Read sango 2 Samuel 5 Bible Online

2 Samuel 5 - sango bible

2 Samuel 5

¹Amara kue ti Israel aga na mbage ti David na Hebron si ala tene na lo: “E azo ti mara ti mo laa, e asewa ti mo laa.

²So Saul ayeke ando gbia ti e so, mo laa mo yeke lakue na li ti azo ti Israel ti gue na ala na bira nga ti kiri na ala. *KOTA GBIA atene na mo: ‘Mo laa mo yeke bata ande azo ti Israel, azo ti mbi; mo laa mo yeke ga makonzi ti azo ti Israel.’ ”

³Tongaso, *akangba ti Israel kue aga na mbage ti gbia David na Hebron. Kâ, lo na ala asara *mbuki na dawa ti KOTA GBIA. Ala tuku mafuta na li ti David titene lo ga gbia ti Israel.

⁴David ayeke na ngu baleota si lo ga gbia; lo sara ngu baleosio na kua ti gbia ni.

⁵Na Hebron, lo le-gbia na ndö ti azo ti Juda ngu mbarambara na nze omene. Na Jérusalem, lo le-gbia na ndö ti azo ti Israel na azo ti Juda kue ngu baleota na ota.

⁶Gbia David na azo ti lo ague na Jérusalem ti tiri bira na azo ti Yebus so alango lani na sese ni. Ala tene na David: “Mo yeke li na ya ti gbata ti e pepe! Ataa awaziba, ataa azo ti bubango gere, ala yeke kanga lege na mo!” Tënë ni so aye ti tene: fade David ayeke mu gbata ni pepe.

⁷Me David amu ngangu gbagba ti *Sion, so ti tene Gbata ti David.

⁸Na lango ni so, David atene: “Zo so ayeke fâ mbeni zo ti Yebus, zo so ayeke mu lege ti ngu so ayeke na gbe ti sese ti wara ala, azo ti bubango gere so nga na awaziba so be ti David ake ala…” Ndani laa azo atene: “Fade waziba na zo ti bubango gere ayeke li pepe na ya ti kota da ti Nzapa.”

⁹David aduti na ya ti ngangu gbagba ni; ndani laa lo di iri ti gbata ni “Gbata ti David”. Lo sara ambeni gbagba angoro ni, ti londo na ndo so a iri ni Milo, ngbii asi na mbage ti ya ti gbata ni.

¹⁰Ngangu ti David ayeke mai maingo, ngbanga ti so *KOTA GBIA, Nzapa so ayeke na ndö ti dunia kue ayeke na lo.

¹¹Hiram, gbia ti Tir atokua azo na David; lo tokua nga akeke ti sedre, asarapande na azo ti surungo ya ti têne titene ala sara da na David.

¹²David ahinga atene, KOTA GBIA laa azia lo gbia na li ti azo ti Israel si lo yeke sara titene komandema ti David ayeke gue guengo na nduzu ndali ti so azo ti Israel, azo ti KOTA GBIA.

¹³Na peko ti so David alondo na Hebron si lo si na Jérusalem awe, lo mu ambeni wali, ala so ayeke na kozo ndo na ala so ayeke na use ndo. Awali ni akiri adu na lo ambeni molenge-koli na ambeni molenge-wali.

¹⁴Iri ti amolenge so awali ni adu na lo na Jérusalem ayeke so: Shamua, Shobab, Natan, Salomon,

¹⁵Ibar, Elishua, Nefeg, Yafia,

¹⁶Elishama, Eliada na Elifelet.

¹⁷So azo ti Filistii ama a tene, azo atuku mafuta na li ti David titene lo ga gbia ti azo ti Israel, ala kue ague ti gi ti gbu lo. David ama tënë ni si lo zu na ndo so ngangu gbagba ayeke na tere ni.

¹⁸Azo ti Filistii asi si ala mu ndo so kue ayeke na popo-hoto ti azo ti Refa.

¹⁹David ahunda *KOTA GBIA, atene: “Alingbi mbi gue, mbi tiri bira na azo ti Filistii so? Fade mo yeke zia ala na maboko ti mbi?” KOTA GBIA akiri tënë na David: “Mo gue! Fade mbi yeke zia ala na maboko ti mo.”

²⁰David asi na Baal-Perasim; na ndo so laa lo fâ azo ti Filistii. Na pekoni, lo tene: “Na dawa ti mbi, KOTA GBIA asuru lege na popo ti awato ti mbi, tongana ti so ngu ayeke suru lege na ndo so azo aye ti kanga lege na ni.” Ndani laa azo adi iri ti ndo ni so Baal-Perasim.

²¹Azo ti Filistii ni azia ayanda ti ala na ndo ni so. David na azo ti lo amu ague na ni.

²²Azo ti Filistii akiri ague ti tiri bira na ndo so ayeke na popo-hoto ti azo ti Refa, ala mu ndo ni kue.

²³David ahunda KOTA GBIA; KOTA GBIA atene: “Mo londo ge pepe ti tiri bira na ala; me mo hon na mbage ti peko ti ala si mo na ala atengbi tere na yanga ti gbako ti akeke ti mikokulie.

²⁴Tongana mo ma toto ti mbeni ye tongana toto ti gere ti zo na li ti akeke ni, ayeke nzoni mo sara hio, ngbanga ti so mbi KOTA GBIA, mbi hon kozo ti mo awe ti tiri bira na aturugu ti Filistii.”

²⁵David asara ye gi na peko ti yanga ti KOTA GBIA. Nilaa azo ti Israel afâ aturugu ti Filistii, ti londo na gbata ti Geba ngbii asi na gbata ti Gezer.