Read sango 2 Agbia 18 Bible Online

2 Agbia 18 - sango bible

2 Agbia 18

¹Na ngu ota ni so Osée, molenge ti Ela ayeke gbia ti Israel laa Ezekias, molenge ti Ahaz aga gbia ti Juda.

²Ezekias ayeke na ngu baleuse na oku si lo ga gbia; lo le-gbia ngu baleuse na gumbaya na Jérusalem. Iri ti mama ti lo ayeke Abi, molenge ti Zakarii.

³Ezekias asara ye so ayeke mbirimbiri na le ti *KOTA GBIA gi tongana ti David, kotara ti lo.

⁴Ando so azo aleke na ndö ti ahoto ti voro anzapa nde daa, Ezekias azi ni. Angbongboro têne so azo aleke ni aluti na nduzu, lo kungbi ni na sese; lo fâ na sese akeke so a leke si aluti na nduzu ndali ti nzapa-wali *Ashera; ngbo so Moïse amu bengba wen si aleke na ni, lo fâ ya ni. Biani, azo ti Israel angba ti zö dukani na dawa ti ngbo ni so ngbii asi na ngoi ni kâ. Ala di iri ti ngbo ni Nehushtan.

⁵Ezekias azia be ti lo gi na ndö ti KOTA GBIA, Nzapa ti Israel. Na popo ti agbia ti Juda kue, ala so aga kozo ti lo, wala ala so aga na peko ti lo, mbeni gbia tongana lo ayeke daa pepe.

⁶Lo ngba na lege ti KOTA GBIA, lo zia lege ti lo pepe. Lo sara ye alingbi gi na yanga so KOTA GBIA amu na Moïse.

⁷Nilaa KOTA GBIA ayeke na lo si aye so kue lo yeke sara aga nzoni. Lo tomboka na tere ti gbia ti Asirii si lo ke ti duti na gbe ti lo.

⁸Lo wani, lo hon ndö ti azo ti Filistii na bira, lo tumba peko ti ala ngbii asi na gbata ti Gaza. Lo mu ada so ayo na nduzu si aturugu ayeke luti daa ti baa ndo nga na agbata so a sara gbagba ti bira na tere ni.

⁹Na ngu osio ni so Ezekias ayeke gbia ti Juda, nga na ngu mbarambara ni so Osée, molenge ti Ela ayeke gbia ti Israel, Salmanasar, gbia ti Asirii aga ti tiri bira na gbata ti Samarii si lo ngoro gbata ni.

¹⁰Na peko ti ngu ota, gbia ti Asirii amu gbata ni; so ti tene na ngu omene ni so Ezekias ayeke gbia ti Juda nga na ngu gumbaya ni so Osée ayeke gbia ti Israel.

¹¹Gbia ti Asirii agbu azo ti Israel, ague na ala na kodro ti Asirii; lo zia ambeni na sese ti Hala, ambeni na tere ti ngu ti Habor, na sese ti Gozan si ambeni na ya ti agbata ti Medii.

¹²Aye so kue asi, ngbanga ti so azo ti Israel ama yanga ti *KOTA GBIA, Nzapa ti ala pepe, ala buba ya ti *mbuki ti lo. Aye so kue Moïse, zo ti kua ti KOTA GBIA amu ando yanga na ala ti sarango ni, ala ma ni pepe, ala sara nga ye alingbi na ni pepe.

¹³Na ngu baleoko na osio ni so Ezekias ayeke le-gbia, Senakerib, gbia ti Asirii aga ti tiri bira na agbata kue ti Juda so a sara ngangu gbagba na tere ni si lo mu agbata ni.

¹⁴Ezekias, gbia ti Juda atokua azo na gbia ti Asirii so ayeke na gbata ti Lakish, atene: “Mbi sara sioni awe! Mo zia ti tiri bira na mbi. Ye so kue mo hunda na mbi ti futa, fade mbi yeke futa ni.” Gbia ti Asirii adiko na li ti Ezekias, gbia ti Juda, kilo ti wen ti nginza saki gumbaya, na kilo ti lôro ngbangbo gumbaya.

¹⁵Ezekias amu na lo wen ti nginza so kue ayeke na ya ti kota da ti KOTA GBIA nga na amosoro so kue ayeke na ya ti kubu ti batango amosoro ti yangbo ti gbia.

¹⁶Gi na ngoi ni so laa Ezekias azi lôro na tere ti ayanga ti kota da ti KOTA GBIA nga na tere ti akeke so agbu ayanga ti da ni. Ezekias wani laa azia ando lôro na tere ti ayanga ti da ni. Lo zi ni si lo mu na gbia ti Asirii.

¹⁷Andaa gbia ti Asirii ayeke na gbata ti Lakish. Kâ, lo tokua turugu ti lo ti kota kamba, na makonzi ti akota zo ti kua ti lo nga na makonzi ti aturugu ti batango lo, ala na gba ti aturugu; lo tokua ala na gbia Ezekias na Jérusalem. So ala si kâ awe, ala gue, aluti na tere ti du so ngu ayeke sua daa ti gue na ndo so a yeke bata ngu daa na nduzu; du ni ayeke na lege ti yaka ti azo ti sukulango bongo.

¹⁸Ala hunda ti tene tënë na gbia. Tongaso Eliakim, molenge ti Hilkia, makonzi ti yangbo ti gbia, lo na wakuasu Shebna nga na Yoa, molenge ti Asaf, zo ti tenengo peko ti tënë ti yanga ti gbia, asigigi ti wara ala.

