Read sango 2 Agbia 23 Bible Online

2 Agbia 23 - sango bible

2 Agbia 23

¹Gbia Yosias airi *akangba kue ti Juda na ala ti Jérusalem ti bongbi na tere ti lo.

²Na pekoni, lo gue na ya ti kota da ti *KOTA GBIA, lo na azo ti Juda kue, na ala ti Jérusalem kue, awayango-sandaga, awayanga-Nzapa nga na azo ti kodro kue, ti londo na akota zo ngbii asi na akete zo. Gbia adiko na mê ti ala atënë kue ti ya ti mbeti ti *mbuki so a wara na ya ti kota da ti KOTA GBIA so.

³Gbia aluti na ndö ti mbeni ye so a leke na nduzu ndali ti agbia si lo kiri lo leke tënë ti ga mbuki na KOTA GBIA. Alingbi fade zo oko oko amu zendo ti tambula na peko ti KOTA GBIA, ti sara ye na be ti lo kue nga na tënë ti be ti lo kue alingbi na atënë ti ndia ti KOTA GBIA, ambela ti lo na aye so lo fa. Alingbi fade zo oko oko asara ye alingbi na atënë ti mbuki so a su na ya ti mbeti so. Nilaa azo kue ayeda na tënë ti mbuki ni.

⁴Gbia amu yanga na kota wayango-sandaga Hilkia, na awayango-sandaga so ayeke mu maboko na lo nga na azo so ayeke bata yanga ti kota da ti Nzapa titene aye so a leke ando ti voro na Baal, na Ashera nga na aye mingi mingi so ayeke na le ti nduzu, ala sigigi na ni na ya ti da ni, ala gbi ni na gigi ti gbata ti Jérusalem, na popo-hoto ti Sedron. Na pekoni, ala mu mburu ti wâ ni, ala gue na ni na Betel.

⁵Yosias atumba awayango-sandaga so ayeke taa awayango-sandaga pepe, ala so agbia ti Juda asoro ala titene ala zö dukani na ando so azo aleke na ndö ti ahoto ti voro anzapa nde daa so; ala so ayeke na ya ti agbata ti Juda nga na ya ti akodro so ayeke na tere ti Jérusalem. Lo tumba nga awayango-sandaga so ayeke zö dukani ndali ti Baal, ndali ti lâ, ndali ti nze, ndali ti atongoro nga ndali ti aye mingi mingi so ayeke na le ti nduzu.

⁶Lo zi na ya ti kota da ti *KOTA GBIA keke so a leke si aluti na nduzu ndali ti nzapa-wali *Ashera; lo sigigi na ni na ya ti gbata ti Jérusalem si a gbi ni na popo-hoto ti Sedron; a gbi ni kue si aga mburu ti wâ. Na pekoni a mu mburu ti wâ ni, a tuku na ndo so adu ti kuâ ti asenge zo ti kodro ayeke daa.

⁷Yosias akungbi na sese ada so azo aleke ndali ti akoli-ndumba si ayeke na ya ti kota da ti KOTA GBIA. Kâ, awali ayeke leke abongo ndali ti azo ti vorongo Ashera.

⁸Yosias airi awayango-sandaga ti agbata ti Juda kue ti ga na Jérusalem. Ti londo na Geba ngbii asi na Bersheba, lo sara si ando so azo aleke na ndö ti ahoto ti voro anzapa nde daa so aga *sioni; ndo so awayango-sandaga azö dukani daa. Na Jérusalem, Yosias akungbi na sese agbalaka so ayeke nduru na ayanga ti gbata ni, mbirimbiri gbalaka so ayeke na tere ti yanga ti gbata so ayeke ti Yoshua, govoronere ti gbata ni. Tongana zo ayeke li na ya ti gbata ni, gbalaka ni ayeke na mbage ti maboko ti wali.

⁹Awayango-sandaga so ayeke sara kua na ando so azo aleke na ndö ti ahoto ti voro anzapa nde daa, a kanga lege na ala ti ya asandaga na ndö ti gbalaka ti KOTA GBIA so ayeke na Jérusalem; me ala lingbi ti te gi mapa so a sara na mama ni pepe tongana amba ti ala.

