Read sango 1 Agbia 16 Bible Online

1 Agbia 16 - sango bible

1 Agbia 16

¹Tënë ti *KOTA GBIA asi na wayanga-Nzapa Yehu, molenge ti Hanani titene lo tene peko ni na ndö ti Basha; tënë ni ayeke so:

²“Ando mbi zi mo na ya ti fuku ti sese si mbi zia mo makonzi na ndö ti azo ti Israel, azo ti mbi. Me mo mu peko ti sioni sarango ye ti Yeroboam. Mo pusu azo ti Israel ti sara siokpari; siokpari ti ala ni asara si ngonzo ti mbi alondo.

³Ndani laa, fade mbi yeke zi Basha na azo ti sewa ti lo kue; mbi yeke sara na ala tongana ti so mbi sara na azo ti sewa ti Yeroboam, molenge ti Nebat.

⁴Zo ti sewa ti Basha so kue ayeke kui na ya ti gbata, fade ambo ayeke te kuâ ti lo. Zo so ayeke kui na ya ti ngonda, fade andeke ti nduzu ayeke te kuâ ti lo.”

⁵Tanga ti atënë na ndö ti Basha, aye so lo sara na akota ye so lo sara, a su tënë ni na ya ti “Mbeti ti aye so agbia ti Israel asara”.

⁶Basha akui, lo hon na peko ti ababâ ti lo si a lu lo na gbata ti Tirsa. Molenge ti lo Ela laa aga gbia na peko ti lo.

⁷Tënë ti KOTA GBIA so asi lani na wayanga-Nzapa Yehu, molenge ti Hanani si lo tene peko ni na ndö ti Basha na azo ti sewa ti lo so, nda ni ayeke use: Kozoni, Basha na azo ti sewa ti lo asara ye so ayeke sioni na le ti KOTA GBIA; ala zia ngonzo na be ti lo na lege ti asioni sarango ye ti ala. Ala sara sioni tongana ti so Yeroboam na azo ti sewa ti lo asara. Use ni, Basha afâ azo ti sewa ti Yeroboam kue.

⁸Na ngu baleuse na omene ni so Asa ayeke gbia ti Juda, Ela, molenge ti Basha aga gbia ti Israel. Lo le-gbia ngu use na Tirsa.

⁹Zimri, mbeni oko ti aturugu ti kota kamba ti lo ayeke makonzi ti ndambo ti aturugu so ayeke kpe na apusu ti mbarata ti gbia. Zimri aleke tënë na hondengo ni na tere ti Ela. Na ndembe ni so, Ela ayeke na Tirsa, na da ti Arsa, makonzi ti yangbo ti gbia, lo ngba ti nyon samba ahon ndoni.

¹⁰Zimri ali na ya ti da ni, lo pika Ela si lo fâ lo. Ye ni so asi na ngu baleuse na mbarambara ni so Asa ayeke gbia ti Juda. Zimri aga gbia na peko ti Ela.

¹¹Gi so lo ga gbia si lo ko na ndö ti mbata ti gbia awe, lo fâ azo ti sewa ti Basha kue. Lo fâ akoli kue, amolenge na akota zo. Ataa mbeni ita ti Basha wala mbeni kamarade ti lo angba pepe.

¹²Zimri afâ azo ti sewa ti Basha kue, lo hunzi ala, alingbi na tënë so KOTA GBIA atene lani na ndö ti Basha na lege ti wayanga-Nzapa Yehu.

¹³Aye so kue asi ndali ti siokpari so Basha na molenge ti lo Ela asara na lege ti vorongo afungo nzapa. Ala pusu azo ti Israel ti sara siokpari tongana ti so ala wani asara; ye so asara si ngonzo ti *KOTA GBIA, Nzapa ti Israel alondo.

¹⁴Tanga ti atënë na ndö ti Ela na aye so kue lo sara, a su tënë ni na ya ti “Mbeti ti aye so agbia ti Israel asara”.

¹⁵Na ngu baleuse na mbarambara ni so Asa ayeke gbia ti Juda, Zimri aga gbia ti Israel. Lo le-gbia lango mbarambara na Tirsa. Na ndembe ni so, aturugu ti Israel asara bâbâ ti ala na mbeni ndo so abaa le na gbata ti Gibeton so ayeke na gbe ti azo ti Filistii.

¹⁶So aturugu ni ama a tene, Zimri aleke tënë na hondengo ni na tere ti Ela si lo fâ lo, ala ngba kâ na ya ti bâbâ ni. Gi na oko lango ni so, ala ma tere si ala mu Omri, mbeni makonzi ti aturugu ti ga gbia ti Israel.