¹⁹Makonzi ti aturugu ti batango gbia ti Asirii atene na ala: “Ala gue, atene na Ezekias, atene: Tënë so kota gbia, gbia ti Asirii atene ayeke so: ‘So ziango be ti nyen laa mo zia na ndö ti ye so!

²⁰Mo baa ti mo, mo tene, gi asenge tënë ti yanga laa alingbi titene zo atiri bira na ngangu? Zo wa laa mo zia be ti mo na ndö ti lo si mo tomboka na tere ti mbi so?

²¹Baa, fadeso mo zia be ti mo na ndö ti Ezipte so ayeke tongana sosongo so afâ awe. Tongana zo agbu ni ti luti daa, ayeke kpo ya ti maboko ti lo. Faraon, gbia ti Ezipte ayeke nga tongaso ndali ti azo so kue azia be ti ala na ndö ti lo.

²²Gbaa, ala yeke tene na mbi, atene: E zia be ti e na ndö ti KOTA GBIA, Nzapa ti e. Me mo, Ezekias laa mo zi lani ando so a leke na ndö ti ahoto ti voro lo daa; mo zi nga agbalaka ti lo si mo mu yanga na azo ti Juda nga na azo ti Jérusalem ti voro KOTA GBIA gi na dawa ti gbalaka so na Jérusalem!

²³Fadeso mo na gbia ti mbi, gbia ti Asirii atö, e baa: fade mbi yeke mu na mo ambarata saki use tongana mo lingbi ti wara azo ti kpengo na ala!

²⁴Na popo ti azo ti kua ti gbia ti mbi, ataa gi kete ni oko, mo lingbi ti tumba lo? Mo so mo zia be ti mo gi na ndö ti Ezipte titene mo wara apusu ti mbarata na azo ti kpengo na ni so!

²⁵KOTA GBIA biani laa ayeda titene gbia ti mbi ague ti tiri bira na ndo so a buba ni! KOTA GBIA laa atene na lo: Mo gue, mo tiri bira na kodro so, mo buba ni kue!’ ”

²⁶Tongaso Eliakim, molenge ti Hilkia, Shebna na Yoa atene na makonzi ti aturugu ti batango gbia, atene: “E gbu gere ti mo, mo tene tënë na e, azo ti gbe ti mo, na yanga ti arameen, ngbanga ti so e yeke ma ni. Me mo tene tënë ni na yanga ti hebro pepe, ngbanga ti azo so aduti na ndö ti gbagba ti gbata ni.”

²⁷Me makonzi ti aturugu ni akiri tënë na ala, atene: “Gbia ti mbi atokua mbi ti tene tënë so gi na ala nga na gbia ti ala oko? Tënë ni ayeke nga ndali ti azo so aduti na ndö ti gbagba ti gbata ni, azo so fade ayeke te puru ti ala wani si ala yeke nyon inon ti ala tongana ti so ala na gbia ti ala ayeke sara ni ande.”

²⁸Na pekoni, makonzi ti aturugu ti batango gbia ti Asirii aluti na nduzu si lo dekongo na kota go na yanga ti hebro, lo tene: “Ala ma tënë ti kota gbia, gbia ti Asirii si!

²⁹Tënë so gbia atene ayeke so: ‘Ala zia Ezekias ahanda ala pepe; lo lingbi ti zi ala na maboko ti mbi pepe.

³⁰Lo hunda na ala titene ala zia be ti ala na ndö ti KOTA GBIA, atene: Fade KOTA GBIA ayeke zi e biani biani; fade gbata so ayeke ti na maboko ti gbia ti Asirii pepe. So mvene laa.

³¹Ala ma tënë ti Ezekias pepe, me ala ma gi tënë so gbia ti Asirii ayeke tene na ala; lo tene: Ala sara songo na mbi, ala zia tere ti ala na maboko ti mbi si fade zo oko oko na popo ti ala ayeke te le ti *vinye ti lo na le ti keke ti fige ti lo si lo yeke nyon ngu ti du ti ngu ti lo.

³²Na pekoni, mbi yeke ga ti mu ala, ti gue na ala na mbeni sese so ayeke tongana sese ti ala, sese so *ble na fini vin ayeke daa, sese so kobe na vin asi singo daa, sese ti akeke ti olive na ti mafuta ti wotoro. Tongaso, fade ala yeke kui pepe, ala yeke ngba na fini. Ala ma Ezekias pepe; biani, lo yeke handa ala, lo tene: Fade KOTA GBIA ayeke zi e!

³³Anzapa ti amara nde, mbeni oko awara lege ti zi kodro ti lo wani na maboko ti gbia ti Asirii awe?

³⁴Anzapa ti Hamat na ti Arpad ayeke na ndo wa? Anzapa ti Sefarvaim, ti Hena na ti Ava ayeke na ndo wa? Mbeni nzapa azi gbata ti Samarii na maboko ti mbi awe?

³⁵Na popo ti anzapa kue ti akodro so, nzapa wa laa azi kodro ti lo na maboko ti mbi si fade KOTA GBIA alingbi ti zi Jérusalem na maboko ti mbi?’ ”

³⁶Azo ni kue azi yanga oko pepe; zo oko akiri tënë pepe, ngbanga ti so yanga so gbia amu fade ayeke so: “Fade ala kiri tënë na lo pepe.”

³⁷Na pekoni, Eliakim, molenge ti Hilkia, makonzi ti yangbo ti gbia, lo na wakuasu Shebna nga na Yoa, molenge ti Asaf, zo ti tenengo peko ti tënë ti yanga ti gbia asuru bongo na tere ti ala. Ala kiri na tere ti Ezekias si ala tene na lo peko ti tënë ti makonzi ti aturugu ti batango gbia ti Asirii.