Read sango 1 Agbia 17 Bible Online

1 Agbia 17 - sango bible

1 Agbia 17

¹Élie, zo ti kete kodro ti Tishebe, na sese ti Galaad atene na gbia Akab, atene: “*KOTA GBIA, Nzapa ti Israel ayeke na fini! Lo so mbi yeke sara na lo, mbi tene na mo: ‘Na ya ti angu so ayeke ga, ngu-Nzapa ayeke pika oko pepe, ataa ngu ti pere ayeke duti daa pepe, gi tongana mbi mu yanga si!’ ”

²Tënë ti *KOTA GBIA asi na Élie, atene:

³“Londo na ndo so, mo gue na mbage ti To, mo honde tere ti mo na tere ti ngu ti Kerit, na To ti ngu ti Jourdain.

⁴Fade mo yeke nyon ngu ti Kerit ni. Mbi mu yanga na *akpakpo titene ala gue na mo kobe ti tengo ni.”

⁵Élie ague si lo sara ye alingbi na tënë ti yanga ti KOTA GBIA. Lo gue, lo duti na yanga ti ngu ti Kerit, na To ti ngu ti Jourdain.

⁶Akpakpo ayeke gue na lo mapa na kasa na ndaperere, na lakui; lo yeke nyon ngu ti Kerit.

⁷Me lango mingi ahon so ngu-Nzapa apika na ya ti kodro ni pepe, asara si ngu ti Kerit ahole.

⁸Tongaso tënë ti *KOTA GBIA asi na Élie, atene:

⁹“Londo, mo gue na gbata ti Sarepta, nduru na Sidon. Fade mo yeke duti kâ. Mbi mu yanga na mbeni wali-mua titene lo mu na mo kobe.”

¹⁰Élie alondo ague na Sarepta. So lo si na yanga ti gbata ni, lo baa mbeni wali-mua so ayeke ro akeke ti wâ. Élie airi wali ni si atene na lo: “Mbi gbu gere ti mo, gue, mo to na mbi ngu kete, mbi nyon maa!”

¹¹Wali ni ague ti to ngu ni. Me Élie akiri airi lo si atene na lo: “Mbi gbu gere ti mo, mo ga nga na mbi mbeni nduru mapa, mbi te-oo!”

¹²Wali ni akiri tënë na lo: “KOTA GBIA, Nzapa ti mo ayeke na fini! Ataa kete nduru mapa, mbi yeke na ni pepe; ye so angba na mbi ayeke gi kete farini na ya ti ta na kete mafuta na ya ti ngbenda. Mbi ga ti ro anduru keke use; mbi yeke kiri na da ti leke ye so angba ndali ti mbi na molenge ti mbi ti koli. Na pekoni, e yeke kui.”

¹³Élie atene na lo: “Sara mbeto pepe! Gue, mo sara ye ni tongana ti so mo tene. Gi ye oko, ye so mo yeke na ni, mo leke mbeni kete makara, mo ga na ni na mbi kozoni si. Na pekoni, mo leke ti mo na ti molenge ti mo ti koli.

¹⁴Biani, tënë so KOTA GBIA, Nzapa ti Israel atene ayeke so: ‘Fade farini ayeke hunzi na ya ti ta ti mo pepe; mafuta ayeke hunzi nga na ya ti ngbenda ti mo pepe, ngbii asi na lango so KOTA GBIA ayeke sara titene ngu apika na ndö ti sese.’ ”

¹⁵Wali ni ague, asara ye tongana ti so Élie atene. Na ya ti lango mingi, lo na molenge ti lo nga na Élie, ala yeke na kobe ti tengo ni.

¹⁶Farini ahunzi na ya ti ta ni pepe, mafuta ahunzi nga na ya ti ngbenda ni pepe, alingbi na tënë so KOTA GBIA atene na lege ti Élie.

¹⁷Kete na pekoni, molenge ti wali-mua ni ati na kobela. Kobela ni asara lo ngangu si lo kui.

¹⁸Mama ti molenge ni atene na Élie: “Zo ti Nzapa, ti mo na mbi nyen? Mo ga na da ti mbi ti kiri ti fa na Nzapa peko ti asioni ye so mbi sara? Mo ga nga ti sara titene molenge ti mbi akui?”

¹⁹Élie akiri tënë na lo: “Mu na mbi molenge ti mo ni!” Lo mu molenge ni na maboko ti mama ti lo, lo gue na lo na ya ti kubu ti nduzu so lo yeke lango daa. Lo zia molenge ni na ndö ti gbogbo ti lo.

²⁰Na pekoni, lo sambela *KOTA GBIA, lo tene: “KOTA GBIA, Nzapa ti mbi, wali-mua so ayamba mbi na ya ti da ti lo so, mo ye biani ti sara sioni na lo na lege so mo sara si molenge ti lo akui?”

²¹Élie alango na ndö ti molenge ni fani ota; lo sambela KOTA GBIA, lo tene: “KOTA GBIA, Nzapa ti mbi, mbi voro mo, sara si yingo ti molenge so akiri daa!”

²²KOTA GBIA ama sambela ti Élie. Yingo ti molenge ni akiri daa si lo yeke na fini.

²³Élie amu molenge ni na ya ti kubu ti nduzu, lo zu na lo na gbeni. Lo mu molenge ni na mama ti lo si lo tene: “Baa, molenge ti mo ayeke na fini!”

²⁴Wali ni atene na Élie: “Biani, fadeso mbi hinga, mbi tene, mo yeke zo ti Nzapa; tënë ti KOTA GBIA so ayeke na yanga ti mo ayeke taa-tënë.”