Read sango 2 Agbia 17 Bible Online

2 Agbia 17 - sango bible

2 Agbia 17

¹Na ngu baleoko na use ni so Ahaz ayeke gbia ti Juda laa Osée, molenge ti Ela aga gbia ti Israel na Samarii. Lo le-gbia ngu gumbaya.

²Lo sara ye so ayeke sioni na le ti *KOTA GBIA. Me lo sara ni pepe alingbi na ti so agbia ti Israel, ala so aga kozo ti lo asara.

³Salmanasar, gbia ti Asirii aga ti tiri bira na Osée. Osée aga zo ti gbe ti lo si ayeke futa lapo na ngu oko oko.

⁴Me mbeni lâ, gbia ti Asirii ama a tene, Osée aleke tënë na hondengo ni na tere ti lo. Biani, Osée atokua azo na Sö, gbia ti Ezipte, nilaa lo ke ti futa lapo na gbia ti Asirii tongana ti so lo yeke sara kozoni na ngu oko oko. Tongaso Salmanasar agbu Osée si abi lo na da ti kanga.

⁵Na pekoni, gbia ti Asirii ali na ya ti kodro ti Israel kue. Lo gue ngbii lo si na gbata ti Samarii si lo ngoro gbata ni na bira na ya ti ngu ota.

⁶Na ngu gumbaya ni so Osée ayeke le-gbia, gbia ti Asirii amu gbata ti Samarii. Lo gbu azo ti Israel si lo gue na ala na kodro ti Asirii. Lo zia ambeni na sese ti Hala, ambeni na tere ti ngu ti Habor, na sese ti Gozan si ambeni na ya ti agbata ti Medii.

⁷Ye so asi na azo ti Israel, ngbanga ti so ala sara siokpari ti ke *KOTA GBIA, Nzapa ti ala, lo so lo zi ala na maboko ti Faraon, gbia ti Ezipte. Nzapa so laa asara si ala sigigi na kodro ni. Me ala voro ambeni nzapa nde.

⁸Ala sara ye alingbi na andia ti amara nde so KOTA GBIA atumba ando ala na dawa ti azo ti Israel si lo mu kodro ti amara ni na azo ti Israel. Azo ti Israel asara nga ye alingbi na andia so agbia ti Israel azia na sese.

⁹Azo ti Israel asara na hondengo ni ambeni ye ti ke KOTA GBIA, Nzapa ti ala, aye so akpa titene zo asara ni pepe: ala leke na ya ti agbata ti ala kue ambeni ndo na ndö ti ahoto titene ala voro anzapa nde daa; ala leke nga ambeni ndo ni na ya ti akota da so ayo na nduzu si asanziri ayeke duti daa nga na ya ti agbata so kue ngangu gbagba ayeke na tere ni.

¹⁰Ala leke angbongboro têne so aluti na nduzu ndali ti ala wani, ala leke nga akeke so aluti na nduzu ndali ti nzapa-wali *Ashera. Ala leke aye so na li ti ahoto kue nga na gbe ti afini keke kue.

¹¹Na ando so kue ala leke na ndö ti ahoto titene ala voro anzapa nde daa, ala zö dukani tongana amara nde so KOTA GBIA atumba ando ala na dawa ti azo ti Israel so. Ala sara asioni ye mingi ti zia ngonzo na be ti KOTA GBIA.

¹²Ala voro ayanda, ataa so KOTA GBIA atene ando na ala, atene: “Ala sara mara ti ye tongaso pepe!”

¹³KOTA GBIA agboto mê ti azo ti Israel na azo ti Juda na lege ti awayanga-Nzapa kue nga na lege ti azo so ayeke baa nda ti aye, atene: “Ala zia sioni lege ti sarango ye ti ala, ala sara ye alingbi na tënë ti ndia ti mbi, ambela ti mbi nga na akpengba tënë ti mbi. Ala sara ye alingbi na *Ndia so mbi mu ando na akotara ti ala si mbi mu ni na ala na lege ti azo ti kua ti mbi, awayanga-Nzapa.”