¹⁰Yosias asara si Tofet so ayeke na popo-hoto ti Hinom aga *sioni, tongaso si azo akiri agbi amolenge ti ala ti koli na ti wali na wâ pepe ti mu na *sandaga na nzapa Molek.

¹¹Lo zi ambarata so agbia ti Juda azia ala nde ndali ti vorongo na lâ. Ambarata ni so ayeke na yanga ti kota da ti KOTA GBIA, nduru na kubu ti kota zo ti kua Netan-Melek, na ya ti ada so a sara ni si agbu tere na kota da ni. Yosias agbi apusu ti mbarata so a leke ndali ti lâ.

¹²Gbia akungbi na sese agbalaka so ayeke na li ti da-nduzu ti Akab; agbalaka so agbia ti Juda asara. Lo kungbi nga na sese agbalaka so Manase aleke na ya ti agbagba use ti kota da ti KOTA GBIA. Yosias afâ ya ni nduru nduru si lo tuku ni na popo-hoto ti Sedron.

¹³Ando so azo aleke na ndö ti ahoto si ayeke baa le na Jérusalem, na mbage ti Mbongo, gbia asara si aga *sioni. Salomon, gbia ti Israel asara ando ni ndali ti Astarte, fungo nzapa-wali ti azo ti Sidon. Salomon asara nga ni ndali ti Kemosh, fungo nzapa ti azo ti Moab, ndali ti Milkom, fungo nzapa ti azo ti Amon.

¹⁴Yosias afâ ya ti angbongboro têne so a leke si aluti na nduzu, lo de na sese akeke so a leke ndali ti Ashera. Lo mu abio ti akuâ, lo zia na ndö ni.

¹⁵Yosias akungbi ni na sese gbalaka so ayeke na gbata ti Betel nga na ndo so ayeke na ndö ti hoto so Yeroboam asara ti pusu azo ti Israel ti sara siokpari. Lo gbi ndo ni nga na keke so a leke si aluti na nduzu ndali ti nzapa-wali *Ashera, lo gbi ni si aga fuku.

¹⁶Na pekoni, Yosias abaa ndo na peko si lo baa adu ti kuâ so ayeke na li ti hoto. Lo tokua azo ti mu abio so ayeke na ya ti adu ti kuâ ni si lo gbi ni na ndö ti gbalaka ni. Lo sara si gbalaka ni aga *sioni alingbi na tënë ti *KOTA GBIA so wayanga ti lo atene ando.

¹⁷Yosias ahunda, atene: “Sende ti kuâ wa laa mbi yeke baa so?” Azo ti gbata ni akiri tënë na lo, atene: “Du ti kuâ ti wayanga-Nzapa so alondo na Juda aga so laa. Lo laa lo tene tënë ti aye so kue mo sara na gbalaka ti Betel so.”

¹⁸Tongaso gbia atene: “Ala zia du ti kuâ ni kpoo! Zo andu abio ti wayanga-Nzapa so pepe!” Lege so ala bata abio ti lo nga na abio ti wayanga-Nzapa so alondo na Samarii si aga so laa.

¹⁹Na ya ti agbata ti Samarii, agbia ti Israel aleke lani na ndö ti ahoto ando ti vorongo anzapa nde daa. Ye so agbia so asara so azia ngonzo mingi na be ti KOTA GBIA. Yosias akungbi nga na sese ada so kue gi tongana ti so lo sara na Betel.

²⁰Na ndö ti agbalaka ni, lo fâ go ti awayango-sandaga so kue ayeke sara kua na ando so azo aleke na ndö ti ahoto ti voro anzapa nde daa; lo gbi na ndö ti agbalaka ni abio ti azo. Na pekoni, lo kiri na Jérusalem.

²¹Gbia amu yanga so na azo ti kodro kue, atene: “Ala sara *matanga ti Pake ndali ti *KOTA GBIA, Nzapa ti ala alingbi na tënë so a su na ya ti mbeti ti *mbuki.”

²²Ti londo na ngoi so awafango-ngbanga ayeke sara komandema na Israel ngbii asi na ngoi ti agbia ti Israel na ala ti Juda, azo asara mara ti matanga ti Pake tongaso pepe.

