Read sango 2 Agbia 16 Bible Online

2 Agbia 16 - sango bible

2 Agbia 16

¹Na ngu baleoko na mbarambara ni so Peka, molenge ti Remalia ayeke gbia laa Ahaz, molenge ti Yotam aga gbia ti Juda.

²Ahaz ayeke na ngu baleuse si lo ga gbia; lo le-gbia ngu baleoko na omene na Jérusalem. Lo sara ye so ayeke mbirimbiri pepe na le ti *KOTA GBIA Nzapa ti lo; lo sara ye tongana ti kotara ti lo David pepe.

³Me lo mu peko ti sarango ye ti agbia ti Israel. Lo gue daa ti gbi molenge ti lo ti koli na wâ ti mu na *sandaga. Lo mu peko ti asioni sarango ye ti amara nde, asioni ye so zo alingbi ti baa na le ti lo fani use pepe. Ando KOTA GBIA atumba amara ni na ndö ti sese ni si lo mu na azo ti Israel.

⁴Ahaz amu asandaga si lo zö dukani na ando so azo aleke na ndö ti ahoto ti voro anzapa nde daa, na ndö ti akete hoto nga na gbe ti akeke so akugbe ni ayeke gbani gbani.

⁵Tongaso Resin, gbia ti Sirii na Peka, molenge ti Remalia, gbia ti Israel aga ti tiri bira na Jérusalem. Ala ngoro Ahaz na bira, me ala lingbi ti hon ndö ti lo pepe.

⁶Na oko ngoi ni so, Resin, gbia ti Sirii akiri gbata ti Elat na gbe ti Sirii. Resin atumba azo ti Juda so ayeke na ya ti gbata ni si azo ti Edom aga asara kodro daa. Ala ngba ti duti daa ngbii asi laso.

⁷Ahaz atokua azo na Teglat-Falasar, gbia ti Asirii ti tene na lo, atene: “Mbi yeke zo ti kua ti mo, mbi yeke nga molenge ti mo. Ga mo zi mbi na maboko ti gbia ti Sirii nga na maboko ti gbia ti Israel so alondo ti tiri bira na mbi so!”

⁸Ahaz amu nginza na lôro so ayeke na ya ti kota da ti KOTA GBIA nga na ya ti kubu so a bata amosoro ti yangbo ti gbia daa si lo tokua ni na kadoo na gbia ti Asirii.

⁹Gbia ti Asirii ayeda na tënë ti Ahaz. Gbia ti Asirii ague ti tiri bira na gbata ti Damas si lo mu gbata ni. Lo gbu azo ti gbata ni, lo gue na ala na gbata ti Kir si lo fâ Resin.

¹⁰Gbia Ahaz ague na gbata ti Damas ti wara tere na Teglat-Falasar, gbia ti Asirii. So lo baa gbalaka so ayeke na Damas, gbia Ahaz amu limo ti gbalaka ni na kode so a leke na ni si lo tokua ni na wayango-sandaga Uria na Jérusalem.

¹¹Wayango-sandaga Uria asara gbalaka ni alingbi gi na limo nga na kode ni so gbia Ahaz angba na Damas si atokua na lo so. Uria asara gbalaka ni kozo si gbia Ahaz alondo na Damas akiri.

¹²Gi so Ahaz alondo na Damas akiri, lo baa gbalaka ni, lo gue nduru na tere ni si lo ma na ndö ni.

¹³Kâ, lo zö sandaga ti lo so a yeke gbi ni kue na wâ nga na sandaga ti farini; lo tuku sandaga ti samba ti lo na ndö ti gbalaka ni si lo fi mene ti asandaga ti beoko na ndö ni.

¹⁴Ti gbalaka so a sara na bengba wen si a zia ni nde ndali ti KOTA GBIA so, lo zi ni na ndo so ayeke daa kozoni; gbalaka ni ayeke ando na dawa ti kota da ti KOTA GBIA, na popo ti kota da ni na fini gbalaka. Lo zia gbalaka ni na peko ti fini gbalaka ni, na mbage ti Banga.

¹⁵Na pekoni, gbia Ahaz amu yanga na wayango-sandaga Uria, atene: “Ti fadeso, fade mo yeke ya na ndö ti kota gbalaka ni sandaga ti ndaperere so a yeke gbi ni kue na wâ nga na sandaga ti farini ti lakui. Mo yeke ya nga na ndö ni sandaga ti gbia so a yeke gbi ni kue na wâ na sandaga ti lo ti farini nga na sandaga ti azo ti kodro kue: sandaga ti ala so a yeke gbi ni kue na wâ, sandaga ti ala ti farini na ti samba. Fade mo yeke tuku na ndö ti gbalaka ni mene ti anyama so a mu ala na sandaga. Ti gbalaka so a sara na bengba wen so, fade mbi yeke baa lege ni.”

¹⁶Wayango-sandaga Uria asara aye so kue gbia Ahaz amu yanga na lo ti sara.

¹⁷Akadere ti apusu ti kota da ti Nzapa so a sara na bengba wen, gbia Ahaz afâ ya ni kue; lo zi asembe so ayeke na ndö ti apusu ni. Lo zi nga ngbongboro sembe so ayeke na ndö ti akoli-bagara baleoko na use so a mu bengba wen si a leke na ala so; lo zia ngbongboro sembe ni na ndö ti mbeni ye so lo mu atêne si lo leke na ni.

¹⁸Titene be ti gbia ti Asirii anzere na lo, gbia Ahaz asanze veranda so iri ni “Veranda ti *lango ti wungo tere”; veranda so a leke na ya ti kota da ti KOTA GBIA so. Lo sanze nga yanga ti gbagba so ayeke na mbage ti gigi so iri ni “Yanga-da ti gbia”.

¹⁹Tanga ti atënë na ndö ti Ahaz na aye so lo sara, a su tënë ni na ya ti “Mbeti ti aye so agbia ti Juda asara”.

²⁰Ahaz akui, lo hon na peko ti ababâ ti lo, a lu lo na tere ti ababâ ti lo na Gbata ti David. Molenge ti lo Ezekias laa aga gbia na peko ti lo.