Read sango 1 Agbia 22 Bible Online

1 Agbia 22 - sango bible

1 Agbia 22

¹Na ya ti ngu use, bira ayeke na popo ti azo ti Sirii na azo ti Israel pepe.

²Na ngu ota ni, Yosafat, gbia ti Juda aga abaa Akab, gbia ti Israel.

³Andaa gbia Akab atene na akota zo so angoro lo, atene: “Ala hinga kue atene, gbata ti Ramot, na sese ti Galaad ayeke ti e. E yeke ku nyen ti gue ti kiri ti mu ni na maboko ti gbia ti Sirii?”

⁴Lo hunda Yosafat, lo tene: “Mo ye titene mbi na mo, e gue, e tiri bira ti mu Ramot, na sese ti Galaad?” Yosafat akiri tënë na gbia ti Israel, atene: “Mbi na mo, e yeke gi oko, aturugu ti mo na aturugu ti mbi ayeke gi oko, ambarata ti mbi na ambarata ti mo ayeke gi oko.”

⁵Yosafat akiri atene na gbia ti Israel: “Ayeke nzoni mo hunda *KOTA GBIA kozoni si!”

⁶Tongaso gbia ti Israel abongbi awayanga-nzapa nduru na ngbangbo osio si lo hunda ala, lo tene: “Alingbi mbi gue, mbi tiri bira na Ramot, na sese ti Galaad wala mbi zia lege ni?” Ala kiri tënë na lo, atene: “Mo lingbi ti gue senge! Fade Kota Gbia ayeke zia gbata ni na maboko ti mo, gbia.”

⁷Me Yosafat ahunda ndo, atene: “Mbeni zo oko ti tenengo peko ti yanga ti KOTA GBIA ayeke ge pepe titene e hunda KOTA GBIA na lege ti lo?”

⁸Gbia ti Israel akiri tënë na Yosafat, atene: “Mbeni zo oko ayeke daa so e lingbi ti hunda KOTA GBIA na lege ti lo; zo ni ayeke Mishe, molenge ti Imla. Me be ti mbi ake lo mingi, ngbanga ti so lo yeke tene na mbi peko ti tënë ti yanga ti Nzapa nzoni laoko pepe, me lakue gi sioni tënë.” Yosafat atene: “Ayeke nzoni gbia atene tënë tongaso pepe!”

⁹Tongaso gbia ti Israel airi mbeni kota zo ti yangbo ti lo si atene lo: “Gue hio, mo ga na Mishe, molenge ti Imla.”

¹⁰Gbia ti Israel na Yosafat, gbia ti Juda, ayu bongo ti ala ti gbia si zo oko oko aduti na ndö ti mbata ti lo na kota le ti kodro so ayeke nduru na yanga ti gbata ti Samarii. Awayanga-nzapa kue ayeke sara kua ti ala na dawa ti ala.

¹¹Na popo ti awayanga-nzapa ni, Sidekia, molenge ti Kenaana ayeke daa; lo mu wen, lo leke na adidi si lo tene: “Tënë so KOTA GBIA atene ayeke so: ‘Na adidi so, fade mo yeke fâ azo ti Sirii ngbii mo hunzi ala kue.’ ”

¹²Awayanga-nzapa kue atene gi oko tënë so; ala tene: “Mo gue, mo tiri bira na Ramot, na sese ti Galaad; fade mo yeke so benda! Fade KOTA GBIA ayeke zia gbata ni na maboko ti mo.”

¹³Watokua so ague ti iri Mishe so atene na lo: “Baa, awayanga-nzapa kue, tënë ti yanga ti ala ague gi oko: ala tene nzoni tënë na gbia. Mo nga, mo sara si tënë ti mo ague oko na ti ala: mo tene nzoni tënë na lo!”

¹⁴Mishe akiri tënë, atene: “*KOTA GBIA ayeke na fini! Tënë so KOTA GBIA ayeke tene na mbi, gi ni laa mbi yeke tene ande!”

¹⁵Mishe aga na dawa ti gbia si gbia ahunda lo, atene: “Mishe, alingbi e gue, e tiri bira na gbata ti Ramot, na sese ti Galaad wala e zia lege ni?” Mishe akiri tënë na lo, atene: “Mo gue senge! Fade mo yeke so benda! Fade KOTA GBIA ayeke zia ni na maboko ti gbia.”

¹⁶Me gbia atene na lo: “Fani oke laa mbi lingbi ti hunda na mo titene mo deba yanga ti mo ti tene na mbi gi taa-tënë na iri ti KOTA GBIA?”

