Read sango 2 Agbia 21 Bible Online

2 Agbia 21 - sango bible

2 Agbia 21

¹Manase ayeke na ngu baleoko na use si lo ga gbia; lo le-gbia ngu baleoku na oku na Jérusalem. Iri ti mama ti lo ayeke Hefsi-Ba.

²Lo sara ye so ayeke sioni na le ti *KOTA GBIA. Lo mu gi peko ti asioni sarango ye ti amara so KOTA GBIA atumba ala na ya ti kodro ni si lo mu kodro ni na azo ti Israel; sioni sarango ye so zo alingbi ti baa na le ti lo fani use pepe.

³Ando so azo aleke na ndö ti ahoto ti voro anzapa nde daa, babâ ti lo Ezekias azi ni kue; me Manase akiri aleke ni. Lo sara agbalaka ndali ti *Baal, lo leke mbeni keke aluti na nduzu ndali ti nzapa-wali *Ashera tongana ti so Akab, gbia ti Israel asara ando. Manase akuku na gbe ti aye mingi mingi so ayeke na le ti nduzu si lo sara na ala.

⁴Lo sara agbalaka ndali ti anzapa nde na ya ti kota da ti KOTA GBIA na Jérusalem, da so KOTA GBIA atene tënë ndali ni, atene: “Fade mbi yeke sara titene iri ti mbi aduti kâ.”

⁵Lo leke agbalaka na ya ti agbagba use ti kota da ti KOTA GBIA ndali ti aye mingi mingi so ayeke na le ti nduzu.

⁶Lo gbi molenge ti lo ti koli na wâ ti mu na *sandaga; lo gi nda ti aye, lo sara mazi; lo zia azo titene ala hunda yingo ti akuâ si ala fa nda ti aye so ayeke na hondengo ni. Lo kiri lo sara sioni so ague guengo na nduzu ti ke KOTA GBIA, ye so azia ngonzo na be ti lo.

⁷Lo sara yanda ndali ti nzapa-wali Ashera si lo zia ni na ya ti kota da ti KOTA GBIA. Andaa KOTA GBIA atene ando na David nga na molenge ti lo Salomon, atene: “Na ya ti kota da so nga na Jérusalem, gbata so mbi soro na popo ti agbata ti amara kue ti Israel laa mbi yeke sara titene iri ti mbi aduti daa kpu na kpu.

⁸Tongana azo ti Israel asara ye kue alingbi na yanga so mbi mu na ala, na andia so Moïse, zo ti kua ti mbi amu na ala, fade mbi yeke sara si ala kiri afono kirikiri pepe yongoro na sese so mbi zia ndali ti akotara ti ala.”

⁹Me azo ti Juda ama yanga ti KOTA GBIA pepe. Manase apusu ala titene ala kiri asara sioni ahon amara so KOTA GBIA afâ ando ala kue kue kue na dawa ti azo ti Israel so.

¹⁰Nilaa KOTA GBIA atene tënë na lege ti azo ti kua ti lo, awayanga-Nzapa, atene:

¹¹“Manase, gbia ti Juda asara asioni ye so kue zo alingbi ti baa na le ti lo fani use pepe; lo sara asioni ye ni ahon azo ti mara ti Amori so ayeke kozoni na lo; lo pusu nga azo ti Juda ti sara siokpari na lege ti ayanda ti lo.

¹²Ndani laa, tënë so KOTA GBIA, Nzapa ti Israel atene ayeke so: ‘Fade mbi yeke sara si mbeni kota kpale ati na ndö ti Jérusalem nga na ndö ti Juda. Azo so kue ayeke ma tënë ni, fade ayeke toto na mê ti ala tongana sungbango ti bekpa.

¹³Fade mbi yeke buba gbata ti Jérusalem tongana ti so mbi buba ando gbata ti Samarii kue si mbi fâ azo ti sewa ti Akab kue so. Mbi yeke sara titene Jérusalem aga tongana sembe so zo asu ya ni si akuku ni na sese.

¹⁴Fade mbi yeke ke tanga ti azo ti mbi so ayeke ngba na fini si mbi yeke zia ala na maboko ti awato ti ala; awato ti ala ni ayeke nzi ala si ayeke gbu aye ti ala kue na peko ti bira.

¹⁵Mbi yeke sara aye so na ala, ngbanga ti so ala sara ye so ayeke sioni na le ti mbi. Ti londo na lango so akotara ti ala asigigi na sese ti Ezipte ngbii asi laso, ala ngba ti zia ngonzo na be ti mbi.’ ”

¹⁶Na ndö ni kue, Manase afâ gba ti azo so asara sioni oko pepe si mene ti azo ni amu ya ti gbata ti Jérusalem kue. Siokpari ti fango azo ni aga na ndö ti siokpari so lo sara ti pusu azo ti Juda ti sara ye so ayeke sioni na le ti KOTA GBIA.

¹⁷Tanga ti atënë na ndö ti Manase, aye so kue lo sara nga na siokpari so lo sara, a su tënë ni na ya ti “Mbeti ti aye so agbia ti Juda asara”.

¹⁸Manase akui, lo hon na peko ti ababâ ti lo si a lu lo na ndo so a lu apendere kongo daa na ya ti yangbo ti lo; iri ti ndo ni ayeke “Ndo ti apendere kongo ti Uza”. Molenge ti lo Amon laa aga gbia na peko ti lo.

¹⁹Amon ayeke na ngu baleuse na use si lo ga gbia; lo le-gbia ngu use na Jérusalem. Iri ti mama ti lo ayeke Meshulemet, molenge ti Harus, zo ti gbata ti Yotba.

²⁰Amon asara ye so ayeke sioni na le ti *KOTA GBIA tongana ti babâ ti lo Manase.

²¹Lo mu gi peko ti sarango ye ti babâ ti lo. Lo nga lo voro ayanda so babâ ti lo avoro ala lani si lo kuku na gbe ti ayanda ni.

²²Lo do KOTA GBIA, Nzapa ti akotara ti lo, lo zia si lo tambula na lege ti KOTA GBIA pepe.

²³Azo ti kua ti Amon aleke tënë na tere ti lo na hondengo ni si ala fâ lo na yangbo ti lo.

²⁴Me azo ti kodro ni afâ azo so kue aleke tënë na tere ti gbia Amon. Na pekoni, ala mu molenge ti lo Yosias si lo ga gbia na peko ti babâ ti lo.

²⁵Tanga ti atënë na ndö ti Amon na aye so lo sara, a su tënë ni na ya ti “Mbeti ti aye so agbia ti Juda asara”.

²⁶A lu lo na sende ti kuâ ti lo so ayeke na ndo so a iri ni “Ndo ti apendere kongo ti Uza”. Molenge ti lo Yosias laa aga gbia na peko ti lo.