²³Gi na ngu baleoko na miombe ni so Yosias ayeke gbia laa ala sara mara ti matanga ti Pake tongaso ndali ti KOTA GBIA na Jérusalem.

²⁴Yosias aye ti sara ye alingbi na atënë ti *Ndia so a su na ya ti buku so kota wayango-sandaga Hilkia awara na ya ti kota da ti *KOTA GBIA na Jérusalem. Nilaa lo tumba na sese ti Juda nga na Jérusalem azo so ayeke hunda ayingo ti akuâ. Lo buba ayanda nde nde so azo ayeke voro nga na afungo nzapa so kue zo abaa na Jérusalem nga na sese ti Juda.

²⁵Kozoni na Yosias, mbeni gbia tongana lo ayeke daa pepe so amu be ti lo kue, tere ti lo kue na ngangu ti lo kue ti kiri na mbage ti KOTA GBIA alingbi na Ndia ti Moïse. Na peko ti Yosias, mbeni gbia so aduti tongana lo ayeke daa pepe.

²⁶Me kota ngonzo ti KOTA GBIA akai pepe, ngonzo ti lo so alondo tongana wâ na tere ti azo ti Juda ndali ti asioni ye so kue Manase asara ti zia ngonzo na be ti lo.

²⁷Ndani laa KOTA GBIA atene: “Fade mbi yeke tumba azo ti Juda yongoro na le ti mbi tongana ti so mbi tumba ando azo ti Israel so. Mbi yeke ke Jérusalem, gbata so mbi soro ni; mbi yeke ke kota da so mbi mu ando zendo titene iri ti mbi aduti daa.”

²⁸Tanga ti atënë na ndö ti Yosias na aye so kue lo sara, a su tënë ni na ya ti “Mbeti ti aye so agbia ti Juda asara”.

²⁹Na ngoi so Yosias ayeke gbia, Faraon Neko, gbia ti Ezipte ague ti wara tere na gbia ti Asirii na mbage ti *bale ti Efrate. Gbia Yosias ague ti tiri bira na lo, me gi na ya ti kozo tengbingo tere ni, a fâ Yosias na Megido.

³⁰So lo kui awe, aturugu ti lo amu kuâ ti lo na Megido, ala zia na ya ti pusu ti mbarata si ala gue na ni na Jérusalem. A lu lo na ya ti du ti kuâ ti lo. Azo ti kodro amu Yoakaz, molenge ti Yosias, ala tuku mafuta na li ti lo si ala zia lo gbia na peko ti babâ ti lo.

³¹Yoakaz ayeke na ngu baleuse na ota si lo ga gbia; lo le-gbia nze ota na Jérusalem. Iri ti mama ti lo ayeke Hamutal, molenge ti Irmeya, zo ti gbata ti Libna.

³²Yoakaz asara ye so ayeke sioni na le ti *KOTA GBIA gi tongana ti akotara ti lo.

³³Faraon Neko agbu lo si abi lo na da ti kanga na Ribla, na sese ti Hamat titene lo kiri lo le-gbia na Jérusalem pepe. Faraon Neko agbu azo ti Juda na ngangu ti futa na lo lapo: kilo saki ota ti wen ti nginza, kilo baleota ti lôro.

³⁴Na pekoni Neko amu Eliakim, molenge ti Yosias, azia lo gbia na peko ti babâ ti lo. Lo zia fini iri na ndö ti lo so atene Yoakim. Ti Yoakaz, Neko agbu lo ti ga zo ti kanga, lo gue na lo na Ezipte si lo kui kâ.

³⁵Titene Yoakim amu na Faraon Neko wen ti nginza na lôro so lo hunda, alingbi Yoakim asara konde ti amosoro ti ya ti kodro ni kue, lo gbu azo na ngangu ti futa lapo so a hunda na ala. So zo oko oko afuta ni awe, Yoakim amu wen ti nginza ni na lôro ni na Neko.

³⁶Yoakim ayeke na ngu baleuse na oku si lo ga gbia; lo le-gbia ngu baleoko na oko na Jérusalem. Iri ti mama ti lo ayeke Zebuda, molenge ti Pedaya, zo ti gbata ti Ruma.

³⁷Yoakim asara ye so ayeke sioni na le ti *KOTA GBIA gi tongana ti akotara ti lo.