Read sango 1 Agbia 21 Bible Online

1 Agbia 21 - sango bible

1 Agbia 21

¹Na peko ti aye so, mbeni ye so akiri asi ayeke so: Nabot, zo ti gbata ti Yizreel ayeke na mbeni yaka ti vinye na gbata ti Yizreel. Yaka ni ayeke nduru na tere ti yangbo ti gbia Akab, gbia ti Samarii.

²Mbeni lâ, Akab atene na Nabot: “Mu na mbi yaka ti vinye ti mo so titene mbi lu akugbe ti kasa daa, ngbanga ti so yaka ni ayeke gi nduru na yangbo ti mbi. Fade mbi yeke mu na mo pendere yaka ti vinye nde ahon ti so. Wala tongana mo ye, fade mbi mu na mo nginza alingbi na ngere ti yaka ni.”

³Me Nabot akiri tënë na Akab, atene: “Na le ti *KOTA GBIA, yaka so akotara ti mbi azia na mbi si aga ti mbi so, mbi lingbi ti mu na mo tongana nyen?”

⁴Akab akiri na da, na sukungo ngbangba nga na ngonzo, ngbanga ti tënë so Nabot, zo ti gbata ti Yizreel atene na lo so: “Yaka ti *vinye so akotara ti mbi azia na mbi si aga ti mbi so, fade mbi yeke mu ni na mo pepe.” Lo gue, lo lango na ndö ti gbogbo ti lo, lo zia le ti lo na mbage ti dere ti da si lo ke ti te kobe.

⁵Wali ti lo Yezabel aga na tere ti lo, lo hunda lo, lo tene: “Mo yeke suku ngbangba sukungo ngbanga ti nyen? Mo ke ti te kobe ngbanga ti nyen?”

⁶Akab akiri tënë na lo, atene: “Mbi tene na Nabot, zo ti gbata ti Yizreel, mbi tene: ‘Mu na mbi yaka ti vinye ti mo titene mbi vo ni, wala tongana mo ye, mbi mu na mo mbeni yaka ti vinye nde.’ Me lo kiri tënë na mbi, lo tene: ‘Mbi yeke mu na mo yaka ti vinye ti mbi pepe.’ ”

⁷Wali ti lo Yezabel atene na lo: “Mo laa mo yeke gbia ti kodro ti Israel pepe? Londo! Te ye, mo sara ngia! Mbi Yezabel laa, mbi yeke mu ande na mo yaka ti vinye ti Nabot, zo ti gbata ti Yizreel so.”

⁸Yezabel asara ambeti na iri ti Akab, lo kpo *nzoroko ti gbia na ndö ni si lo tokua ambeti ni na *akangba nga na akota zo ti gbata so Nabot ayeke lango daa.

⁹Tënë ti ya ti ambeti ni ayeke so: “Ala bongbi azo ti gbata ni titene ala ke kobe ti sambela. Ala mu Nabot, ala zia lo titene lo duti na li ni na ya ti bongbi ni.

¹⁰Ala zia agodobe use na dawa ti Nabot titene ala bi tënë na li ti lo, atene: ‘Mo zonga Nzapa, mo zonga nga gbia ti kodro!’ Na pekoni, fade ala sigigi na lo na ya ti gbata ni, ala bo lo na têne titene lo kui!”

¹¹Akangba na akota zo ti gbata ti Yizreel asara ye alingbi gi na yanga so Yezabel amu na ala na ya ti ambeti so lo tokua na ala so.

¹²Ala to mbela na ya ti gbata ni titene azo ake kobe ti sambela. Ala zia Nabot aduti na li ni na ya ti bongbi ni.

¹³Agodobe use aga aduti na dawa ti Nabot si ala to nda ti bi tënë na li ti lo na le ti azo kue, ala tene: “Nabot azonga Nzapa, lo zonga nga gbia ti kodro!” Tongaso ala mu Nabot, asigigi na lo na ya ti gbata ni, ala bo lo na têne si lo kui.

¹⁴Na pekoni, akota zo ti gbata ni atokua azo na Yezabel ti tene na lo: “Azo abo Nabot na têne, lo kui awe.”