¹⁷Tongaso Mishe atene: “Mbi baa azo ti Israel kue akangbi kirikiri na ndö ti ahoto, tongana ataba so zo ti batango ala ayeke daa pepe. KOTA GBIA atene: ‘Makonzi ti azo so ayeke daa oko pepe. Ayeke nzoni zo oko oko akiri na ndo ti lo na siriri.’ ”

¹⁸Gbia ti Israel atene na Yosafat: “Mbi tene fade na mo pepe? Lo yeke tene na mbi peko ti tënë ti yanga ti Nzapa nzoni pepe; me gi sioni tënë.”

¹⁹Mishe atene: “Mo ma tënë so KOTA GBIA atene! Mbi baa KOTA GBIA aduti na ndö ti mbata ti lo ti gbia; ala so kue ayeke na yayu aluti na tere ti lo, ambeni na mbage ti maboko ti lo ti koli, ambeni na mbage ti maboko ti lo ti wali.

²⁰KOTA GBIA ahunda ndo, atene: ‘Zo wa laa ayeke handa ande Akab titene lo gue, lo tiri bira na Ramot, na sese ti Galaad si azo afâ lo kâ, zo wa?’ Mbeni zo atene ti lo ge nde, mbeni atene ti lo kâ nde.

²¹Tongaso, mbeni yingo aga, aluti na dawa ti KOTA GBIA si atene: ‘Mbi laa mbi yeke handa ande lo.’ KOTA GBIA atene na lo: ‘Mo yeke sara tongana nyen?’

²²Yingo ni akiri tënë, atene: ‘Fade mbi yeke gue si mbi yeke ga yingo ti mvene na yanga ti awayanga-nzapa kue ti gbia.’ KOTA GBIA atene na lo: ‘So nzoni lege ti handango lo laa; gue, mo sara gi tongaso.’ ”

²³Mishe akiri atene: “Fadeso, ye ni asi awe. KOTA GBIA azia yingo ti mvene na yanga ti awayanga-nzapa ti mo kue, so ti fa atene, lo wani, lo leke na be ti lo ti tokua mbeni kpale na ndö ti mo.”

²⁴Tongaso Sidekia, molenge ti Kenaana aga nduru na tere ti Mishe, lo pika ngbangba ti Mishe si lo tene: “Yingo ti KOTA GBIA asigigi na ya ti mbi tongana nyen ti gue ti tene tënë na mo so?”

²⁵Mishe akiri tënë, atene: “Biani, fade mo yeke baa ni na lango so mo yeke londo na ya ti mbeni kubu ti hon na ya ti mbeni kubu nde titene mo honde tere ti mo.”

²⁶Gbia ti Israel amu yanga na mbeni zo ti kua ti lo, atene: “Mo gbu Mishe, mo gue na lo na Amon, makonzi ti gbata ni nga na Yoas, molenge ti gbia.

²⁷Mo tene na ala, mo tene: Tënë so gbia atene ayeke so: ‘Ala bi ye so na da ti kanga! Ala mu na lo gi kete fuku ti mapa na kete kete ngu ngbii asi na lango so mbi yeke kiri na kodro na nzoni tere si.’ ”

²⁸Mishe akiri tënë na lo, atene: “Tongana mo kiri na nzoni tere biani, andaa KOTA GBIA atene tënë na lege ti mbi pepe.” Lo kiri lo tene: “Ala amara kue, ala ma!”

²⁹Gbia ti Israel na Yosafat, gbia ti Juda ague ti tiri bira na gbata ti Ramot, na sese ti Galaad.

³⁰Gbia ti Israel atene na Yosafat: “Mbi yeke yu mbeni bongo nde titene azo ahinga mbi pepe si mbi gue na bira ni. Ti mo, mo yu bongo ti mo ti gbia.” Tongaso gbia ti Israel ayu mbeni bongo nde titene azo ahinga lo pepe si lo gue na bira ni.

³¹Andaa gbia ti Sirii amu yanga na amakonzi ti azo ti kpengo na apusu ti ambarata ti lo so wungo ti ala ayeke baleota na use, lo tene: “Ala ti na ndö ti asenge turugu wala na ndö ti aturugu ti kota kamba pepe; me ala ti gi na ndö ti gbia ti Israel.”

³²So amakonzi ti azo ti kpengo na apusu ti ambarata abaa Yosafat, ala tene: “Gbaa, gbia ti Israel laa!” Nilaa ala gue na mbage ti lo titene ala ti na ndö ti lo. Me Yosafat adekongo.

³³So amakonzi ti azo ti kpengo na apusu ti ambarata abaa atene, so gbia ti Israel laa pepe, ala zia ti tumba peko ti lo.

