Read sango 1 Agbia 9 Bible Online

1 Agbia 9 - sango bible

1 Agbia 9

¹So Salomon ahunzi ti sara kota da ti *KOTA GBIA na yangbo ti lo wani si lo hunzi nga ti sara aye so kue be ti lo aye awe,

²KOTA GBIA asi na lo ti fani use ni tongana ti so lo si lani na lo na gbata ti Gabaon

³KOTA GBIA atene na lo: “Mbi ma sambela ti mo na vorongo tere ti mo awe. Kota da so mo sara so, mbi zia ni nde ndali ti mbi titene mbi duti daa kpu na kpu na popo ti ala. Fade le ti mbi na nzoni be ti mbi ayeke ngba daa lakue.

⁴Ti mo, tongana mo tambula na dawa ti mbi tongana ti so babâ ti mo David asara lani, na sioni be pepe, me na be ti mbirimbiri, tongana mo sara ye kue alingbi na yanga so mbi mu na mo, tongana mo sara ye kue alingbi na andia ti mbi nga na aye so mbi fa,

⁵fade mbi yeke sara titene lengo-gbia ti mo na ndö ti azo ti Israel angba kpu na kpu alingbi na zendo so mbi mu na babâ ti mo David. Mbi tene lani na lo, mbi tene: ‘Fade mbeni zo ti sewa ti mo ayeke duti daa lakue na ndö ti mbata ti gbia ti Israel.’

⁶Me tongana mo na azo ti mo nga na *ahale ti ala azia peko ti ala na mbi, tongana ala ke ti sara ye alingbi na atënë ti ndia ti mbi nga na andia ti mbi, tongana ala gue ti sara na ambeni nzapa nde si ala kuku na gbe ti anzapa ni,

⁷fade mbi yeke zi ala, azo ti Israel, na sese so mbi mu na ala. Kota da so mbi zia ni nde ndali ti mbi, fade mbi yeke bi ni yongoro na le ti mbi si azo ti Israel aga mbeni ye ti *mato nga na ye so azo kue ayeke he na ngia.

⁸Tongana mbeni zo ahon ande na tere ti kota da so azo agonda ni mingi so, fade li ti lo kue ayeke kpe, lo yeke huru yanga ti lo si lo yeke hunda tere ti lo, lo tene: ‘KOTA GBIA asara na kodro so nga na kota da so tongaso ngbanga ti nyen?’

⁹Fade a yeke kiri tënë na lo, atene: ‘Ye ni asi tongaso, ngbanga ti so azo ti Israel azia KOTA GBIA Nzapa ti ala so asara si akotara ti ala asigigi na sese ti Ezipte. KOTA GBIA asara si aye ti ngangu so asi na ala, ngbanga ti so ala mu peko ti ambeni nzapa nde, ala kuku na gbe ti anzapa ni si ala voro ala.’ ”

¹⁰Na peko ti ngu baleuse, Salomon ahunzi ti sara ada use: kota da ti *KOTA GBIA na yangbo ti lo wani.

¹¹Hiram, gbia ti Tir atokua na Salomon akeke ti sedre, akeke ti sipre na gba ti lôro so be ti lo aye titene lo sara na ada ni. Nilaa Salomon amu na lo agbata baleuse na sese ti Galile.

¹²Tongaso Hiram alondo na kodro ti Tir ti gue ti baa agbata so Salomon amu na lo. Me agbata ni anzere na be ti lo pepe.

¹³Lo tene na Salomon: “Ita ti mbi, mara ti agbata wa laa mo mu na mbi so?” Lo di iri ti agbata so “Sese ti Kabul”; iri ni so angbaa ngbii asi laso.

¹⁴Andaa Hiram atokua na Salomon kilo ti lôro saki ota na ngbangbo oku.

¹⁵Gbia Salomon agbu azo na ngangu titene ala sara kota da ti KOTA GBIA, yangbo ti gbia, ndo so iri ni Milo, gbagba ti Jérusalem na agbata ti Hasor, ti Megido na ti Gezer.

¹⁶Faraon, gbia ti Ezipte ague si lo mu gbata ti Gezer na lege ti bira; lo gbi gbata ni si lo fâ azo ti Kanaan so alango kâ. Na pekoni, lo mu gbata ti Gezer na molenge ti lo ti wali so ayeke wali ti Salomon si aga tongana ye so zo ayeke ka na peko ti wali.

¹⁷Salomon akiri aleke agbata ti Gezer na ti Bet-Horon-ti-gbeni,

¹⁸agbata ti Baalat na ti Tamar so ayeke na sese ti benyama.

¹⁹Lo kiri lo leke nga agbata so kue lo yeke bata akobe daa, na agbata so lo yeke bata apusu ti bira ti lo na ambarata ti lo daa. Aye so kue be ti Salomon aye ti leke, lo leke ni na Jérusalem, na ndö ti hoto ti Liban nga na ya ti akodro so kue ayeke na gbe ti komandema ti lo. Lege so Salomon agbu azo na ngangu ti sara akua laa:

²⁰Ambeni zo angba na ya ti kodro ni so ala yeke azo ti Israel pepe: azo ti mara ti Amori, ti Het, ti Perizi, ti Hivi na ti Yebus.

²¹Azo ni so angba na ya ti kodro ni, ngbanga ti so azo ti Israel awara lege ti fâ ala kue pepe; Salomon amu ala ti sara angangu kua ti ngbaa. *Ahale ti ala angba ti sara akua ni ngbii asi laso.

²²Me Salomon agbu mbeni zo ti Israel oko pepe na ngbaa, ngbanga ti so ala yeke aturugu, akota zo ti yangbo ti lo, amakonzi ti lo, aturugu ti lo ti kota kamba, amakonzi ti azo ti kpengo na apusu ti lo ti bira wala azo ti kpengo na ambarata ti lo.

²³Akapita so agovoronere ti Salomon asoro ala, wungo ti ala ayeke ngbangbo oku na baleoku; kua ti ala ayeke ti baa ndo na ndö ti gba ti azo so ayeke sara kua ni.

²⁴Na peko ti so molenge ti Faraon ti wali alondo na Gbata ti David si lo gue na yangbo so Salomon asara ndali ti lo, Salomon aleke ndo so iri ni Milo.

²⁵Fani ota na ya ti ngu oko oko, Salomon ayeke mu *asandaga so a yeke gbi ni kue na wâ nga na sandaga ti beoko na ndö ti gbalaka so lo sara ndali ti KOTA GBIA. Lo yeke zö dukani na ndö ti gbalaka so ayeke na dawa ti KOTA GBIA. Lege so Salomon ahunzi ti sara kota da ti KOTA GBIA laa.

²⁶Gbia Salomon asara amangboko na Esion-Geber so ayeke nduru na Elat, mbeni ndo ti lutingo ti amangboko na yanga ti kota ngu-ingo ti Asosongo, na sese ti Edom.

²⁷Gbia Hiram atokua na Salomon azo ti kua ti lo so ahinga ti sara kua na le ti kota ngu-ingo; ala na azo ti kua ti Salomon laa ague na ya ti amangboko ni.

²⁸So ala si na kodro ti Ofir, ala mu kilo ti lôro saki baleoko na use si ala ga na ni na gbia Salomon.