¹⁴Me azo ti Israel ama tënë ni pepe. Ala sara ngangu li tongana ti akotara ti ala so ake ando ti ma na be na KOTA GBIA, Nzapa ti ala.

¹⁵Ala ke andia ti KOTA GBIA, ala ke tënë ti *mbuki so lo sara na akotara ti ala, ala ke awango so lo mu na ala. Ala mu peko ti afungo nzapa si ala wani aga ye so afun awe. Ala mu peko ti sarango ye ti amara so alango nduru na ala, ataa so KOTA GBIA ake na azo ti Israel titene ala sara ye pepe tongana ti amara so.

¹⁶Ala zia lege ti atënë kue ti yanga ti KOTA GBIA, Nzapa ti ala, ala mu wen akporo ni si ala leke na ayanda use ti bagara, ala leke mbeni keke aluti na nduzu ndali ti nzapa-wali Ashera. Ala voro aye so kue ayeke na le ti nduzu si ala sara na nzapa *Baal.

¹⁷Ala gbi amolenge ti ala ti koli na amolenge ti ala ti wali na wâ ti mu na *sandaga. Ala gi nda ti aye, ala sara aye ti mazi nde nde. Ala mu tere ti ala ti sara ye so ayeke sioni na le ti KOTA GBIA ti zia ngonzo na be ti lo.

¹⁸Tongaso KOTA GBIA asara ngonzo mingi na tere ti azo ti Israel; lo tumba ala yongoro na tere ti lo. Gi azo ti mara ti Juda laa angba.

¹⁹Me azo ti Juda nga ake ti sara ye alingbi na andia ti KOTA GBIA, Nzapa ti ala. Ala sara ye alingbi gi na atënë ti ndia so azo ti Israel wani azia na sese.

²⁰Ndani laa KOTA GBIA ake azo ti Israel kue; lo zia kamene na le ti ala, lo zia ala na maboko ti azo so ayeke gbu ye ti azo na ngangu. Na ndani, lo tumba ala yongoro na tere ti lo.

²¹So KOTA GBIA azi sese ti Israel na gbe ti komandema ti azo sewa ti David, azo ti Israel amu Yeroboam, molenge ti Nebat ti ga gbia ti ala. Yeroboam asara si azo ti Israel azia lege ti KOTA GBIA, lo sara nga si ala sara kota siokpari.

²²Asiokpari so kue Yeroboam asara ando, azo ti Israel asara ni, ala zia lege ni pepe.

²³Nilaa KOTA GBIA atumba ala yongoro na tere ti lo alingbi na tënë so lo tene na lege ti azo ti kua ti lo so kue ayeke awayanga-Nzapa. Tongaso a mu azo ti Israel na sese ti ala wani, a gue na ala na kodro ti Asirii, ndo so ala ngba daa ngbii asi laso.

²⁴Gbia ti Asirii amu azo ti Babilone, ti Kuta, ti Ava, ti Hamat na ti Sefarvaim aga na ala si lo zia ala na ya ti agbata ti Samarii na plase ti azo ti Israel. Azo ni amu Samarii, aga sese ti ala wani si ala duti na ya ti agbata ni.

²⁵So ala si na Samarii, ala voro *KOTA GBIA pepe. Nilaa KOTA GBIA atokua abamara na tere ti ala si abamara ni afâ azo mingi na popo ti ala.

²⁶Mbeni zo atene na gbia ti Asirii: “Azo so mo ga na ala si mo zia ala na ya ti agbata ti Samarii so, ala hinga lege ti vorongo nzapa ti kodro ni pepe. Ndani laa nzapa ni atokua abamara na tere ti ala si abamara ni afâ ala, ngbanga ti so ala hinga lege ti vorongo nzapa ti kodro ni pepe.”

