Read sango 2 Samuel 4 Bible Online

2 Samuel 4 - sango bible

2 Samuel 4

¹So Ishebaal, molenge ti Saul ama a tene, Abner akui na Hebron awe, ngangu ti lo ahunzi kue si kota mbeto agbu azo ti Israel kue.

²Ishebaal ayeke lani na akoli use na gbe ti lo so ala yeke amakonzi ti aturugu ti lo; iri ti mbeni ayeke Baana si iri ti mbeni ayeke Rekab. Ala yeke amolenge ti Rimon, zo ti gbata ti Beerot. — A baa Beerot tongana mbeni mbage ti sese ti Benjamin.

³Azo ti Beerot akpe ague na Gitaim; *ahale ti ala angba ti duti kâ ngbii asi laso. —

⁴Andaa Jonatan, molenge ti Saul ayeke lani na mbeni molenge-koli so gere ti lo use kue abuba. Molenge ni ayeke na ngu oku na ndembe so ambeni zo alondo na Yizreel aga atene tënë ti kuâ ti Saul na ti Jonatan. Wali so ayeke bata molenge ni ayo lo ti kpe na lo. Na ya ti gbugburungo tere, molenge ni ati si gere ti lo abuba. Iri ti molenge ni ayeke Mefibaal.

⁵Rekab na Baana, amolenge ti Rimon, zo ti gbata ti Beerot ague na ndo ti Ishebaal. Ala si kâ na bekombite na ngoi so ndo-wâ ayeke mingi. Ishebaal angba ti lango.

⁶Ala li na ya ti da, mo baa mo tene, ala gue ti mu *ble; ala koro ya ti lo, ala fâ lo. Na pekoni, Rekab na Baana akpe ahon.

⁷So ala li fade na ya ti da ni, andaa Ishebaal ayeke lango na ndö ti gbogbo ti lo, ala kpo lo si ala fâ lo. Ala mu li ti lo si ala tambula bi bi bi ahon na lege so ague na Araba.

⁸Ala mu li ti Ishebaal ague na ni na David na gbata ti Hebron si ala tene na gbia: “Baa li ti wato ti mo Ishebaal, molenge ti Saul so lani aye ti fâ mo so laa. Laso *KOTA GBIA akiri peko ti sioni na Saul nga na *ahale ti lo ndali ti mo awe.”

⁹David akiri tënë na Rekab nga na ita ti lo Baana, amolenge ti Rimon, atene: “KOTA GBIA ayeke na fini, lo so lo zi mbi na ya ti kuâ!

¹⁰Zo so lani aga atene na mbi tënë ti kuâ ti Saul si lo baa ti lo, lo tene, nzoni sango laa lo tene na mbi so, mbi gbu lo si mbi fâ lo na Siklag. So futa ti lo ndali ti nzoni sango ni laa!

¹¹So fadeso asioni zo afâ mbeni zo ti mbirimbiri na ya ti da ti lo, na ndö ti gbogbo ti lo senge senge so, fade mbi yeke hunda mene ti lo na maboko ti ala pepe? Mbi yeke mingo ala na ndö ti sese ti ala pepe?”

¹²David amu yanga na afini turugu ti lo ti fâ Rekab na Baana. Na pekoni, ala de amaboko na agere ti Rekab na Baana, ala kanga ala na nduzu na tere ti ndo so a yeke bata ngu daa na Hebron. Ala mu li ti Ishebaal, a lu na ya ti du ti kuâ ti Abner, na Hebron.