Read sango 1 Agbia 13 Bible Online

1 Agbia 13 - sango bible

1 Agbia 13

¹Andaa mbeni zo ti Nzapa alondo na sese ti Juda aga na Betel alingbi na yanga so *KOTA GBIA amu. Na ndembe ni so, Yeroboam angba ti gbi sandaga na ndö ti gbalaka.

²Zo ti Nzapa ni ato nda ti tene tënë ti KOTA GBIA na tere ti gbalaka ni, lo tene: “Gbalaka! Gbalaka! Tënë so KOTA GBIA atene ayeke so: Fade a yeke du molenge-koli na ya ti sewa ti David; iri ti lo ayeke duti Yosias. Awayango-sandaga ti ando so a leke na ndö ti ahoto ti gbi asandaga daa so, lo yeke gbi ala na ndö ti mo, gbalaka ni. Fade a yeke gbi nga abio ti azo na ndö ti mo!”

³Gi na lango ni so, zo ti Nzapa ni afa na Yeroboam ye so fade ayeke si; lo tene: “Fade gbalaka ni ayeke kungbi si mburu ti wâ ti mafuta ti anyama so ayeke na ndö ni ayeke tuku na sese. Ye so laa ayeke fa biani atene, KOTA GBIA laa atene tënë so.”

⁴Gi so Yeroboam ama tënë so zo ti Nzapa atene na tere ti gbalaka ti Betel, lo yoro maboko ti lo na ndö ti gbalaka ni, lo dekongo, lo tene: “Ala gbu koli so!” Me maboko ti lo so lo yoro so angba gi na nduzu, ahole; lo lingbi ti kiri na ni na tere ti lo pepe.

⁵Gi na ndembe ni so, gbalaka ni akungbi si mburu ti wâ ti mafuta ti anyama so ayeke na ndö ni atuku na sese. Ye ni asi alingbi na tënë so KOTA GBIA atene awe.

⁶Gbia amu tënë si lo tene na zo ti Nzapa so, lo tene: “Mbi gbu gere ti mo, mo toto na KOTA GBIA, Nzapa ti mo titene ngonzo ti lo ade. Mo sambela lo ndali ti mbi titene mbi kiri na maboko ti mbi na tere ti mbi.” Zo ti Nzapa so asambela si ngonzo ti KOTA GBIA ade; gbia akiri na maboko ti lo na tere ti lo tongana ti kozoni.

⁷Gbia atene na zo ti Nzapa so, atene: “Ga na da ti mbi, mo duti mo wu tere ti mo si. Fade mbi yeke mu na mo mbeni matabisi.”

⁸Me zo ti Nzapa ni akiri tënë na gbia, atene: “Ataa mo mu na mbi ndambo ti aye ti mo kue, mbi yeke li na ya ti da ti mo pepe. Ataa nduru mapa, mbi yeke te ni oko pepe, mbi yeke nyon nga ngu na ndo so oko pepe.

⁹Biani, KOTA GBIA amu yanga na mbi, atene: ‘Fade mo te kobe pepe, mo nyon ngu pepe. Na kiringo ti mo na kodro, lege so lani mo mu na guengo ni, mo mu ni pepe.’ ”

¹⁰Tongaso zo ti Nzapa amu mbeni lege nde si lo kiri. Lege so lani lo mu ti ga na Betel so, ni laa lo mu pepe.

¹¹Mbeni mbakoro wayanga-Nzapa ayeke na kodro ti Betel. Amolenge ti lo ti koli aga si ala fa na lo peko ti ye so kue zo ti Nzapa asara na Betel; ala fa nga na lo peko ti atënë so lo tene na gbia.

¹²Tongaso babâ ni ahunda ala, atene: “Lege wa laa lo mu si lo gue?” Amolenge ni ague ti gi ti hinga lege so zo ti Nzapa so amu si lo gue.

¹³Babâ ni atene na amolenge ti lo: “Ala leke na mbi lele si!” Amolenge ni aleke lele ni si lo ko na ndö ni.

¹⁴Lo tumba peko ti zo ti Nzapa so si lo wara lo na lege, andaa lo yeke duti na gbe ti mbeni kota keke. Lo hunda zo ti Nzapa ni, lo tene: “Mo laa mo yeke zo ti Nzapa so mo londo na Juda si mo ga so?” Lo kiri tënë: “Een, mbi laa!”

¹⁵Tongaso mbakoro wayanga-Nzapa ni atene: “Ga na da ti mbi, mo te kobe si!”

¹⁶Zo ti Nzapa so akiri tënë: “Oko pepe! Mbi na mo, e lingbi ti kiri pepe, mbi lingbi ti gue na da ti mo pepe; mbi na mo, e yeke te kobe pepe, mbi na mo, e yeke nyon ngu na ndo so pepe.

