Read sango 2 Agbia 10 Bible Online

2 Agbia 10 - sango bible

2 Agbia 10

¹Amolenge ti Akab ti koli balembarambara ayeke na Samarii. Yehu asu ambeti, lo tokua ni na Samarii na *akangba, amakonzi ti gbata ti Yizreel nga na azo so ayeke bata amolenge ti Akab. Lo tene na ala:

²“Ala laa ayeke bata amolenge ti gbia. Ala yeke na apusu ti mbarata, ambarata nga na aye ti bira; ala yeke lango na ya ti agbata so a sara ngangu gbagba na tere ni. Tongana ala wara mbeti so,

³ayeke nzoni ala baa na popo ti amolenge ti gbia, lo so lo yeke nzoni si lo yeke mbirimbiri ti ga gbia. Ala zia lo na ndö ti mbata ti gbia na peko ti babâ ti lo. Na pekoni, ala tiri bira ndali ti asewa ti gbia ti ala.”

⁴Mbeto agbu azo ni mingi si ala tene na popo ti ala, atene: “So agbia use agbu le ni na Yehu pepe so, e laa e yeke gbu le ni na lo?”

⁵Makonzi ti yangbo ti gbia, makonzi ti gbata ni, akangba na azo so ayeke bata amolenge ti gbia atokua ndo na Yehu, atene: “E yeke azo ti kua ti mo; ye so kue mo hunda na e ti sara, fade e yeke sara ni. E yeke mu mbeni zo oko ti ga gbia pepe. Fade mo sara ye so be ti mo aye.”

⁶Yehu atokua na ala use mbeti, atene: “Tongana ala yeke na peko ti mbi si ala ye ti ma yanga ti mbi, ayeke nzoni ala mu li ti amolenge ti gbia ti ala, ala ga na ni na mbi na gbata ti Yizreel, kekereke gi na oko ngbonga so.” Andaa amolenge balembarambara ti gbia ayeke na ndo ti akota zo ti gbata ni, akota zo so ayeke bata ala so.

⁷Gi so akota zo ni awara mbeti ni awe, ala gbu amolenge ti gbia ni, afâ go ti ala balembarambara kue. Na pekoni, ala zia li ti amolenge ni na ya ti asakpa si ala tokua na Yehu, na gbata ti Yizreel.

⁸Mbeni watokua oko aga atene tënë ni na lo, atene: “A ga na li ti amolenge ti gbia ni awe.” Tongaso Yehu atene: “Ala do ni gba ni use na yanga ti gbagba ti gbata ni; ala zia ni angba na ndo so ngbii asi na ndaperere!”

⁹Na ndaperere, Yehu asigigi, lo luti si lo tene na azo ti gbata ni kue, lo tene: “Ti ala, tënë ayeke na li ti ala pepe! Baa, mbi laa mbi leke tënë na tere ti gbia ti mbi si mbi fâ lo. Me azo so kue so, zo wa laa afâ ala, zo wa?

¹⁰Ayeke nzoni ala hinga atene, tënë so *KOTA GBIA atene na tere ti azo ti sewa ti Akab, peko ni oko ayeke ngba senge pepe. KOTA GBIA asara ye alingbi na tënë so lo tene lani na lege ti Élie, zo ti kua ti lo.”

¹¹Azo ti sewa ti Akab so kue angba na fini na gbata ti Yizreel, akota zo ti lo kue, azo so lo na ala aye tere nga na awayango-sandaga ti lo, Yehu afâ ala kue, lo zia mbeni zo oko angba na fini pepe.

¹²Na pekoni, Yehu alondo ti gue na Samarii. Na guengo ni, tongana lo si na Bet-Eked-ti-awabatango-taba,

¹³lo wara a-ita ti Ahazia, gbia ti Juda. Lo hunda ala, lo tene: “Ala yeke azo wa?” Ala kiri tënë: “E yeke a-ita ti Ahazia. E yeke gue ti bara amolenge ti gbia nga na amolenge ti Yezabel, wali ti gbia.”

¹⁴Yehu amu yanga, atene: “Ala gbu ala na fini na le ti ala!” Azo ti Yehu agbu azo ni si afâ ala na tere ti du ti ngu so ayeke na Bet-Eked. Azo ni kue ayeke baleosio na use; lo zia zo oko angba na fini pepe.

¹⁵Yehu alondo na ndo so, lo gue, lo wara tere na Yonadab, molenge ti Rekab. Andaa Yonadab ayeke ga na mbage ti lo. Yehu abara lo si atene na lo: “Be ti mo avuru na tere ti mbi tongana ti so be ti mbi avuru na tere ti mo so?” Yonadab akiri tënë: “Een!” Yehu atene: “Tongana ye ni ayeke tongaso, gbu maboko ti mbi!” Yonadab agbu maboko ti Yehu si Yehu amu lo na tere ti lo na ya ti pusu ti mbarata ti lo.

¹⁶Yehu atene na Yonadab: “Ga na tere ti mbi, fade mo yeke baa nzara ti *KOTA GBIA so ayeke gbi na be ti mbi.” Yehu amu lo na tere ti lo na ya ti pusu ti mbarata ti lo si ala gue legeoko na tambula ni.

¹⁷So Yehu asi na Samarii awe, lo fâ tanga ti azo ti sewa ti Akab so kue angba na fini si ala yeke lango na ya ti gbata ni. Lo hunzi ala kue alingbi na tënë so KOTA GBIA atene lani na wayanga-Nzapa Élie.

