Read sango 1 Agbia 4 Bible Online

1 Agbia 4 - sango bible

1 Agbia 4

¹Salomon ayeke lani gbia na ndö ti azo ti Israel kue.

²So ayeke iri ti akota zo ti kua ti lo: Azaria, molenge ti Sadok, ayeke wayango-sandaga;

³Elihoref na Ahia, amolenge ti Shisha, ala yeke awakuasu; Yoshafat, molenge ti Ahilud ayeke zo ti tenengo peko ti tënë ti yanga ti gbia;

⁴Benaya, molenge ti Yoyada ayeke makonzi ti aturugu; Sadok na Abiatar ayeke awayango-sandaga;

⁵Azaria, molenge ti Natan ayeke makonzi ti agovoronere; Zabud, molenge ti Natan ayeke wayango-sandaga si lo yeke wamungo-wango na gbia;

⁶Ahishar ayeke makonzi ti yangbo ti gbia; Adoniram, molenge ti Abda ayeke makonzi na ndö ti azo ti sarango kua ti ngangu.

⁷Salomon ayeke lani na agovoronere baleoko na use so ayeke na ndö ti kodro ti Israel kue. Kua ti ala ayeke ti gi kobe ndali ti gbia na azo ti yangbo ti lo kue. Govoronere oko oko ayeke mu nze oko na ya ti ngu oko ti bongbi kobe ndali ti gbia na azo ti lo.

⁸Iri ti agovoronere ni ayeke so: Molenge ti Hur, lo yeke govoronere na sese ti ahoto ti Efraim;

⁹molenge ti Deker ayeke govoronere ti asese tongana: Makas, Shaalbim, Bet-Shemesh na Elon-Bet-Hanan;

¹⁰molenge ti Hesed, zo ti kodro ti Arubot, ayeke govoronere ti sese ti Soko na ti kodro ti Hefer kue;

¹¹molenge ti Abinadab ayeke govoronere ti sese ti Dor, na ndo so akete ahoto ayeke daa. Lo mu Tafat, molenge ti Salomon ti ga wali ti lo.

¹²Baana, molenge ti Ahilud ayeke govoronere ti sese ti Taanak na ti Megido nga na sese ti Bet-Shean kue. — Sese ti Bet-Shean ague, andu tere na Sartan si ayeke na gbe ti gbata ti Yizreel; alondo na Bet-Shean ague, asi na Abel-Mehola, akiri ague ngbii ahon Yokmeam.

¹³Molenge ti Geber ayeke govoronere na kodro ti Ramot, na sese ti Galaad; akete kodro ti Yair, na sese ti Galaad ayeke na gbe ti lo. Yair ayeke molenge ti Manase. Molenge ti Geber ayeke nga govoronere ti sese ti Argob so ayeke na Bashan. Akota gbata baleomene ti sese ni kâ ayeke na angangu gbagba na tere ni si angbongboro wen ti kangango na ayanga ti agbagba ni ayeke na bengba wen;

¹⁴Ahinadab, molenge ti Ido ayeke govoronere ti sese ti Mahanaim;

¹⁵Ahimaas ayeke govoronere ti sese ti Neftali. Lo nga, lo mu mbeni molenge ti Salomon ti ga wali ti lo; iri ti wali ni ayeke Basmat;

¹⁶Baana, molenge ti Hushai, ayeke govoronere ti sese ti Aser na ti Bealot;

¹⁷Yoshafat, molenge ti Parua, ayeke govoronere ti sese ti Isakar;

¹⁸Shimei, molenge ti Ela, ayeke govoronere ti sese ti Benjamin;

¹⁹Geber, molenge ti Uri, ayeke govoronere ti sese ti Galaad na ti sese ti Sihon, gbia ti azo ti mara ti Amori nga na ti Og, gbia ti Bashan. Na tere ti agovoronere baleoko na use so, govoronere oko ayeke lani na sese ti Juda.

²⁰Azo ti kodro-gbia ti Juda na ti Israel awu mingi, tongana mbutu ti yanga ti kota ngu-ingo. Azo ni ayeke te, ala yeke nyon si ala yeke duti na ngia.