Read sango 2 Agbia 20 Bible Online

2 Agbia 20 - sango bible

2 Agbia 20

¹Na ngoi ni so, tere ti Ezekias aso nduru na kuâ. Wayanga-Nzapa Ésaïe, molenge ti Amoz aga abaa lo si atene na lo: “Tënë so *KOTA GBIA atene ayeke so: Mo leke tënë ti aye ti da ti mo biani, ngbanga ti so mo yeke kui, mo yeke ngba na fini pepe.”

²Tongaso Ezekias azia le ti lo na mbage ti dere ti da si lo sambela KOTA GBIA, lo tene:

³“Ae! KOTA GBIA, mbi gbu gere ti mo, mo dabe ti mo so mbi sara ye na le ti mo na lege ti taa-tënë si mbi sara ni na be ti mbirimbiri. Mbi sara nga ye so ayeke nzoni na le ti mo.” Na pekoni Ezekias atoto mingi.

⁴Ésaïe ade ti sigigi na ya ti kota gbagba ti yangbo ti gbia pepe si tënë ti KOTA GBIA asi na lo, atene:

⁵“Kiri, mo tene na Ezekias, makonzi ti azo ti mbi, mo tene: Tënë so KOTA GBIA, Nzapa ti David, kotara ti mo atene ayeke so: ‘Mbi ma sambela ti mo awe, mbi baa ngu ti le ti mo awe. Baa, mbi yeke kai kobela ti mo. Na peko ti lango ota, mo yeke kiri ti gue na ya ti kota da ti KOTA GBIA.

⁶Mbi yeke zia ngu baleoko na oku na ndö ti lango ti fini ti mo. Fade mbi yeke zi mo nga na gbata so na maboko ti gbia ti Asirii. Mbi yeke bata gbata so ndali ti mbi nga ndali ti David, zo ti kua ti mbi.’ ”

⁷Ésaïe atene: “Ala mu mbeni gba ti holengo le ti fige so akpa gatoo so a nika ni nikango, ala zia na le ti ka ni si kobela ti lo akai.”

⁸Ezekias ahunda Ésaïe, atene: “Nyen laa ayeke fa na mbi atene, KOTA GBIA ayeke kai kobela ti mbi si na peko ti lango ota, mbi yeke kiri ti gue na ya ti kota da ti KOTA GBIA?”

⁹Ésaïe akiri tënë: “Ye so ayeke fa ande na mo atene, KOTA GBIA ayeke sara ye alingbi na tënë so lo tene ayeke so: Mo ye titene gbe ti de ti lâ ague na li ni alingbi na bingo gere baleoko wala akiri na peko alingbi na bingo gere baleoko?”

¹⁰Ezekias akiri tënë: “Titene gbe ti de ti lâ ague na li ni alingbi na bingo gere baleoko, so ayeke ngangu pepe. Me ti mbi, mbi ye titene gbe ti de ni akiri na peko alingbi na bingo gere baleoko.”

¹¹Tongaso wayanga-Nzapa Ésaïe avoro KOTA GBIA si KOTA GBIA akiri na gbe ti de ni na peko alingbi na bingo gere baleoko; so ti tene na ndö ti eskalie ti Ahaz.

¹²Na ngoi ni so, Merodak-Baladan, gbia ti Babilone, molenge ti Baladan ama tënë ti songo tere ti Ezekias. Tongaso lo tokua na lo mbeti nga na akadoo.

¹³Ezekias ayamba alembe ni; na pekoni, lo fa na ala ada so kue lo yeke bata amosoro ti lo daa, wen ti nginza, lôro, yombo na mafuta ti yombo. Lo fa nga na ala ndo so lo yeke bata aye ti bira ti lo daa, nga na aye so kue ayeke na ya ti kubu so a bata amosoro ti lo daa. Ezekias afa aye ti yangbo ti lo kue na aye ti kodro ti lo kue na ala; lo honde mbeni ye oko pepe.

¹⁴Na pekoni, wayanga-Nzapa Ésaïe aga awara gbia Ezekias si ahunda lo, atene: “Azo so atene na mo nyen? Ala londo na ndo wa?” Ezekias akiri tënë: “Ala londo na yongoro ndo, na Babilone.”

¹⁵Ésaïe atene: “Nyen laa ala baa na yangbo ti mo, nyen?” Ezekias akiri atene: “Ala baa aye so kue ayeke na ya ti yangbo ti mbi: aye ti ya ti kubu ti da so a bata amosoro ti mbi daa; mbi honde mbeni ye oko na ala pepe.”

¹⁶Tongaso Ésaïe atene na Ezekias: “Mo ma tënë ti *KOTA GBIA:

¹⁷‘Mbeni lango ayeke ga so a yeke mu aye ti yangbo ti mo kue, na aye so kue agbia so aga kozo ti mo abongbi ando ngbii asi laso, ti gue na ni na Babilone. Biani, KOTA GBIA atene, fade mbeni ye oko ayeke ngba ge pepe.

¹⁸Na popo ti amolenge ti mo, ala so mo wani, mo du ala, fade a yeke mu ambeni ti gue na ala titene ala ga *ambaiwa na yangbo ti gbia ti Babilone.’ ”

¹⁹Ezekias akiri tënë na Ésaïe: “Tënë ti KOTA GBIA so mo tene so ayeke nzoni.” Ezekias atene na be ti lo: “Biani, na lango so kue mbi yeke ngba na fini, fade e yeke duti na siriri si mbeni sioni ye oko ayeke si na e pepe.”

²⁰Tanga ti atënë na ndö ti Ezekias, na aye ti koli so kue lo sara, na kota du ti ngu so lo zi, na du so lo zi na gbe ti sese titene ngu asua daa ti li na ya ti gbata ni, a su tënë ni na ya ti “Mbeti ti aye so agbia ti Juda asara”.

²¹Ezekias akui, lo hon na peko ti ababâ ti lo. Molenge ti lo Manase laa aga gbia na peko ti lo.