¹⁵So Yezabel ama a tene, Nabot akui awe, lo tene na Akab: “Nabot, zo ti gbata Yizreel ayeke na fini mbeni pepe, lo kui awe. Fadeso mo gue, mo mu yaka ti vinye so lo ke lani ti ka ni na mo so.”

¹⁶So Akab ama a tene, Nabot akui awe, lo londo lo gue na yaka ti vinye ti Nabot, zo ti gbata ti Yizreel titene lo mu ni si aga ti lo.

¹⁷Tënë ti *KOTA GBIA asi na Élie, zo ti gbata ti Tishebe, atene:

¹⁸“Londo, mo gue, mo wara Akab, gbia ti Israel so ayeke lango na Samarii. Na ndembe so, lo yeke na ya ti yaka ti *vinye ti Nabot; lo gue kâ ti mu yaka ni titene aga ti lo.

¹⁹Fade mo tene na lo: ‘Tënë so KOTA GBIA atene ayeke so: Mo fâ zo awe! Fadeso, mo ga ti mu ye ti lo titene aga ti mo?’ Fade mo yeke kiri ti tene na lo: Tënë so KOTA GBIA atene ayeke so: ‘Na ndo so ambo asu mene ti Nabot daa, fade ambo ayeke su nga mene ti mo gi na oko ndo ni so!’ ”

²⁰Élie ague, atene peko ti tënë ni na Akab si Akab atene na Élie: “Ae, wato ti mbi, mo kiri mo wara mbi awe!” Élie akiri tënë: “Taa-tënë, mbi kiri mbi wara mo, ngbanga ti so mo ka tere ti mo ti sara ye so ayeke sioni na le ti KOTA GBIA.

²¹Ndani laa KOTA GBIA atene: ‘Fade mbi yeke sara titene mbeni ye ti mawa aga na ndö ti mo; mbi yeke balee azo ti sewa ti mo, mbi yeke zi akoli so kue ayeke na ndo ti mo, ataa angbaa wala ala so ayeke angbaa pepe.

²²Mbi yeke sara na azo ti sewa ti mo gi mara ti ye so mbi sara na azo ti sewa ti Yeroboam, molenge ti Nebat nga na azo ti sewa ti Basha, molenge ti Ahia. Biani, mo sara si ngonzo alondo na be ti mbi; mo sara nga si azo ti Israel asara siokpari.’

²³Âdu ti Yezabel, tënë so KOTA GBIA atene na tere ti lo ayeke so: ‘Fade ambo ayeke te kuâ ti Yezabel nduru na gbagba ti bira ti gbata ti Yizreel.’

²⁴Ti gbia Akab, zo ti sewa ti lo so kue ayeke kui na ya ti gbata ni, ambo ayeke te kuâ ti lo. Zo ti sewa ti lo so kue ayeke kui na ya ti ngonda, andeke ti nduzu ayeke te kuâ ti lo.”

²⁵Mbeni zo ti ka tere ti lo ti sara sioni na le ti KOTA GBIA tongana Akab ayeke daa laoko pepe. Biani, wali ti lo Yezabel laa ayeke pusu lo ti sara sioni.

²⁶Mara ti asioni ye so lo sara so, zo alingbi ti baa na le ti lo fani use pepe: lo mu peko ti anzapa nde ti voro ala gi tongana ti so azo ti mara ti Amori asara ando, azo so KOTA GBIA atumba ala si lo mu ndo ti ala na azo ti Israel.

²⁷So Akab ama atënë so Élie atene, lo suru bongo na tere ti lo, lo yu bongo ti mua si lo ke kobe ti sambela. Na bi, lo yeke lango na bongo ti mua ni na tere ti lo si lo yeke tambula gi yeke-yeke.

²⁸Tongaso tënë ti *KOTA GBIA asi na Élie, zo ti gbata ti Tishebe, atene:

²⁹“Mo baa lege so Akab asara tere ti lo kete na dawa ti mbi so? Ndali ti so lo sara tere ti lo kete na dawa ti mbi, fade mbi yeke tokua ye ti mawa na ndö ti azo ti sewa ti lo pepe, na ndembe so lo de na fini. Fade mbi yeke tokua ni na ndembe so molenge ti lo ayeke duti gbia.”