Read sango 1 Agbia 18 Bible Online

1 Agbia 18 - sango bible

1 Agbia 18

¹Lango mingi ahon na pekoni, na ngu ota ni so ngu apika pepe, tënë ti *KOTA GBIA asi na Élie, atene: “Gue mo fa tere ti mo na gbia Akab; fade mbi yeke tokua ngu-Nzapa na ndö ti sese.”

²Élie ague titene lo fa tere ti lo na Akab. Na ngoi ni so, nzara ahon ndoni na gbata ti Samarii.

³Tongaso Akab airi Obadia, makonzi ti yangbo ti gbia. Obadia ayeke kpe mbeto ti KOTA GBIA mingi.

⁴Lani so Yezabel, wali ti gbia, afâ awayanga ti KOTA GBIA so, Obadia amu ambeni wayanga-Nzapa ngbangbo oko si lo honde ala. Lo mu ala baleoku, baleoku si lo honde ala na ya ti akota du ti têne use. Kâ, lo yeke mu na ala kobe na ngu.

⁵Akab atene na Obadia: “Ga, e fono na ya ti kodro ni, e baa ali ti ngu kue, e baa nga ando so kue ngu ayeke sua daa. E hinga pepe, fade e yeke wara pere ndali ti ambarata na *apâkârâ ti e, tongaso si e bata ala si e fâ ambeni nyama ni pepe.”

⁶Ala kangbi kodro ni na popo ti ala titene ala hon na ya ni. Akab ahon ti lo nde si Obadia ahon ti lo nde.

⁷So Obadia angba na lege ti gue, mo ye ti baa, lo tengbi tere na Élie. Obadia abaa lo si ahinga lo. Lo kuku, lo kpo li ti lo na sese na dawa ti Élie si lo tene: “Taa mo Élie, kota zo ti mbi laa?”

⁸Élie akiri tënë na lo: “So mbi laa! Gue mo tene na kota zo ti mo Akab, mo tene: ‘Élie ayeke ga!’ ”

⁹Obadia atene: “Siokpari ti nyen laa mbi sara si mo ye ti zia mbi, zo ti kua ti mo na maboko ti Akab titene lo fâ mbi so?

¹⁰KOTA GBIA, Nzapa ti mo ayeke na fini! Akab atokua azo na ya ti akodro ti amara kue nga na ya ti akodro-gbia kue titene azo agi mo aga na mo. Tongana mbeni zo atene: ‘Lo yeke na ya ti kodro ti e ge pepe’, lo yeke hunda na azo ti kodro ni ti deba yanga ti ala atene: ‘E wara mo pepe’.

¹¹Fadeso mo tokua mbi ti gue ti tene na kota zo ti mbi: ‘Élie ayeke ga!’

¹²Me gi so mbi yeke zia mo ti hon, fade yingo ti KOTA GBIA ayeke mu mo ti hon na mo na mbeni ndo so mbi hinga pepe. Ti mbi, mbi yeke gue ti tene tënë ni na Akab; tongana lo wara mo pepe, fade lo yeke fâ mbi. Andaa ti londo na ngoi so mbi de molenge ngbii asi laso, mbi zo ti kua ti mo, mbi yeke kpe mbeto ti KOTA GBIA mingi.

¹³Kota zo ti mbi, ye so mbi sara na ndembe so Yezabel ato nda ti fâ awayanga-Nzapa so, azo ade ti fa peko ni na mo pepe? Mbi mu lani ambeni wayanga-Nzapa ngbangbo oko si mbi honde ala. Mbi mu ala baleoku, baleoku si mbi honde ala na ya ti akota du ti têne use. Lakue, mbi yeke mu na ala kobe na ngu.

¹⁴Fadeso mo tokua mbi ti gue ti tene na kota zo ti mbi: ‘Élie ayeke ga!’ Fade lo yeke fâ mbi!”

¹⁵Me Élie akiri tënë na Obadia, atene: “KOTA GBIA ayeke na fini! Lo so lo yeke na ndö ti dunia kue, lo so mbi yeke sara na lo. Mbi deba yanga ti mbi, mbi tene: gi laso, laso, mbi yeke fa tere ti mbi na Akab.”

¹⁶Obadia ague, awara Akab si lo fa na lo peko ti ye so asi. Akab ague ti tengbi Élie na lege.

