Read sango 2 Agbia 11 Bible Online

2 Agbia 11 - sango bible

2 Agbia 11

¹So Atalii, mama ti Ahazia ama a tene, molenge ti lo akui awe, lo londo, lo fâ *ahale ti gbia kue.

²Me na ndembe so a yeke fâ amolenge ni, Yosheba, molenge ti gbia Yoram ti wali, ita ti Ahazia, amu Yoas na hondengo ni. Lo honde molenge ni na wali ti batango lo na ya ti mbeni kubu so a zia agbogbo daa, na ya ti kota da ti Nzapa, tongaso si Atalii awara lege ti fâ Yoas pepe.

³Yoas na wali ti batango lo angba ti honde tere ti ala na ya ti kota da ti *KOTA GBIA ngu omene. Andaa na ngoi ni so, Atalii ayeke le-gbia na ndö ti kodro ni.

⁴Na ngu mbarambara ni, Yoyada atokua ti iri amakonzi so ayeke na li ti aturugu ngbangbo oko ti azo ti mara ti Kari na ala so ayeke na li ti aturugu ti batango gbia ti ga na tere ti lo na ya ti kota da ti *KOTA GBIA. Yoyada na aturugu ni asara *mbuki na popo ti ala si lo hunda na ala ti deba yanga ti ala. Na pekoni, lo fa na ala molenge ti gbia.

⁵Lo mu yanga na ala, lo tene: “Ye so fade ala yeke sara ayeke so: kozo bongbi ti ala, ala so ayeke ga ti sara kua na *lango ti wungo tere, ala yeke bata da ti gbia;

⁶use bongbi ni ayeke bata yanga ti da so iri ni Sur; ota bongbi ni ayeke bata yanga ti da so ayeke na peko ti da ti aturugu ti batango gbia. Abongbi ota so ayeke bata da ti gbia na peko ti tere, na peko ti tere.

⁷Abongbi use ti aturugu so ayeke sara kua na lango ti wungo tere pepe, fade ala yeke ga ti bata kota da ti KOTA GBIA, na ndo so gbia ayeke daa.

⁸Fade aturugu ni kue ayeke ngoro gbia, zo oko oko na ye ti bira ti lo na maboko ti lo si ndo so kue gbia aye ti gue daa, ala yeke na tere ti lo. Zo so agi lege ti li na popo ti ala, fade a yeke fâ lo.”

⁹Amakonzi so ayeke na li ti aturugu ngbangbo oko asara ye kue alingbi na yanga so wayango-sandaga Yoyada amu na ala. Makonzi oko oko abongbi aturugu ti lo, ataa ala so aga ti sara kua na lango ti wungo tere, wala ala so kua ti ala ahunzi na lango ni so awe, ala kue ague na tere ti wayango-sandaga Yoyada.

¹⁰Wayango-sandaga amu na amakonzi so ayeke na li ti aturugu ngbangbo oko alikongo na akete *vala ti gbia David; aye ni so ayeke na ya ti kota da ti KOTA GBIA.

¹¹Aturugu ti batango gbia, na ye ti bira ti ala na maboko ti ala aluti na dawa ti kota da ti Nzapa, ti londo na mbage ti maboko ti koli ngbii asi na mbage ti maboko ti wali, nduru na tere ti gbalaka, nduru na tere ti da; ala luti ti ngoro gbia.

¹²Tongaso Yoyada amu molenge ti gbia asigigi na lo. Lo zia kpoto ti gbia na li ti molenge ni si lo mu na lo mbeti ti mbuki. A tuku mafuta na li ti lo titene a zia lo gbia. Azo ni apika maboko si ala dekongo, atene: “Gbia na nduzu!”

¹³So Atalii ama wuluwulu ti azo ti batango gbia na dekongo ti azo ni, lo ga lo wara ala na ya ti kota da ti KOTA GBIA.

¹⁴Lo baa ndo si lo baa gbia so aluti na ndö ti mbeni ye so a leke na nduzu titene agbia aluti daa, tongana ti so ala yeke sara ka lakue. Amakonzi na azo ti hurungo tatalita ayeke nduru na tere ti gbia. Azo ti kodro kue ayeke na ngia si ambeni ayeke huru tatalita. Atalii asuru bongo na tere ti lo si lo dekongo, lo tene: “So kango zo laa! So kango zo laa!”

¹⁵Wayango-sandaga Yoyada aye titene a fâ Atalii na ya ti kota da ti Nzapa pepe. Nilaa lo mu yanga na amakonzi so ayeke na li ti aturugu ngbangbo oko, lo tene: “Ala mu lo na popo ti azo asigigi na lo. Tongana mbeni zo amu peko ti lo, fade a yeke fâ zo ni.”

¹⁶A gbu Atalii si a gue na lo na yangbo ti gbia. So lo si na yanga ti gbagba so iri ni Ti-ambarata, a fâ lo.

¹⁷Yoyada asara mbuki na popo ti KOTA GBIA na gbia nga na azo ti kodro titene ala ga azo ti KOTA GBIA. Yoyada asara nga mbuki na popo ti gbia na azo ti kodro.

¹⁸Tongaso, azo ti kodro ni kue ali na ya ti da ti nzapa *Baal, ala kungbi da ni na sese, ala fâ ya ti agbalaka ni na ayanda ni kue kue kue. Ala fâ Matan, wayango-sandaga ti Baal na dawa ti agbalaka ni. Wayango-sandaga Yoyada azia azo titene ala bata kota da ti KOTA GBIA.

¹⁹Na pekoni, Yoyada amu amakonzi so ayeke na li ti aturugu ngbangbo oko, azo ti mara ti Kari, aturugu ti batango gbia nga na azo ti kodro kue; lo mu nga gbia na ya ti kota da ti KOTA GBIA, ala hon na yanga ti da so aturugu ti batango gbia ayeke duti ka daa, ala si na yangbo ti gbia. Kâ, Yoas aduti na ndö ti mbata ti gbia.

²⁰Azo kue ayeke na ngia. Na peko ti so a fâ Atalii awe na yangbo ti gbia, gbata ni akiri aduti kpoo.