¹⁷Biani, *KOTA GBIA atene na mbi: ‘Fade mo te kobe pepe, mo nyon ngu na ndo ni kâ pepe. Na kiringo ti mo, lege so lani mo mu na guengo ni so, mo mu ni pepe.’ ”

¹⁸Wayanga-Nzapa ni atene na lo: “Mbi nga, mbi yeke wayanga-Nzapa tongana mo. Andaa mbeni *ange atene na mbi peko ti tënë ti yanga ti KOTA GBIA, atene: ‘Mu lo, mo ga na lo na da ti mo, lo te kobe, lo nyon ngu.’ ” Andaa mvene laa lo tene.

¹⁹Zo ti Nzapa na wayanga-Nzapa ni akiri; lo te kobe na da ti wayanga-Nzapa ni si lo nyon ngu.

²⁰So ala ngba ti te kobe, tënë ti *KOTA GBIA asi na mbakoro wayanga-Nzapa ti kodro ti Betel.

²¹Wayanga-Nzapa ni adekongo na zo ti Nzapa ni, atene: “Tënë so KOTA GBIA atene ayeke so: ‘Mo ke ti ma yanga ti KOTA GBIA awe; mo sara ye alingbi na yanga so KOTA GBIA, Nzapa ti mo amu na mo pepe.

²²Mo kiri na Betel ti te kobe, ti nyon ngu, ataa so KOTA GBIA ake tënë ni lani na mo. Ndali ti ye so mo sara so, fade mo yeke kui. Me a yeke lu mo pepe na ya ti du ti kuâ ti akotara ti mo.’ ”

²³So ala hunzi ti te kobe, ti nyon ngu awe, mbakoro wayanga-Nzapa ni aleke lele na zo ti Nzapa so, lele so lo ko lani na ndö ni ti kiri na Betel so.

²⁴Zo ti Nzapa ni ako na ndö ti lele ni si lo mu lege ti gue. Mbeni bamara awara lo na lege si afâ lo. Kuâ ti zo ti Nzapa ni alango na ndö ti lege; lele ni aluti na mbage ti lege si bamara ni aluti nga na mbeni mbage ni.

²⁵Ambeni zo ti lege abaa kuâ ti zo ti Nzapa so ayeke lango na ndö ti lege, bamara ayeke luti na tere ni. Azo ti lege ni ague, atene tënë ni na azo ti gbata so mbakoro wayanga-Nzapa ayeke lango daa.

²⁶Wayanga-Nzapa so lani amu zo ti Nzapa na Juda si akiri na lo na Betel, so lo ma tënë ni, lo tene: “Zo ti Nzapa so laa! Lo ke ti ma yanga ti KOTA GBIA, nilaa KOTA GBIA azia lo na maboko ti bamara; bamara ni agbu lo si afâ lo, alingbi na tënë so KOTA GBIA atene na lo.”

²⁷Na pekoni, lo tene na amolenge ti lo ti koli, lo tene: “Ala leke na mbi lele!” Ala leke lele ni.

²⁸Lo londo, lo gue, lo wara kuâ ti zo ti Nzapa so ayeke na ndö ti lege. Lele na bamara ayeke luti na tere ti kuâ ni. Bamara ni ate kuâ ni pepe, lo suru nga ya ti lele ni pepe.

²⁹Wayanga-Nzapa amu kuâ ti zo ti Nzapa ni azia na ndö ti lele ti lo si lo kiri na ni na Betel. Mbakoro wayanga-Nzapa ni akiri na Betel, lo toto kuâ ni si lo lu ni.

³⁰Lo lu kuâ ni na ya ti du ti kuâ so lo leke ndali ti lo wani. Azo ahe bia ti totongo kuâ so na ndö ti lo, atene: “Ae, ita ti mbi akui awe-oo! Ae, ita ti mbi akui awe-oo!”

³¹Na peko ti lungo kuâ ti zo ti Nzapa ni, wayanga-Nzapa atene na amolenge ti lo: “Tongana mbi kui ande, ayeke nzoni ala lu mbi na ya ti du ti kuâ so a lu zo ti Nzapa daa so. Fade ala zia abio ti mbi na tere ti abio ti lo.

³²Biani, tënë so lo tene so, KOTA GBIA laa azia na yanga ti lo si lo tene na tere ti gbalaka ti Betel nga na tere ti ada so kue a leke na ndö ti ahoto ti voro anzapa nde daa na ya ti agbata ti Samarii.”

³³Ataa so kue, Yeroboam azia ngbene lege ti sarango ye ti lo pepe. Lo ngba ti sara ngangu li. Lo ngba ti mu azo kirikiri na popo ti azo ti Israel ti zia ala tongana awayango-sandaga ti ando so a leke na ndö ti ahoto ti voro anzapa nde daa. Zo so kue aye ti ga wayango-sandaga, lo yeke mu lo wayango-sandaga ti ando so a leke na ndö ti ahoto ti voro anzapa nde daa.

³⁴Lege ti sarango ye so laa asara si azo ti sewa ti Yeroboam ati na ya ti siokpari. Ndali ni, a mingo azo ti sewa ni kue si mara ti ala ahunzi biani biani na ndö ti sese.