¹⁷Gi so Akab abaa Élie, lo tene na Élie: “Mo laa mo ga na kpale na ndö ti azo ti Israel so pepe?”

¹⁸Élie akiri tënë: “Mbi laa mbi ga na kpale na ndö ti Israel pepe; me mo na azo ti sewa ti mo. Biani, ala ke ti sara ye alingbi na andia ti *KOTA GBIA si ala gue ti voro anzapa *Baal.

¹⁹Fadeso, mo tokua titene azo ti Israel kue abongbi na tere ti mbi na ndö ti hoto ti Karmel. Mo tokua nga titene awayanga ti nzapa Baal so wungo ti ala ayeke ngbangbo osio na baleoku aga; awayanga ti nzapa-wali *Ashera so wungo ti ala ayeke ngbangbo osio aga, ala so ayeke te kobe lani na ndö ti meza ti Yezabel, wali ti gbia so.”

²⁰Akab atokua ti iri azo ti Israel kue si lo bongbi awayanga-Nzapa na ndö ti hoto ti Karmel.

²¹Élie ague nduru na azo ni kue si lo tene: “Lawa laa ala yeke zia ti gue mbage na mbage so? Tongana *KOTA GBIA laa ayeke Nzapa, ala mu peko ti lo. Tongana ayeke *Baal, ala mu peko ti lo.” Me mbeni zo na popo ti ala akiri tënë oko pepe.

²²Élie akiri atene: “Gi mbi oko, wayanga ti KOTA GBIA laa mbi ngba so. Awayanga ti nzapa Baal ayeke ngbangbo osio na baleoku!

²³Ala ga na e akoli-bagara use: awayanga ti nzapa Baal asoro ti ala bagara ni oko, ala doroko lo si ala zia lo na ndö ti keke ti wâ; me ala zia wâ daa pepe. Mbi nga, fade mbi yeke sara gi mara ti ye so na use bagara ni. Mbi yeke zia lo na ndö ti keke ti wâ; me mbi yeke zia wâ daa pepe.

²⁴Na pekoni, fade ala sambela nzapa ti ala; mbi nga, mbi sambela KOTA GBIA. Nzapa so ayeke kiri tënë na lege ti wâ, lo laa lo yeke taa Nzapa.” Azo ni kue atene: “So nzoni!”

²⁵Tongaso Élie atene na awayanga ti nzapa Baal: “Ala soro koli-bagara ni oko, ala leke lo kozoni, ngbanga ti so ala laa ayeke mingi. Na pekoni, ala sambela nzapa ti ala, me ala zia wâ daa pepe.”

²⁶Awayanga ti nzapa Baal amu bagara so a mu na ala si ala leke lo ti mu na *sandaga. Na pekoni, ala sambela Baal, ti londo na ndaperere ngbii asi na bekombite, ala tene: “Baal, mo kiri tënë na e!” Me ala ma mbeni go oko pepe, zo oko akiri tënë na ala pepe. Ala yeke dodo na tere ti gbalaka so ala leke so.

²⁷Tongaso na bekombite, Élie ahe ala na ngia, lo tene: “Ala kiri adekongo ngangu si! Nzapa laa. Lo ngba ti gbu li ti lo na ndö ti ambeni kua! E hinga pepe, lo yeke daa pepe, lo gue na tambula na mbeni yongoro ndo, wala lo ngba ti lango; ayeke nzoni ala zingo lo!”

²⁸Awayanga ti nzapa ni adekongo ngangu. Na lege ti sarango ye ti ala, ala mu ayongoro zeme na alikongo, ala suru tere ti ala na ka kirikiri, ngbii mene ayuru na tere ti ala.

²⁹So bekombite ahon awe, ala to nda ti sara ye tongana azo so mbeni yingo agbu ala. Ala sara ye ni ngbii asi na ngbonga ti mungo sandaga. Me ala ma mbeni go oko pepe, zo akiri tënë na ala pepe, ye oko asara nga pepe.

³⁰Tongaso Élie atene na azo ni kue, atene: “Ala ga nduru na tere ti mbi ge!” Azo ni kue aga nduru na tere ti lo. Lo kiri lo leke gbalaka ti KOTA GBIA so azo akungbi lani na sese.

³¹Lo mu têne baleoko na use alingbi na wungo ti amara baleoko na use ti Jacob. Ando tënë ti KOTA GBIA asi na Jacob, atene: “Fade iri ti mo ayeke duti Israel.”

