Read sango 1 Agbia 12 Bible Online

1 Agbia 12 - sango bible

1 Agbia 12

¹Roboam ague na Sishem, ngbanga ti so kâ laa azo ti Israel kue aga ti zia lo gbia.

²Me Yeroboam, molenge ti Nebat ama tënë ni na ndembe so lo ngba na Ezipte. Lo gue lani kâ, ngbanga ti so lo kpe gbia Salomon. So lo ma a tene, azo ti Israel abongbi na Sishem, lo ngba gi na Ezipte.

³A tokua azo ti iri lo. Tongaso lo na bongbi ti azo ti Israel kue aga si ala tene na Roboam:

⁴“Lani babâ ti mo asara e tongana angbaa. Fadeso mo zi mbage ti nengo kungba ni na ndö ti go ti e, tongaso fade e yeke sara kua na gbe ti mo.” —

⁵Roboam akiri tënë na ala, atene: “Ala gue! Fade ala kiri aga abaa mbi na peko ti lango ota.” Tongaso azo ni ague.

⁶Gbia Roboam ahunda wango na *akangba so asara lani kua na babâ ti lo Salomon, na ngoi so Salomon angba na fini. Lo hunda ala, lo tene: “Ti ala, wango ti nyen laa ala lingbi ti mu na mbi titene mbi kiri tënë na azo so?”

⁷Akangba ni atene na lo: “Laso, tongana mo sara tere ti mo tongana zo ti kua ti azo ni, tongana mo ga zo ti sarango kua na gbe ti ala, tongana mo kiri na anzerengo tënë na ala, fade ala yeke sara kua na gbe ti mo lakue.”

⁸Me Roboam abaa wango so akangba ni amu na lo so tongana mbumbuse ye. Lo gue, lo hunda wango na amaseka so lo na ala akono legeoko si ala yeke sara kua na gbe ti lo.

⁹Lo tene na ala: “Azo so ahunda na mbi ti zi mbage ti nengo kungba so babâ ti mbi azia lani na ndö ti go ti ala. Ti ala, wango ti nyen laa ala lingbi ti mu na mbi titene mbi kiri tënë na azo so?”

¹⁰Amaseka so lo na ala akono legeoko so atene na lo: “Azo so atene, babâ ti mo azia nengo kungba na ndö ti go ti ala si ala hunda na mo ti zi mbage ni na ndö ti ala so, tënë so mo yeke tene na ala ayeke so: ‘Kete li ti maboko ti mbi so akono ahon ngbonda ti babâ ti mbi.

¹¹Babâ ti mbi azia lani nengo kungba na ndö ti go ti ala. Ti mbi, fade mbi yeke zia na ndö ti go ti ala kungba so akiri ane ahon ndoni. Babâ ti mbi apika ala lani na zaza. Ti mbi, fade mbi yeke pika ala na fimbo so wen ayeke na yanga ni.’ ”

¹²Na peko ti lango ota ni, Yeroboam na azo ni kue aga awara Roboam, tongana ti so gbia atene na ala, atene: “Ala kiri aga abaa mbi na peko ti lango ota.”

¹³Gbia Roboam abaa wango so akangba amu na lo tongana mbumbuse ye; lo kiri tënë na azo ni sioni sioni.

¹⁴Lo kiri tënë na azo ni alingbi na wango so amaseka amu na lo, lo tene: “Babâ ti mbi azia lani nengo kungba na ndö ti go ti ala. Ti mbi, fade mbi yeke zia na ndö ti go ti ala kungba so ane ahon ndoni. Babâ ti mbi apika ala lani na zaza. Ti mbi, fade mbi yeke pika ala na fimbo so wen ayeke na yanga ni.”

¹⁵Tongaso, gbia ama tënë ti azo ni pepe. *KOTA GBIA asara ye ni tongaso titene ye ni asi alingbi na tënë so lo tene na Yeroboam, molenge ti Nebat na lege ti wayanga-Nzapa Ahia, zo ti kodro ti Silo.

¹⁶So azo ti Israel kue abaa atene, gbia ama tënë ti ala pepe, ala kiri tënë na gbia, atene: “Nyen laa ayeke na popo ti e na David, nyen? Nyen laa abongbi e na molenge ti Yese, nyen? Azo ti Israel, e kiri na ndo ti e! Ti mo *hale ti David, fadeso, mo baa ndo na ndö ti da ti mo!” Na pekoni, azo ti Israel akiri na da ti ala.

