Read sango 2 Agbia 14 Bible Online

2 Agbia 14 - sango bible

2 Agbia 14

¹Na ngu use ni so Yoas, molenge ti Yoakaz ayeke gbia ti Israel laa Amasia, molenge ti Yoas aga gbia ti Juda.

²Amasia ayeke na ngu baleuse na oku si lo ga gbia; lo le-gbia ngu baleuse na gumbaya na Jérusalem. Iri ti mama ti lo ayeke Yoadan, zo ti Jérusalem.

³Amasia asara ye so ayeke mbirimbiri na le ti *KOTA GBIA; me tongana ti kotara ti lo David pepe; lo sara ye gi tongana ti babâ ti lo Yoas.

⁴Ando so azo aleke na ndö ti ahoto ti voro anzapa nde daa, lo zi ni pepe. Azo angba ti gue kâ ti mu *asandaga na ti zö dukani.

⁵So Amasia asara si lengo-gbia ti lo akpengba awe, lo fâ amakonzi ti aturugu ti lo so lani afâ babâ ti lo, gbia Yoas.

⁶Me lo fâ pepe amolenge ti azo ti fango babâ ti lo, alingbi na tënë so a su na ya ti mbeti ti *Ndia ti Moïse. Na ya ti mbeti ni, KOTA GBIA amu yanga atene: “Fade a yeke fâ ababâ na amama pepe ndali ti siokpari ti amolenge ti ala; a yeke fâ nga amolenge pepe ndali ti siokpari ti ababâ na amama ti ala; a yeke fâ zo oko oko ndali ti siokpari ti lo wani.”

⁷Amasia afâ nga azo ti Edom saki baleoko na popo-hoto ti Ingo. Na ndembe ti bira ni, lo mu gbata ti Sela si lo di iri ti gbata ni Yokteel; iri so angba ngbii asi laso.

⁸Tongaso Amasia atokua azo na Yoas, molenge ti Yoakaz, molenge ti Yehu, gbia ti Israel ti tene na lo, atene: “Ga, mbi na mo, e tengbi tere, e baa!”

⁹Yoas, gbia ti Israel akiri tënë na Amasia, gbia ti Juda, atene: “Mbeni lâ, kete keke ti ki ti hoto ti Liban atokua na keke ti sedre ti Liban atene: Mu molenge ti mo titene lo ga wali ti molenge ti mbi ti koli. Me mbeni nyama ti hoto ti Liban ahon na ndö ti kete keke ti ki ni si lo nika ni.”

¹⁰Yoas akiri atene: “Mo fâ azo ti Edom awe si mo yeke pika kate ti mo. Mo lingbi ti gonda tere ti mo senge, me ayeke nzoni mo ngba na ndo ti mo! Ngbanga ti nyen si mo ye ti to nda ti bira so ayeke ga ande kpale na ndö ti mo, titene a fâ mo si a fâ nga aturugu ti Juda so?”

¹¹Me Amasia ama tënë ti lo so pepe. Tongaso Yoas, gbia ti Israel ague si lo na Amasia, gbia ti Juda atiri bira na Bet-Shemesh, mbeni gbata ti Juda.

¹²Aturugu ti Israel akinda aturugu ti Juda si turugu oko oko ti Juda akpe ague na da ti lo.

¹³Na Bet-Shemesh, Yoas, gbia ti Israel agbu Amasia, gbia ti Juda, molenge ti Yoas, molenge ti Ahazia. Lo gue na Jérusalem si lo kungbi mbage ti gbagba ti Jérusalem nduru na metere ngbangbo use, alondo na yanga ti gbagba so iri ni Ti-Efraim ngbii asi na mbeni yanga ni so iri ni Ti-Ndangoro.

¹⁴Yoas amu lôro kue, wen ti nginza na aye so kue ayeke na ya ti kota da ti KOTA GBIA; lo mu nga aye so ayeke na ya ti kubu so a yeke bata amosoro ti yangbo ti gbia daa. Lo gbu nga ambeni zo, lo bata ala ti ku titene a futa mbeni ye na lo si; na pekoni lo kiri na Samarii.

¹⁵Tanga ti atënë na ndö ti Yoas, aye so lo sara, akota ye so lo sara na bira so lo tiri na Amasia, gbia ti Juda, a su tënë ni na ya ti “Mbeti ti aye so agbia ti Israel asara”.

¹⁶Yoas akui, lo hon na peko ti ababâ ti lo si a lu lo na Samarii na tere ti agbia ti Israel. Molenge ti lo Yeroboam laa aga gbia na peko ti lo.

¹⁷Amasia, molenge ti Yoas, gbia ti Juda angba na fini ngu baleoko na oku na peko ti kuâ ti Yoas, molenge ti Yoakaz, gbia ti Israel.

¹⁸Tanga ti atënë na ndö ti Amasia, a su ni na ya ti “Mbeti ti aye so agbia ti Juda asara”.

¹⁹Azo aleke tënë na hondengo ni na tere ti Amasia na Jérusalem. Lo kpe, lo gue na gbata ti Lakish; me azo atumba peko ti lo na Lakish si ala fâ lo kâ.

²⁰Na pekoni, a zia kuâ ti lo na ndö ti pusu ti ambarata, aga na ni na Jérusalem si a lu ni na tere ti ababâ ti lo na Gbata ti David.

²¹Azaria ayeke na ngu baleoko na omene si azo ti Juda kue amu lo gbia na peko ti babâ ti lo Amasia.

²²Na peko ti so babâ ti lo akui, lo laa lo kiri lo mu gbata ti Elat si lo kiri lo leke ni.

²³Na ngu baleoko na oku ni so Amasia, molenge ti Yoas ayeke gbia ti Juda laa Yeroboam, molenge ti Yoas, gbia ti Israel aga gbia na gbata ti Samarii. Lo le-gbia ngu baleosio na oko.

²⁴Lo sara ye so ayeke sioni na le ti *KOTA GBIA. Siokpari so kue Yeroboam, molenge ti Nebat apusu lani azo ti Israel si ala sara ni so, Yeroboam azia lege ni oko pepe.

²⁵Lo laa lo kiri na asese ti Israel na kozo ndo ti ala, ti londo na Lebo-Hamat ngbii asi na yanga ti kota ngu ti Gba-ti-ingo. Ye ni asi alingbi na tënë so KOTA GBIA, Nzapa ti Israel atene ando na lege ti zo ti kua ti lo, wayanga-Nzapa Jonas, molenge ti Amitai, zo ti gbata ti Gat-Hefer.

²⁶Biani, KOTA GBIA abaa ye ti vundu ti azo ti Israel; ye ti vundu so ahon ngangu ni. Zo oko ayeke daa pepe, ataa mbeni ngbaa, ataa mbeni senge zo ti mu maboko na Israel.

²⁷Me KOTA GBIA atene ando pepe atene, fade ni yeke zi iri ti Israel na ndö ti sese so biani biani. Nilaa lo soo ala na lege ti Yeroboam, molenge ti Yoas.

²⁸Tanga ti atënë na ndö ti Yeroboam, aye so kue lo sara, akota ye so lo sara, abira so lo tiri, lege so lo mu gbata ti Damas nga na gbata ti Hamat so ayeke lani na gbe ti Juda si lo kiri na ni na gbe ti Israel; aye so kue, a su tënë ni na ya ti “Mbeti ti aye so agbia ti Israel asara”.

²⁹Yeroboam akui, lo hon na peko ti ababâ ti lo si a lu lo na tere ti agbia ti Israel. Molenge ti lo Zakarii laa aga gbia na peko ti lo.