Read sango 2 Agbia 13 Bible Online

2 Agbia 13 - sango bible

2 Agbia 13

¹Na ngu baleuse na ota ni so Yoas, molenge ti Ahazia ayeke gbia ti Juda laa Yoakaz, molenge ti Yehu aga gbia ti Israel na gbata ti Samarii. Lo le-gbia ngu baleoko na mbarambara.

²Lo sara ye so ayeke sioni na le ti *KOTA GBIA. Siokpari so Yeroboam, molenge ti Nebat apusu lani azo ti Israel ti sara so, Yoakaz amu gi peko ni; lo zia lege ni pepe.

³Nilaa ngonzo ti KOTA GBIA alondo na tere ti azo ti Israel tongana wâ. Na ngoi kue, lo yeke zia ala na maboko ti Hazael, gbia ti Sirii nga na maboko ti Ben-Hadad, molenge ti Hazael.

⁴Me Yoakaz avoro tere ti lo na KOTA GBIA titene lo kai ngonzo ti lo ni; nilaa KOTA GBIA ama lo, ngbanga ti so lo baa lege so gbia ti Sirii ayeke sara ngangu na azo ti Israel.

⁵Tongaso KOTA GBIA atokua mbeni zo titene lo soo azo ti Israel. Nilaa azo ti Israel awara lege ti sigigi na gbe ti maboko ti azo ti Sirii si ala lingbi ti duti na siriri na ya ti ada ti ala tongana ti kozo.

⁶Me siokpari so asewa ti Yeroboam apusu lani azo ti Israel ti sara, ala zia lege ni pepe, ala ngba ti sara ni. Ataa keke so azo aleke aluti na nduzu ndali ti nzapa-wali *Ashera, keke ni angba ti luti na nduzu na Samarii.

⁷Na ndani, aturugu so angba na Yoakaz ayeke gi azo ti kpengo na mbarata baleoku, apusu ti mbarata baleoko na aturugu so ayeke tambula na gere saki baleoko. Biani, gbia ti Sirii afâ ambeni turugu ni mingi. Lo sara ala tongana fuku ti sese so zo ayeke do na gbe ti gere.

⁸Tanga ti atënë na ndö ti Yoakaz, aye so kue lo sara na akota ye so lo sara, a su tënë ni na ya ti “Mbeti ti aye so agbia ti Israel asara”.

⁹Yoakaz akui, lo hon na peko ti ababâ ti lo si a lu lo na Samarii. Molenge ti lo Yoas laa aga gbia na peko ti lo.

¹⁰Na ngu baleota na mbarambara ni so Yoas ayeke gbia ti Juda laa Yoas, molenge ti Yoakaz aga gbia na Samarii. Lo le-gbia ngu baleoko na omene.

¹¹Lo sara ye so ayeke sioni na le ti KOTA GBIA. Siokpari so kue Yeroboam, molenge ti Nebat apusu lani azo ti Israel si ala sara so, Yoas azia lege ni oko pepe; lo ngba ngbango daa.

¹²Tanga ti atënë na ndö ti Yoas, aye so kue lo sara, akota ye so lo sara na abira so lo na Amasia, gbia ti Juda atiri, a su tënë ni na ya ti “Mbeti ti aye so agbia ti Israel asara”.

¹³Yoas akui, lo hon na peko ti ababâ ti lo si a lu lo na Samarii na tere ti agbia ti Israel. Yeroboam laa amu mbata ti gbia na peko ti lo.

¹⁴Élisée ati na kobela, kobela so lo yeke kui na ni. Yoas, gbia ti Israel ague ti baa lo. Lo ba na ndö ti Élisée si lo yeke toto, lo tene: “Babâ ti mbi! Babâ ti mbi! Mo yeke lani tongana apusu ti mbarata ti Israel! Mo yeke tongana azo ti kpengo na ambarata ni!”

¹⁵Élisée atene na lo: “Mu mbeni kokora na ale ni.” Yoas amu kokora na ale ni.

¹⁶Élisée atene na gbia ti Israel: “Gboto ya ti kamba ti kokora ni.” Yoas agboto ya ti kamba ni. Élisée azia maboko ti lo na ndö ti maboko ti gbia

¹⁷si lo tene: “Zi fenetere so ayeke na mbage ti To.” Yoas azi fenetere ni. Élisée atene na lo: “Pika le ti kokora ni.” Yoas apika ni. Élisée atene: “Le ti kokora so afa songo benda ti *KOTA GBIA, songo benda na ndö ti azo ti Sirii. Fade mo yeke kinda ala na gbata ti Afek si mo yeke hunzi ala kue.”

¹⁸Na pekoni Élisée atene na Yoas: “Mu ale ti kokora ni.” Yoas amu ni. Élisée atene na gbia ti Israel: “Pika sese!” Yoas apika ni na sese lege ota si lo zia.

¹⁹Zo ti Nzapa asara ngonzo na tere ti gbia si lo tene: “Tongana mo pika fade sese ni lege oku wala omene, ka mo yeke kinda azo ti Sirii ngbii mo hunzi ala kue. Ti fadeso, mo yeke kinda ala gi lege ota.”

²⁰Élisée akui si a lu lo. Na tongo nda ti fini ngu oko oko, gba ti azo ti nzi ti kodro ti Moab ayeke li na sese ti Israel.

²¹Mbeni lâ, azo ague ti lu mbeni kuâ; mo ye ti baa, ala baa ambeni zo ti nzi ni so. Azo ti lungo kuâ ni abi kuâ ni na ya ti du ti kuâ ti Élisée. Gi so kuâ ni andu abio ti Élisée, zo ni akiri na fini si lo luti na ndö ti gere ti lo.

²²Na ngoi so kue Yoakaz angba gbia, Hazael, gbia ti Sirii asara ngangu mingi na azo ti Israel.

²³Me KOTA GBIA asara nzoni be na azo ti Israel, lo baa mawa ti ala; lo kiri na mbage ti ala ndali ti *mbuki so lo sara na Abraham, Isaac na Jacob. Nilaa lo ye ti fâ ala kue pepe. Na ngoi so, ade lo tumba ala yongoro na tere ti lo pepe.

²⁴Hazael, gbia ti Sirii akui si Ben-Hadad, molenge ti lo aga gbia na peko ti lo.

²⁵Tongaso Yoas, molenge ti Yoakaz, azi na maboko ti Ben-Hadad, molenge ti Hazael agbata ti Israel so Hazael amu lani na maboko ti babâ ti lo Yoakaz. Fani ota, Yoas akinda Ben-Hadad si lo zi na maboko ti lo agbata ti Israel.