¹⁸Na pekoni, Yehu abongbi azo ti gbata ti Samarii kue si lo tene na ala: “Akab avoro ando nzapa *Baal kete. Me mbi Yehu, mbi yeke voro ande Baal mingi ahon lo.

¹⁹Fadeso ala iri awayanga ti nzapa Baal kue, azo so kue ayeke voro lo nga na awayango-sandaga ti lo kue ti ga na tere ti mbi; zo oko angba na peko pepe, ngbanga ti so mbi ye ti mu kota sandaga na Baal. Zo so aga pepe, fade a fâ lo.” Yehu asara ye so na mayere, ngbanga ti so lo ye ti fâ azo ti vorongo Baal kue.

²⁰Ndani laa Yehu atene: “Ayeke nzoni ala iri kota bongbi so a zia ni nde ndali ti nzapa Baal.” Azo ni airi bongbi ni

²¹na lege so Yehu atokua azo ti gue na sese ti Israel kue. Azo so kue ayeke voro Baal aga; zo oko angba na peko pepe. Ala li na ya ti da ti vorongo Baal si da ni asi meke meke na azo.

²²Tongaso Yehu amu yanga na zo ti batango abongo, atene: “Mo ga na bongo ndali ti azo so kue ayeke voro Baal.” Zo ni aga na abongo ni.

²³Na pekoni, Yehu na Yonadab, molenge ti Rekab ali na ya ti da ti nzapa Baal. Yehu atene na azo so ayeke voro Baal, atene: “Ala baa mbirimbiri si mbeni zo ti vorongo KOTA GBIA oko aduti na popo ti ala pepe; me gi azo ti vorongo Baal.”

²⁴Yehu na Yonadab ali na ya ti da ni ti ya *sandaga ti beoko nga na sandaga so a yeke gbi ni kue na wâ. Andaa Yehu azia aturugu ti lo balemiombe na gigi. Lo tene na ala: “Azo so mbi zia ala na maboko ti ala so, tongana mbeni zo na popo ti ala aturugu, azia lege si mbeni zo ni oko akpe, fade a yeke fâ lo na plase ti zo so akpe so.”

²⁵Gi so Yehu ahunzi ti ya sandaga so a yeke gbi ni kue na wâ, lo tene na aturugu nga na amakonzi ti aturugu ni, lo tene: “Ala li, ala fâ azo ni kue! Ala zia zo oko akpe pepe!” Tongaso aturugu ni afâ azo ni si ala bi kuâ ti ala na gigi ti gbata ni. Na pekoni, aturugu ni ali na ndo so ayeke nde si ayeke nzoni kue ahon atanga ni ti da ti nzapa Baal.

²⁶Angbongboro têne so ala leke si aluti na nduzu na ya ti da ti nzapa Baal so, ala sigigi na ni si ala gbi ni.

²⁷Na pekoni, ala kungbi na sese ngbongboro têne so ala leke aluti na nduzu ndali ti Baal so, ala kungbi nga da ti nzapa Baal ni na sese. Ala sara si da ni aga mbeni kabinee ndali ti azo ti lege. Kabinee ni angba ngbii asi laso.

²⁸Lege so Yehu azi nzapa *Baal na kodro ti Israel biani biani laa.

²⁹Me Yehu azia pepe lege ti siokpari so Yeroboam, molenge ti Nebat asara lani. Biani, Yeroboam apusu lani azo ti Israel titene ala sara siokpari na lege ti vorongo abagara so a sara na lôro si ayeke na Betel nga na Dan.

³⁰*KOTA GBIA atene na Yehu: “So nzoni! Mo sara ye so ayeke mbirimbiri na le ti mbi. Mo sara na asewa ti Akab gi tongana ti so be ti mbi aye. Ndani laa fade amolenge ti mo ayeke duti na ndö ti mbata ti gbia na Israel ngbii asi na molongo osio ni.”

³¹Me Yehu amu be ti lo kue pepe ti sara ye alingbi na tënë ti *ndia ti KOTA GBIA, Nzapa ti Israel. Siokpari so Yeroboam, molenge ti Nebat apusu lani azo ti Israel si ala sara so, Yehu azia lege ni pepe.

³²Na ngoi ni so, KOTA GBIA ato nda ti zi mbeni mbage ti sese ti Israel. Lo zia lege na Hazael, gbia ti Sirii ti tiri bira na azo ti Israel na akatikati ti Israel kue.

³³Tongaso Hazael azi na maboko ti ala akodro so kue alondo na To ti ngu ti Jourdain ngbii asi na Banga ti Aroer, na tere ti ngu ti Arnon. Lo zi nga na maboko ti ala akodro ti sese ti Galaad na ti Bashan so azo ti mara ti Ruben, ti Gad na ti Manase aduti daa.

³⁴Tanga ti atënë na ndö ti Yehu, aye so kue lo sara nga na akota ye so lo sara, a su tënë ni na ya ti “Mbeti ti aye so agbia ti Israel asara”.

³⁵Yehu akui, lo hon na peko ti ababâ ti lo si a lu lo na Samarii. Molenge ti lo Yoakaz laa aga gbia na peko ti lo.

³⁶Yehu aduti gbia ti Israel ngu baleuse na miombe na gbata ti Samarii.