Read sango 2 Samuel 9 Bible Online

2 Samuel 9 - sango bible

2 Samuel 9

¹Mbeni lâ, David ahunda ndo, atene: “Mbeni zo ti sewa ti Saul angba na fini pepe? Mbi ye ti sara nzoni be na lo ndali ti Jonatan.”

²Andaa mbeni koli so iri ti lo Siba ayeke sara ando kua na da ti Saul. Azo ague, amu lo, aga na lo na David. Gbia ahunda lo, atene: “Mo Siba laa?” Lo kiri tënë: “Een, mbi zo ti kua ti mo laa.”

³Gbia ahunda lo, atene: “Mbeni zo ti sewa ti Saul angba na fini pepe titene mbi sara nzoni be na lo tongana ti so Nzapa ayeke sara ka na azo so?” Siba akiri tënë na gbia: “Mbeni molenge ti Jonatan so gere ti lo use kue abuba ayeke daa.”

⁴Gbia ahunda Siba, atene: “Lo yeke na ndo wa?” Siba akiri tënë na gbia, atene: “Lo yeke lango na ndo ti Makir, molenge ti Amiel, na kodro ti Lo-Dabar.”

⁵Gbia David atokua Siba na kodro ti Lo-Dabar ti mu lo ti ga na lo.

⁶So Mefibaal, molenge ti Jonatan, tara ti Saul asi na ndo ti David awe, lo ti lo kpo li ti lo na sese na gbe ti David. David atene: “Mo Mefibaal laa?” Mefibaal akiri tënë: “Mbi zo ti kua ti mo laa.”

⁷David atene na lo: “Sara mbeto pepe; ndali ti babâ ti mo Jonatan, mbi ye ti sara nzoni be na mo. Fade mbi yeke kiri na mo asese so kue ayeke ti ata ti mo Saul; fade mo yeke te kobe lakue na meza ti mbi.”

⁸Mefibaal akuku, akpo li ti lo na sese, lo tene: “Mbi yeke zo wa titene gbia abaa ndo na mbage ti mbi, mbi so mbi kpa kuâ ti mbo so?”

⁹Gbia airi Siba, zo ti kua ti Saul si atene na lo: “Mbi mu aye so kue ayeke ti wa ti mo Saul na ti asewa ti lo kue na tara ti lo Mefibaal awe.

¹⁰Mo, na amolenge ti mo, na azo ti kua ti mo, fade ala yeke fâ yaka ndali ti lo; ala yeke bongbi ale ti kobe ti yaka ni, ala ga na ni, tongaso si tara ti wa ti mo awara kobe ti tengo ni. Me ti Mefibaal, lo yeke te kobe lakue na meza ti mbi.” Siba ayeke na amolenge-koli baleoko na oku, azo ti kua baleuse.

¹¹Siba atene na gbia: “Aye so kue gbia amu yanga na mbi ti sarango ni, fade mbi zo ti kua ti mo, mbi yeke sara ni. Me ti Mefibaal, lo yeke te ka kobe na meza ti mbi, ngbanga ti so lo yeke ata ti Saul.”

¹²Mefibaal ayeke na mbeni kete molenge-koli, iri ti lo ayeke Mika. Azo so kue ayeke lango na da ti Siba ayeke sara kua na Mefibaal.

¹³Ndali ti so gere ti Mefibaal use kue abuba, lo duti na Jérusalem, tongaso si lo lingbi ti gue lakue ti te kobe na meza ti gbia.