Read sango 2 Samuel 8 Bible Online

2 Samuel 8 - sango bible

2 Samuel 8

¹Na pekoni, David ahon ndö ti azo ti Filistii na bira, lo zia kamene na le ti ala. Lo zi na maboko ti ala komandema so ala yeke sara na ndö ti akodro so angoro ala.

²Lo hon nga ndö ti azo ti Moab na bira, lo zia ala, ala lango na sese, lo diko ala si na popo ti azo ota, lo fâ azo use si lo zia oko; lo sara gi tongaso ngbii asi na ndani. Nilaa azo ti Moab aga azo ti gbe ti David si ala yeke futa lapo na lo.

³David ahon nga ndö ti Hadadezer, molenge ti Rehob, gbia ti Soba. Na ndembe ni, Hadadezer atara ti kiri ti mu akodro so ayeke na tere ti *bale ti Efrate.

⁴David agbu aturugu 1 700 so ayeke kpe na ambarata nga na asenge turugu 20 000. Lo fâ akamba ti gere ti ambarata so kue ayeke kpe na pusu, me lo bata ambeni mbarata ni 100 ndali ti lo wani.

⁵Azo ti Sirii so aduti na Damas aga ti mu maboko na Hadadezer, gbia ti Soba; me David ahon ndö ti ala na bira si lo fâ ala 22 000.

⁶David azia agovoronere na ndö ti ala, ala ga azo ti gbe ti lo si ala yeke futa lapo na lo. *KOTA GBIA asara si David aso benda na ndö ti awato ti lo na ndo so kue lo yeke gue daa.

⁷David amu *avala ti aturugu ti Hadadezer so a sara na lôro si lo gue na ni na Jérusalem.

⁸David amu nga gba ti bengba wen so ayeke na Beta nga na Berotai, agbata use ti kodro-gbia ti Hadadezer.

⁹Tou, gbia ti Hamat ama a tene, David ahon ndö ti aturugu kue ti Hadadezer, na bira.

¹⁰Lo tokua molenge ti lo ti koli Yoram na David, ti bara lo na ti gonda lo, ngbanga ti so lo sara bira na Hadadezer si lo hon ndö ti lo. Biani, Hadadezer ayeke wato ti Tou. Yoram amu aye so a sara ni na wen ti nginza, na lôro nga na bengba wen ague na ni na David.

¹¹Gbia David azia aye so nde ndali ti KOTA GBIA, tongana ti so lo zia lani nde wen ti nginza nga na lôro so lo gbu na maboko ti amara so kue lo kinda ala:

¹²azo ti Sirii, ti Moab, ti Amon, ti Filistii na ti Amalek, nga na ambeni ye so lo gbu na peko ti bira na maboko ti Hadadezer, molenge ti Rehob, gbia ti Soba.

¹³Na lege so laa iri ti David awu ahon ndoni. So David ahon ndö ti azo ti Sirii awe, na kiringo ti lo, lo fâ azo ti Edom 18 000 na popo-hoto ti Ingo.

¹⁴Lo zia agovoronere na ndö ti azo ti Edom; na sese ti Edom kue, lo zia agovoronere si ala kue aga azo ti gbe ti David. KOTA GBIA asara si David aso benda na ndö ti awato ti lo na ndo so kue lo yeke gue daa.

¹⁵David ale-gbia na ndö ti azo ti Israel kue; lo fâ ngbanga ti azo ti lo kue na legeni mbirimbiri.

¹⁶Yoab, so iri ti mama ti lo ayeke Seruya laa ayeke makonzi ti aturugu; Yoshafat, molenge ti Ahilud ayeke zo ti wabatango-ambeti.

¹⁷Sadok, molenge ti Ahitub, lo na Ahimelek, molenge ti Abiatar ayeke awayango-sandaga; Seraya ayeke wakuasu.

¹⁸Benaya, molenge ti Yoyada ayeke makonzi ti azo ti Kereti na ti Peleti, azo ti batango gbia; amolenge ti David ayeke nga awayango-sandaga.