Read sango 1 Agbia 20 Bible Online

1 Agbia 20 - sango bible

1 Agbia 20

¹Ben-Hadad, gbia ti Sirii abongbi aturugu ti lo kue: agbia baleota na use ayeda ti mu maboko na lo; lo yeke na ambarata na apusu ti mbarata. Lo gue, lo ngoro gbata ti Samarii na bira si lo sara bira na gbata ni.

²Lo tokua azo na ya ti gbata ni ti tene na Akab, gbia ti Israel, atene:

³“Tënë so Ben-Hadad atene ayeke so: ‘Tokua na mbi wen ti nginza ti mo na lôro ti mo; tokua nga na mbi awali ti mo na amolenge ti mo ti koli so apendere mingi!’ ”

⁴Gbia ti Israel akiri tënë na lo: “Gbia ti mbi, tongana ti so mo tene, mbi yeke zo ti mo; aye ti mbi kue ayeke nga ti mo.”

⁵Azo ti tokua ti Ben-Hadad akiri aga ti fani use ni si ala tene na Akab: “Tënë so Ben-Hadad atene ayeke so: ‘Mbi tokua na mo titene mo mu na mbi wen ti nginza ti mo na lôro ti mo, awali ti mo na amolenge ti mo ti koli.

⁶Biani kekereke, gi na oko ngbonga so, fade azo ti kua ti mbi ayeke gue ti gi ya ti yangbo ti mo, ti gi nga ya ti ada ti agbenyogbia ti mo. Tongaso aye so kue mo baa ane na le ti mo, fade ala yeke zia maboko na ndö ni si ala yeke mu ti gue na ni.’ ”

⁷Tongaso gbia ti Israel airi *akangba kue ti kodro ni si lo tene na ala: “Ala wani abaa na le ti ala! Koli so aye gi sioni ti e! So lo hunda na mbi awali ti mbi, amolenge ti mbi ti koli, wen ti nginza ti mbi, na lôro ti mbi so, mbi gbanzi ye oko na lo pepe!”

⁸Akangba ni kue na azo ti kodro ni kue atene na lo: “Mo ma lo pepe, mo yeda nga pepe!”

⁹Akab atene na azo ti tokua ti Ben-Hadad: “Ala gue, atene na gbia ti mbi, atene: ‘Ye so kue mo hunda na mbi kozoni so, mbi yeke fade nduru ti sara ni; me ti so mo kiri mo hunda na mbi so, mbi lingbi ti ye gbe ni na mo pepe.’ ” Azo ti tokua ni akiri atene peko ti tënë ni na Ben-Hadad.

¹⁰Ben-Hadad akiri atokua azo na Akab ti tene na lo: “Fade mbi yeke nika gbata ti Samarii biani biani! Mbeni kete fuku ti sese ayeke ngba na ya ti gbata ni pepe titene aturugu ti mbi kue afu ni na ya ti maboko ti ala! Tongana mbi nika gbata ni pepe, ayeke nzoni anzapa asara ye ti ngangu mingi na mbi!”

¹¹Gbia ti Israel akiri tënë, atene: “Ala dabe ti Ben-Hadad na *mato so: ‘Zo so ade ti so benda na ya ti bira pepe, lo lingbi ti pika kate ti lo pepe!’ ”

¹²Andaa na ndembe ni so, Ben-Hadad na amba ti lo agbia angba ti nyon na ya ti ada ti bongo. So lo ma tënë so, lo mu yanga na aturugu ti lo ti kota kamba, lo tene: “Ala leke tere ti ala ti gue na bira!” Tongaso ala leke tere ti ala ndali ti bira.

¹³Tongaso mbeni wayanga-Nzapa aga abaa Akab, gbia ti Israel si atene na lo: “Tënë so *KOTA GBIA atene ayeke so: ‘Mo baa gba ti aturugu so? Gi laso laso, mbi yeke zia ala na maboko ti mo, tongaso si mo hinga, mo tene, mbi laa mbi yeke KOTA GBIA.’ ”

¹⁴Akab ahunda ndo, atene: “Zo wa laa ayeke sara ande titene aturugu ni ati na maboko ti mbi?” Wayanga-Nzapa ni akiri tënë, atene: “Tënë so KOTA GBIA atene ayeke so: ‘Mbi yeke zia ala na maboko ti mo na lege ti afini turugu so agovoronere ti akodro-sese amu ala na kua.’ ” Akab akiri ahunda ndo, atene: “Zo wa laa ayeke mu ande li ti bira ni, zo wa?” Wayanga-Nzapa ni atene: “Mo!”