²⁷Tongaso gbia ti Asirii amu yanga, atene: “Na popo ti awayango-sandaga so mbi mu ala na sese ti Samarii, mbi ga na ala so, ala tokua mbeni oko na Samarii. Fade lo yeke gue ti lango kâ titene lo fa na azo ni lege ti vorongo nzapa ti kodro ni.”

²⁸Mbeni wayango-sandaga oko so a gbu lo si a gue na lo na Samarii, ague, aduti na gbata ti Betel. Lo yeke fa lege ti vorongo KOTA GBIA na azo.

²⁹Me mara oko oko asara yanda ti nzapa ti lo wani, lo zia yanda ni na ya ti ada so akozo zo ti Samarii asara na ando so a leke na ndö ti ahoto ti voro anzapa nde daa. Mara oko oko asara gi tongaso na ya ti gbata so lo lango daa.

³⁰Azo ti Babilone asara yanda ti Sukot-Benot; azo ti Kuta asara yanda ti Nergal; azo ti Hamat asara yanda ti Ashima,

³¹azo ti Ava asara ayanda ti Nibaz na ti Tartak; azo ti Sefarvaim angba ti gbi amolenge ti ala ti koli na wâ ti mu na *sandaga na anzapa ti ala Adramelek na Anamelek.

³²Na mbage, azo ni ayeke voro nga KOTA GBIA. Me ala soro ambeni zo na popo ti ala titene ala ga awayango-sandaga so ayeke sara kua na iri ti ala na ya ti ada ti ando so a leke na ndö ti ahoto ti voro anzapa nde daa.

³³Ala yeke voro KOTA GBIA si na mbage, ala ngba ti sara na anzapa ti ala wani, alingbi na lege ti sarango ye ti amara so azo ti Israel alango na popo ti ala kozo titene a mu azo ti Israel a gue na ala na kodro wande.

³⁴Laso, azo ti Samarii angba ti sara ye tongana ti giriri. Ala yeke voro KOTA GBIA pepe. Ala yeke sara ye alingbi na atënë ti ndia ti ala wani pepe, wala alingbi na lege ti sarango ye ti ala wani pepe. Ala yeke sara nga ye alingbi na ndia ti KOTA GBIA pepe, wala alingbi na yanga so lo mu ando na *ahale ti Jacob pepe; Jacob so KOTA GBIA adi iri ti lo Israel.

³⁵KOTA GBIA asara ando *mbuki na ala si lo mu yanga na ala, lo tene: “Fade ala voro ambeni nzapa nde pepe, ala kuku na gbe ti ala pepe, ala sara kua na anzapa ni so pepe, ala mu asandaga na ala pepe.

³⁶Fade ala yeke voro gi mbi KOTA GBIA oko, mbi so na lege ti kota ngangu ti mbi, na lege ti maboko ti mbi so mbi yoro, mbi sara si ala sigigi na kodro ti Ezipte. Ala yeke kuku gi na gbe ti mbi, ala yeke mu asandaga gi na mbi.

³⁷Fade ala sara ye alingbi na atënë ti yanga ti lo, ambela ti lo, atënë ti ndia nga na andia so lo su na mbeti ndali ti ala; ala sara ye alingbi na ni lakue. Ala voro ambeni nzapa nde pepe.

³⁸Mbuki so mbi sara na ala so, be ti ala agirisa na ni pepe; ala voro ambeni nzapa nde pepe.

³⁹Ala voro gi mbi KOTA GBIA, Nzapa ti ala. Mbi laa mbi yeke zi ande ala na maboko ti awato ti ala kue.”

⁴⁰Me azo ni ama tënë ni pepe; ala ngba ti sara ye tongana ti giriri.

⁴¹Amara ni ayeke voro ando KOTA GBIA si na mbage, ala yeke voro ayanda ti ala. Nilaa amolenge ti ala, na amolenge ti amolenge ti ala angba ti sara ye gi tongana akotara ti ala ngbii asi laso.