¹⁷Roboam angba ti le-gbia gi na ndö ti azo ti Israel so ayeke lango na ya ti agbata ti sese ti Juda.

¹⁸Tongaso gbia Roboam atokua Adoram, makonzi ti azo ti sarango kua ti ngangu na mbage ti azo ti Israel ti Banga; me azo ti Israel kue abo lo na têne si lo kui. Gbia Roboam awara pasa ti ko hio na ndö ti pusu ti mbarata ti lo, lo kpe, lo gue na Jérusalem.

¹⁹Lege so azo ti Israel ti Banga ake ti duti na gbe ti komandema ti azo ti sewa ti David ngbii asi laso laa.

²⁰So azo ti Israel ti mbage ti Banga kue ama a tene, Yeroboam akiri awe, ala tokua ti iri lo ti ga na ya ti kota bongbi ti ala. Ala mu lo ti ga gbia na ndö ti Israel kue. Gi azo ti mara ti Juda oko laa angba na gbe ti komandema ti azo ti sewa ti David.

²¹Gi so Roboam asi na Jérusalem awe, lo bongbi angangu turugu saki ngbangbo oko na balemiombe ti Juda na ala ti mara ti Benjamin titene ala gue, atiri bira na azo ti Israel, tongaso si kodro ni akiri na gbe ti komandema ti Roboam, molenge ti Salomon.

²²Me tënë ti Nzapa asi na wayanga-Nzapa Shemaya, atene:

²³“Tene na Roboam, molenge ti Salomon, gbia ti Juda nga na azo ti Juda kue na ala ti Benjamin, nga na tanga ti azo ni kue, mo tene:

²⁴Tënë so *KOTA GBIA atene ayeke so: ‘Ala gue, atiri bira na a-ita, azo ti Israel pepe! Ayeke nzoni zo oko oko akiri na ndo ti lo. Biani, mbi laa mbi yeda si ye so asi.’ ” Azo ni ama yanga ti KOTA GBIA si ala kiri na ndo ti ala, alingbi na yanga so KOTA GBIA amu.

²⁵Yeroboam asara ngangu gbagba na tere ti gbata ti Sishem si lo duti daa; gbata ti Sishem ayeke na sese ti Efraim, ndo so ahoto ayeke daa. Na pekoni, lo londo na Sishem si lo gue, lo sara ngangu gbagba na tere ti gbata ti Penuel.

²⁶Yeroboam atene na be ti lo, atene: “Tongana ye ni angba tongaso, gbaa fade kodro ni ayeke kiri na maboko ti azo ti sewa ti David.

²⁷Tongana azo so angba ti gue na Jérusalem ti mu *asandaga na ya ti kota da ti *KOTA GBIA, fade be ti ala ayeke ngba na kota zo ti ala, Roboam, gbia ti Juda. Ala yeke fâ mbi si ala yeke kiri na gbe ti komandema ti Roboam.”

²⁸Na peko ti so gbia ahunda wango na azo awe, lo mu yanga titene ala leke abagara use na lôro. Lo tene na azo ni, lo tene: “Ala azo ti Israel, ala gue na Jérusalem alingbi awe! Baa, anzapa ti ala so asara si ala sigigi na kodro ti Ezipte laa!”

²⁹Yeroboam azia bagara oko na Betel, oko na Dan.

³⁰Lege so lo pusu azo ti sara siokpari laa. Azo ni ayeke tambula na molongo na dawa ti oko bagara ni ngbii ala si na Dan.

³¹Yeroboam asara ada ti vorongo anzapa nde na li ti ahoto. Lo mu asenge zo ti kodro ti sara kua ti wayango-sandaga, ataa so azo ni ayeke azo ti mara ti Lévi pepe.

³²Yeroboam amu yanga ti sara matanga na lango baleoko na oku ti nze miombe ni. Matanga ni akpa ti so azo ayeke sara ka na sese ti Juda. Gbia wani laa aya asandaga na ndö ti gbalaka ni. Lo sara nga gi mara ti ye so na Betel, lo mu asandaga na abagara so lo leke ala. Kâ, lo zia awayango-sandaga ti sara kua na ndo so lo leke na li ti ahoto.

³³Na lango baleoko na oku ti nze miombe ni, Yeroboam asara matanga na Betel ndali ti azo ti Israel. Lo wani laa lo soro lani lango so. Na ndembe ti matanga ni, lo wani lo ma na ndö ti gbalaka so lo leke ti gbi asandaga daa.