¹⁵Akab atambula ti baa afini turugu so agovoronere ti akodro-sese amu ala na kua so: ala kue ayeke ngbangbo use na baleota na use. Na pekoni, lo tambula ti baa aturugu ti Israel; ala kue ayeke saki mbarambara.

¹⁶Na bekombite, aturugu ni alondo na bira. Na ndembe ni so, Ben-Hadad angba ti nyon samba ahon ndoni na ya ti ada ti bongo, lo na agbia baleota na use, ala so aga ti mu maboko na lo.

¹⁷Afini turugu so agovoronere amu ala na kua amu li ti bira ni. Ben-Hadad atokua ambeni zo ti baa ye so asi. Azo ni aga atene na lo: “Ambeni zo asigigi na ya ti gbata ti Samarii.”

¹⁸Ben-Hadad atene: “Tongana ala ga na tënë ti siriri, ala gbu ala, aga na ala na fini le ti ala! Tongana ala ga na tënë ti bira, ala gbu nga ala, aga na ala na fini le ti ala!”

¹⁹Azo so asigigi na ya ti gbata ni ayeke afini turugu so agovoronere ti akodro-sese amu ala na kua; aturugu ti Israel amu peko ti ala.

²⁰Turugu oko oko kue afâ wato oko. Tongaso azo ti Sirii akpe si azo ti Israel atumba peko ti ala. Ti Ben-Hadad, gbia ti Sirii, lo ko na ndö ti mbeni mbarata si lo kpe, lo na ambeni zo ti kpengo na ambarata.

²¹Na pekoni, gbia ti Israel asigigi ti gue na bira. Lo fâ ambarata, lo buba apusu ti mbarata si lo nika azo ti Sirii nikango.

²²Wayanga-Nzapa aga abaa gbia ti Israel si atene na lo: “Gbu ngangu! Gbu li ti mo mbirimbiri na ndö ti ye so mo lingbi ti sarango ni, ngbanga ti so na ngu ti peko, gbia ti Sirii ayeke kiri ti ga ti tiri bira na mo.”

²³Azo so angoro gbia ti Sirii atene na lo: “Nzapa ti azo ti Israel ayeke Nzapa ti ahoto. Ndani laa ala yeke ngangu ahon e so; me tongana e tiri bira na ala na kpangbara sese, gbaa, fade ngangu ti e ayeke hon ti ala.

²⁴Gbia, baa ye so mo lingbi ti sara ni ayeke so: agbia so aye lani ti mu maboko na mo so, mo zi ala kue na ndö ti mbata, mo zia agovoronere ti sara kua na plase ti ala.

²⁵Ti mo, mo mu gba ti azo na kua ti turugu, wungo ti ala alingbi na ti ala so akui na ya ti bira so; wungo ti ambarata na ti apusu ti ambarata alingbi na wungo ti ambarata na ti apusu ti ambarata tongana ti kozoni. Na pekoni, e yeke gue ti tiri bira na azo ti Israel na kpangbara sese. Gbaa, fade ngangu ti e ayeke hon ti ala.” Ben-Hadad ayeda ti ma wango ti ala.

²⁶Na ngu ti peko, Ben-Hadad atambula ti baa aturugu ti Sirii oko oko kue. Na pekoni, lo gue na aturugu ni ngbii asi na gbata ti Afek titene ala tiri bira na azo ti Israel.

²⁷Akab nga atambula ti baa aturugu ti Israel oko oko kue. Na peko ti so a mu na ala kobe ti tengo ni awe, ala gue ti tengbi na aturugu ti Sirii. Aturugu ti Israel asara bâbâ ti ala le na le na ti aturugu ti Sirii. A kangbi ya ti aturugu ti Israel use si abongbi ni akpa akete bongbi ti angasa. Me ti aturugu ti Sirii, ala mu ya ti kodro ni kue.

²⁸Wayanga-Nzapa akiri aga abaa Akab, gbia ti Israel, lo tene: “Tënë so KOTA GBIA atene ayeke so: ‘Ndali ti so azo ti Sirii atene mbi KOTA GBIA, mbi yeke Nzapa ti ahoto, me Nzapa ti kpangbara sese pepe, fade mbi yeke zia gba ti azo so na maboko ti mo. Tongaso si ala azo ti Israel, ala hinga atene, mbi yeke KOTA GBIA.’ ”

²⁹Na ya ti lango mbarambara, bâbâ ti aturugu ti akodro use so angba ti baa ndo le na le. Na lango mbarambara ni, bira alondo. Na ya ti lango oko, aturugu ti Israel afâ aturugu saki ngbangbo oko ti Sirii so ayeke tambula na gere.