¹⁷Na pekoni, Omri na aturugu ti lo kue alondo na Gibeton, ala gue ti mu gbata ti Tirsa na bira.

¹⁸So Zimri abaa atene, ala mu gbata ni awe, lo li na ya ti mbeni da ti yangbo ti gbia ni; lo gbi da ni na li ti lo wani si lo kui.

¹⁹Aye so kue asi, ngbanga ti so Zimri asara siokpari; lo sara ye so ayeke sioni na le ti *KOTA GBIA; lo mu gi peko ti sioni sarango ye ti Yeroboam so apusu lani azo ti Israel ti sara siokpari so.

²⁰Tanga ti atënë na ndö ti Zimri na atënë so lo leke na hondengo ni na tere ti Ela, a su tënë ni na ya ti “Mbeti ti aye so agbia ti Israel asara”.

²¹Na peko ti kuâ ti Zimri, ya ti azo ti Israel akangbi use: ndambo ti azo ni amu peko ti Tibni, molenge ti Ginat; ala ye ti mu lo gbia. Mbeni ndambo ti azo ni amu peko ti Omri.

²²Azo so amu peko ti Omri, ngangu ti ala ahon ti azo so amu peko ti Tibni, molenge ti Ginat. Tibni akui si Omri aga gbia ti Israel.

²³Na ngu baleota na oko ni so Asa ayeke gbia ti Juda, Omri aga gbia ti Israel. Lo le-gbia ngu baleoko na use na Israel. Kozoni, lo le-gbia ngu omene na Tirsa.

²⁴Na pekoni, lo gue, lo vo mbeni ndo na li ti hoto ti Samarii na maboko ti Semer na le ti nginza saki omene. Kâ, lo sara mbeni gbata so lo di iri ni Samarii. Nda ti iri so aga na lege ti iri ti Semer so ayeke ngbene wa ti hoto ni.

²⁵Me Omri asara ye so ayeke sioni na le ti *KOTA GBIA; lo sara sioni mingi ahon agbia so kue ayeke kozoni na lo.

²⁶Lo mu peko ti asioni sarango ye kue ti Yeroboam, molenge ti Nebat. Yeroboam apusu lani azo ti Israel titene ala sara siokpari na lege ti vorongo afungo nzapa; ye so asara si ngonzo ti KOTA GBIA, Nzapa ti Israel alondo.

²⁷Tanga ti atënë na ndö ti Omri, aye so lo sara nga na akota ye so lo sara, a su tënë ni na ya ti “Mbeti ti aye so agbia ti Israel asara”.

²⁸Omri akui, lo hon na peko ti ababâ ti lo si a lu lo na Samarii. Molenge ti lo Akab laa aga gbia na peko ti lo.

²⁹Na ngu baleota na miombe ni so Asa ayeke gbia ti Juda, Akab, molenge ti Omri aga gbia ti Israel. Lo le-gbia ngu baleuse na use na Samarii.

³⁰Me Akab, molenge ti Omri asara ye so ayeke sioni na le ti *KOTA GBIA ahon agbia so kue ayeke kozoni na lo.

³¹Titene lo sara gi amara ti siokpari so Yeroboam, molenge ti Nebat asara, so alingbi na lo pepe. Na ndö ni, lo mu Yezabel ti ga wali ti lo; Yezabel ayeke molenge ti Etbaal, gbia ti azo ti mara ti Sidon. Akab ague ti sara na nzapa *Baal si lo kuku na gbe ti nzapa ni ti voro lo.

³²Na Samarii, lo sara mbeni da ndali ti Baal. Na ya ti da ni, lo leke mbeni gbalaka ti ya *asandaga na ndö ni.

³³Akab aleke mbeni keke so aluti na nduzu ndali ti nzapa-wali *Ashera. Ndali ti asioni ye so kue lo sara, lo zia ngonzo mingi na be ti KOTA GBIA, Nzapa ti Israel ahon agbia so kue ayeke kozoni na lo.

³⁴Na ngoi ni so laa Hiel, mbeni zo ti Betel, akiri aleke gbata ti Jéricho. Me na ndembe so Hiel ayeke zi du ti lu gere ti gbata ni, Abiram, kozo molenge ti lo ti koli akui. Na ndembe so lo yeke zia ayanga ti gbagba ti gbata ni daa, Segub, tanga ti molenge ti lo ti koli akui. Aye ni so asi alingbi na tënë ti KOTA GBIA so lo tene ando na lege ti Josué, molenge ti Nune.