Read sango 2 Samuel 24 Bible Online

2 Samuel 24 - sango bible

2 Samuel 24

¹Mbeni lâ, ngonzo ti *KOTA GBIA akiri alondo na tere ti azo ti Israel. Lo pusu David titene lo sara mbeni ye so ayeke sara sioni na ala; lo tene na lo: “Gue, mo diko wungo ti azo ti Israel na ti Juda.”

²Gbia atene na Yoab, makonzi ti aturugu so ayeke na tere ti lo, atene: “Mo tambula na popo ti amara kue ti Israel, ti londo na Dan ngbii asi na Bersheba. Ala diko wungo ti azo ni si mbi lingbi ti hinga wungo ti ala.”

³Yoab akiri tënë na gbia: “Ayeke nzoni KOTA GBIA, Nzapa ti mo asara titene azo ni awu fani ngbangbo oko ahon so si mo baa ni na le ti mo wani! Me gbia, mo ye ti sara ye so ngbanga ti nyen?”

⁴Me yanga so gbia amu na Yoab na amakonzi ti aturugu, lo ngba gi na ndö ni; nilaa Yoab na amakonzi ti aturugu ni alondo na da ti gbia si ala gue ti diko wungo ti azo ti Israel.

⁵Ala fâ ngu ti Jourdain si ala to nda ti diko wungo ti azo na gbata ti Aroer nga na gbata so ayeke na popo-hoto. Ala hon na sese ti azo ti mara ti Gad si ala mu lege so ague na gbata ti Yazer.

⁶Ala si na sese ti Galaad nga na kodro ti azo ti mara ti Het, na Kades, na Dan-Yaan nga na akodro so ayeke na tere ti Sidon.

⁷Ala gue, asi na Tir so ngangu gbagba ayeke na tere ni; ala si nga na ya ti agbata kue ti azo ti mara ti Hivi na ti Kanaan. Ala hunzi tambula ti ala ni na Bersheba, na Mbongo ti sese ti Juda.

⁸Ala hon na ya ti akodro so kue na ya ti nze gumbaya na lango baleuse si ala kiri na Jérusalem.

⁹Yoab afa na gbia wungo ti azo so ala diko: na Israel, akpengba turugu so alingbi ti tiri bira ayeke 800 000; na Juda, aturugu ayeke 500 000.

¹⁰Na peko ti so David adiko wungo ti azo, be ti lo apika kpu kpu kpu. Lo tene na *KOTA GBIA, lo tene: “Ye so mbi sara so ayeke sioni mingi. Mbi hinga, mbi tene, mbi sara ye tongana zo so li ti lo ayeke daa pepe. Fadeso, KOTA GBIA, mo zi siokpari so na li ti mbi, zo ti kua ti mo.”

¹¹Na ndaperere, so David alondo, andaa tënë ti KOTA GBIA asi na wayanga-Nzapa Gad awe, zo ti bango nda ti aye na David; tënë ni atene:

¹²“Gue mo tene na David, mo tene: ‘Tënë so KOTA GBIA atene ayeke so: Mbi zia na dawa ti mo aye ota; soro oko na popo ni, fade mbi yeke sara ni na mo.’ ”

¹³Gad ague, awara David si atene na lo peko ti tënë ti KOTA GBIA, lo tene: “Mo ye titene nyen laa asi na mo, nyen? Ngu mbarambara so kota nzara ati na ya ti kodro ti mo? Wala nze ota so mo kpe na dawa ti awato ti mo si ala tumba peko ti mo? Wala lango ota so sioni kobela ti bubango kodro ati na ya ti kodro ti mo? Gbu li ti mo, mo tene na mbi ye so mbi lingbi ti tene na lo so atokua mbi so.”

¹⁴David akiri tënë na Gad, atene: “Mbi yeke na ya ti ye ti ngangu mingi! Mbi gbu gere ti mo, zia e ti na maboko ti KOTA GBIA, ngbanga ti so nzoni be ti lo ayeke kota; me mbi ye ti ti na maboko ti azo pepe.”

¹⁵Tongaso, KOTA GBIA atokua sioni kobela ti bubango kodro na ya ti kodro ti Israel, ti londo na ndaperere ngbii asi na lango ni so a fa. Ti londo na Dan ngbii asi na Bersheba, azo ti kodro 70 000 akui.

¹⁶So *ange ti KOTA GBIA ayoro maboko ti lo na mbage ti Jérusalem ti kangbi sioni kobela ni na ya ti gbata ni, KOTA GBIA abaa mawa ti azo ni si lo tene na ange ti fango azo ni, lo tene: “Alingbi awe! Kiri na maboko ti mo!” Na ndembe ni so, ange ti KOTA GBIA ayeke luti na tere ti lakere ti Aravna, zo ti mara ti Yebus.

¹⁷So David abaa ange so ayeke fâ azo ni, lo tene na KOTA GBIA: “Mbi laa mbi sara siokpari ni! Mbi laa mbi sara sioni ni! Me asenge zo so, nyen laa ala sara, nyen? Mbi gbu gere ti mo, ayeke nzoni mo pika gi mbi na asewa ti mbi.”

¹⁸Gi na lango ni so, Gad asi na ndo ti David si atene na lo: “Gue na lakere ti Aravna, zo ti mara ti Yebus, mo sara mbeni gbalaka ndali ti *KOTA GBIA kâ.”

¹⁹David ague na lakere ni alingbi na tënë so Gad atene, alingbi na yanga so KOTA GBIA amu.

²⁰Aravna abi le ti lo na gbeni, lo baa gbia na azo ti kua ti lo so ayeke ga na mbage ti lo. Lo gue na mbage ti ala, lo kuku, lo kpo li ti lo na sese na dawa ti gbia.

²¹Lo hunda gbia, lo tene: “Gbia, mo ga na ndo ti mbi ngbanga ti nyen?” David akiri tënë: “Mbi ga ti vo lakere ti mo so titene mbi sara gbalaka daa ndali ti KOTA GBIA, tongaso si sioni kobela so ayeke fâ azo so ahunzi.”

²²Aravna atene na David: “Gbia, mo lingbi ti mu ni senge, mo mu na *sandaga so a yeke gbi ni kue na wâ ye so be ti mo aye. Baa, abagara ti mbi ndali ti sandaga ni laa. Ye ti pikango na ale ti ble na akeke so a kanga na go ti abagara ni, fade a yeke sara na wâ ndali ti sandaga ni.

²³Mbi Aravna, mbi mu aye so kue na gbia.” Na pekoni, lo tene na gbia: “Ayeke nzoni KOTA GBIA, Nzapa ti mo abaa ye so mo mu na lo so na nzoni le.”

²⁴Me gbia atene na Aravna: “Ên-en! Mbi yeke vo ni alingbi gi na ngere ni. Ye so a mu na mbi senge senge, mbi ye ti mu na sandaga so a yeke gbi ni kue na wâ na KOTA GBIA, Nzapa ti mbi pepe!” David avo lakere ni nga na abagara ni na ale ti nginza baleoku.

²⁵Lo sara gbalaka na ndo ni ndali ti KOTA GBIA; lo mu na lo asandaga so a yeke gbi ni kue na wâ nga na sandaga ti beoko. Tongaso, KOTA GBIA ama sambela ndali ti kodro ni si sioni kobela so ayeke fâ azo ti Israel so ahunzi.