³⁰Atanga ni saki baleuse na mbarambara akpe ague na gbata ti Afek; me gbagba ti gbata ni akungbi ati na ndö ti ala. Ben-Hadad nga awara lege ti kpe. Lo gue, lo honde tere ti lo na ya ti gbata ni, na ya ti mbeni kubu ti da so ali mingi.

³¹Azo so angoro lo atene na lo: “Baa, e ma a tene, agbia ti Israel ayeke baa ka mawa ti azo mingi. E yeke yu bongo ti mua, e yeke zia kamba na go ti e si e yeke gue ti baa gbia ti Israel. E hinga pepe, fade lo yeke zia mo ti ngba na fini.”

³²Tongaso ala yu bongo ti mua, ala zia kamba na go ti ala si ala gue na ndo ti gbia Akab si ala tene na lo: “Gbia, ngbaa ti mo Ben-Hadad avoro tere ti lo na mo titene mo zia lo ngba na fini.” Akab atene: “Lo ngba na fini? So ita ti mbi laa!”

³³So azo ti tokua ti Ben-Hadad ama tënë so, ala baa atene, ye ato nda ti ga nzoni awe. Tongaso ala tene hio na gbia Akab, atene: “Ben-Hadad ayeke biani ita ti mo!” Akab atene: “Ala gue, aga na lo!” Ben-Hadad asigigi, ague, atengbi na Akab. Akab asara si lo ko na ya ti pusu ti mbarata ti lo.

³⁴Ben-Hadad atene na Akab: “Agbata so babâ ti mbi amu ando na maboko ti babâ ti mo so, mbi kiri ni na mo. Mo lingbi ti sara ando ti dengo buze ti mo na ya ti gbata ti Damas tongana ti so babâ ti mbi asara ando na gbata ti Samarii.” Akab atene: “Ti mbi, mbi yeke zia lege na mo ti gue tongana mbi na mo, e ga *ambuki si.” Tongaso Ben-Hadad na Akab aga ambuki. Na pekoni, Akab amu lege na lo ti gue.

³⁵Na ndembe ni so, *KOTA GBIA amu yanga na mbeni wayanga-Nzapa ti bongbi ti awayanga-Nzapa ti tene na mbeni mba ti lo, atene: “Mbi gbu gere ti mo, pika mbi!” Me mba ti lo ni ake.

³⁶Wayanga-Nzapa ti kozoni so atene na mba ti lo ni, atene: “So mo ke yanga ti KOTA GBIA so, gi so mo yeke zia ande mbi ti gue, fade bamara ayeke fâ mo.” So wayanga-Nzapa ni alondo ti gue, lo tengbi na mbeni bamara si bamara ni afâ lo.

³⁷Kozo wayanga-Nzapa ni ague, awara mbeni koli si atene na lo: “Mbi gbu gere ti mo, mo pika mbi!” Koli ni apika lo si azia ka na tere ti lo.

³⁸Wayanga-Nzapa ni akanga le ti lo na bongo titene azo ahinga lo pepe. Lo gue, lo luti na yanga ti lege ti ku hongo ti gbia Akab.

³⁹So Akab aga ti hon, wayanga-Nzapa ni adekongo na lo, atene: “Gbia! Mbi zo ti kua ti mo, mbi yeke taa na ya ti bira. So bira ni angba ti kporo, mbeni zo so asigigi na ya ti bira ni aga azia na maboko ti mbi mbeni zo ti kanga; zo ni atene: ‘Mo bata na mbi koli so nzoni! Tongana lo kpe, fade mo laa, mo yeke wara kuâ na peko ti lo, wala mo yeke futa ale ti nginza saki ota.’

⁴⁰So kua agbu le ti mbi mbage na mbage, zo ti kanga ni akpe!” Gbia ti Israel atene na lo: “Mo wani, mo fâ ngbanga ti mo awe!”

⁴¹Hio tongaso, wayanga-Nzapa ni azi bongo so lo kanga le ti lo. Gbia abaa lo si ahinga atene, so mbeni wayanga-Nzapa ti bongbi ti awayanga-Nzapa laa.

⁴²Tongaso wayanga-Nzapa ni atene na lo: “Tënë so KOTA GBIA atene ayeke so: ‘Lani, mbi zia koli so titene a fâ lo; me mo zi maboko na tere ti lo si lo kpe, lo hon. Fadeso, mo laa mo yeke wara kuâ na peko ti lo si azo ti kodro ti mo ayeke wara nga kuâ na peko ti azo ti kodro ti lo.’ ”

⁴³Gbia ti Israel akiri na ndo ti lo na Samarii, na sukungo ngbangba nga na ngonzo.