³⁴Me mbeni turugu ti Sirii apika le ti kokora ti lo kirikiri tongaso, le ti kokora ni ague, akpo gbia ti Israel na ndo so awen ti kazaka ti lo ti bira atengbi tere daa. Gbia atene na zo ti kpengo na pusu ti mbarata ti lo, atene: “Mo turne li ti pusu ti mbarata ni na peko, mo sigigi na mbi na ya ti bira ni, ngbanga ti so mbi wara ka awe.”

³⁵Na lango ni so, bira aza wâ ngangu, nilaa mbeni zo agbu gbia titene lo ngba ti luti na nduzu na ya ti pusu ti mbarata ti lo na dawa ti aturugu ti Sirii. Mene ti ka ti lo ni ayuru na ngbonda ti pusu ti mbarata ni. Asi na lakui, lo kui.

³⁶So lâ akui awe, mbeni dekongo alondo na ya ti bâbâ ni, atene: “Zo oko oko akiri na gbata ti lo! Zo oko oko akiri na ndo ti lo!”

³⁷Na peko ti so gbia akui awe, ala mu kuâ ti lo akiri na ni na Samarii si ala lu ni kâ.

³⁸Na ndembe so azo ayeke sukula pusu ti mbarata ti gbia na yanga ti *lende ti Samarii, ambo aga si ayeke su mene ti Akab. Awali-ndumba asukula tere ti ala na ya ti ngu ni so. Ye ni asi alingbi na tënë so *KOTA GBIA atene.

³⁹Tanga ti atënë na ndö ti Akab, aye so kue lo sara, tënë ti yangbo so lo leke na pembe ti doli nga na agbata so lo leke ni, a su tënë ni na ya ti “Mbeti ti aye so agbia ti Israel asara”.

⁴⁰Akab akui, lo hon na peko ti ababâ ti lo. Molenge ti lo Ahazia laa aga gbia na peko ti lo.

⁴¹Na ngu osio ni so Akab ayeke gbia ti Israel, Yosafat, molenge ti Asa aga gbia ti Juda.

⁴²Yosafat ayeke na ngu baleota na oku si lo ga gbia. Lo le-gbia ngu baleuse na oku na Jérusalem. Iri ti mama ti lo ayeke Azuba, molenge ti Shili.

⁴³Yosafat amu peko ti sarango ye ti babâ ti lo Asa kue, lo zia lege ni pepe; lo sara ye so ayeke mbirimbiri na le ti KOTA GBIA.

⁴⁴Me ando so azo aleke na ndö ti ahoto si ala yeke voro anzapa nde daa, lo zi ni pepe. Azo angba ti gue kâ ti mu *asandaga, ti zö dukani.

⁴⁵Yosafat na gbia ti Israel aduti na siriri na popo ti ala.

⁴⁶Tanga ti atënë na ndö ti Yosafat, aye ti koli so lo sara na abira so lo sara, a su tënë ni na ya ti “Mbeti ti aye so agbia ti Juda asara”.

⁴⁷Lo zi na ya ti kodro ni tanga ti akoli na awali so kue angba ti sara aye ti ndumba ndali ti anzapa nde, ngbene ye na ngoi ti babâ ti lo Asa.

⁴⁸Na ngoi ni so, gbia ayeke na kodro ti Edom pepe; me gi mbeni govoronere so gbia ti Juda azia lo na li ti kodro ni.

⁴⁹Yosafat aleke akota mangboko titene ala gue na sese ti Ofir ti ga na lôro. Me tambula ni aduti daa pepe, ngbanga ti so amangboko ni alinda ngu na Esion-Geber.

⁵⁰Ahazia, molenge ti Akab atene na Yosafat: “Tongana mo ye, fade azo ti kua ti mbi na azo ti kua ti mo ague oko na tambula ni na ya ti amangboko ni.” Me Yosafat ake.

⁵¹Yosafat akui, lo hon na peko ti ababâ ti lo, a lu lo na tere ti ababâ ti lo na Gbata ti David. Molenge ti lo Yoram laa aga gbia na peko ti lo.

⁵²Na ngu baleoko na mbarambara ni so Yosafat ayeke gbia ti Juda, Ahazia, molenge ti Akab aga gbia ti Israel na Samarii. Lo le-gbia ngu use na Israel.

⁵³Lo sara ye so ayeke sioni na le ti KOTA GBIA. Lo mu peko ti sarango ye ti babâ ti lo na ti mama ti lo; lo mu nga peko ti sarango ye ti Yeroboam, molenge ti Nebat. Ando Yeroboam asara si azo ti Israel asara siokpari.

⁵⁴Lo kuku na gbe ti nzapa *Baal si lo voro lo. Tongaso lo zia ngonzo na be ti KOTA GBIA, Nzapa ti Israel gi tongana ti so babâ ti lo asara ando.