³²Élie amu atêne so, lo kiri lo leke na mbeni gbalaka na iri ti KOTA GBIA. Lo zi du angoro tere ti gbalaka ni kue; du ni alingbi ti mu litere ti ngu nduru na baleota.

³³Lo leke akeke ti wâ ni na ndö ti gbalaka ni. Lo doroko koli-bagara ni si lo zia na ndö ti akeke ti wâ ni.

³⁴Na pekoni, lo mu yanga na azo so ayeke na ndo so, lo tene: “Ala to ngu na ya ti ta osio asi, ala tuku na ndö ti kasa ti sandaga ni nga na ndö ti akeke ti wâ ni.” Azo ni asara ye gi na peko ti yanga ti lo. Lo kiri lo tene: “Ala sara ti fani use ni!” Ala sara ni. Lo kiri lo tene: “Ala sara ti fani ota ni!” Ala sara nga ni.

³⁵Ngu ni asua na tere ti gbalaka ni kue, asi ya ti du ni kue.

³⁶Na ngbonga ti mungo sandaga ti peko ti bekombite, wayanga-Nzapa Élie aga nduru na tere ti gbalaka ni si lo tene: “KOTA GBIA, Nzapa ti Abraham, ti Isaac na ti Jacob, ayeke nzoni mo fa na azo laso, mo tene, mo laa mo yeke Nzapa na sese ti Israel. Mbi yeke zo ti kua ti mo si mbi sara aye so kue gi na lege ti tënë ti mo.

³⁷Kiri tënë na mbi, KOTA GBIA! Kiri tënë na mbi maa! Tongaso si azo so ahinga atene, mo KOTA GBIA laa mo yeke taa Nzapa. Mo laa mo yeke kiri be ti azo ti mo na mbage ti mo.”

³⁸Tongaso wâ ti KOTA GBIA alondo na nduzu ati; wâ ni agbi sandaga ni, akeke ni, atêne ni na fuku ti sese ni. Wâ ni asara si ngu so ayeke na ya ti du ni ahole.

³⁹So azo ti Israel abaa ye ni so, ala ti akpo li ti ala na sese si ala tene: “KOTA GBIA laa ayeke taa Nzapa! KOTA GBIA ayeke taa Nzapa!”

⁴⁰Élie atene na ala: “Ala gbu awayanga ti nzapa Baal! Mbeni zo oko na popo ti ala akpe pepe!” Azo agbu awayanga ti Baal ni kue. Élie amu ala, ague na ala na yanga ti ngu ti Kishon si lo fâ go ti ala.

⁴¹Élie atene na Akab: “Gue mo te, mo nyon! Biani, mbi ma toto ti ngu-Nzapa.”

⁴²Akab ague ti te, ti nyon. Ti Élie, lo gue na li ti hoto ti Karmel. Kâ, lo kuku, lo kpo li ti lo na sese, li ti lo na popo ti alikunu ti lo.

⁴³Na pekoni, lo tene na zo ti kua ti lo: “Gue, mo baa ndo na mbage ti kota ngu-ingo kâ.” Zo ti kua ni ague, lo baa ndo si lo tene: “Ye oko ayeke daa pepe.” Fani mbarambara, Élie atene na lo: “Kiri kâ!”

⁴⁴Ti fani mbarambara ni, zo ti kua ni atene: “Mbi baa mbeni kete mbinda so ayeke londo na mbage ti kota ngu-ingo kâ. Mbinda ni akono tongana maboko ti zo so lo kanga ni kango.” Élie atene: “Gue, mo tene na Akab, mo tene: ‘Mo leke pusu ti mbarata ti mo, mo kiri na kodro si ngu-Nzapa akanga lege na mo pepe.’ ”

⁴⁵Le ti nduzu ato nda ti vuko vukongo ti gue na ni ndali ti mbinda so pupu ayeke ga na ni. Ngu-Nzapa ato nda ti pika ngangu. Akab ako na ndö ti pusu ti mbarata ti lo si lo gue na Yizreel.

⁴⁶KOTA GBIA asara si Élie asi singo na ngangu. Tongaso lo kanga abongo ti lo si lo londo ti gue. Lo yeke kpe loro na dawa ti pusu ti mbarata ti Akab ngbii lo si na yanga ti gbata ti Yizreel.