Elanan, molenge ti Dodo, zo ti Betlehem;

²⁵Shama, zo ti kodro ti Harod na Elika, zo ti kodro ti Harod;

²⁶Heles, zo ti kodro ti Pelet, Ira, molenge ti Ikesh, zo ti kodro ti Tekoa;

²⁷Abiezer, zo ti kodro ti Anatot; Mebunai, zo ti kodro ti Husha;

²⁸Salmon, zo ti kodro ti Ahoa; Marai, zo ti kodro ti Netofa;

²⁹Heleb, molenge ti Baana, zo ti kodro ti Netofa; Itai, molenge ti Ribai, zo ti Gibea, na sese ti Benjamin;

³⁰Benaya, zo ti kodro ti Piraton; Hidai so ayeke lango na tere ti akete ngu ti Gaash;

³¹Abialbon, zo ti kodro ti Bet-Araba; Azmavet, zo ti kodro ti Bahurim;

³²Eliaba, zo ti kodro ti Shaalbon, mbeni molenge ti Yashen, Jonatan;

³³Shama, zo ti kodro ti Harar; Ahiam, molenge ti Sharar, zo ti kodro ti Harar;

³⁴Elifelet, molenge ti Ahasbai, molenge ti mbeni zo ti Maaka; Eliam, molenge ti Ahitofel, zo ti kodro ti Gilo;

³⁵Hesrai, zo ti kodro ti Karmel; Paarai, zo ti kodro ti Arab;

³⁶Igal, molenge ti Natan, zo ti kodro ti Soba; Bani, zo ti mara ti Gad;

³⁷Selek, zo ti mara ti Amon; Narai, zo ti kodro ti Beerot, zo ti yongo aye ti bira ti Yoab, so iri ti mama ti lo ayeke Seruya;

³⁸Ira, zo ti sewa ti Yeter; Gareb, zo ti sewa ti Yeter

³⁹na Urii, zo ti mara ti Het. Wungo ti ala kue ayeke baleota na mbarambara.