Read sango 2 Agbia 24 Bible Online

2 Agbia 24 - sango bible

2 Agbia 24

¹Na ngoi so Yoakim ayeke le-gbia, Nabukodonosor, gbia ti Babilone ali na sese ti Juda ti tiri bira. Yoakim angba na gbe ti lo ngu ota. Me lo kiri lo londo si lo tomboka na tere ti Nabukodonosor.

²*KOTA GBIA atokua na tere ti Yoakim gba ti azo ti Babilone so ayeke gbu ye ti azo na ngangu, ala ti Sirii, ala ti Moab na ala ti Amon. Ala tuku na ya ti kodro-gbia ti Juda si abuba kodro ni kue alingbi na tënë ti yanga ti KOTA GBIA so lo tene na lege ti azo ti kua ti lo, awayanga-Nzapa.

³Aye so kue asi na azo ti Juda gi na peko ti yanga so KOTA GBIA amu titene a tumba ala yongoro na le ti lo. A tumba azo ni yongoro na le ti KOTA GBIA ndali ti siokpari ti gbia Manase

⁴nga ndali ti azo so asara sioni pepe si Manase afâ ala senge senge; mene ti ala atuku si amu ya ti gbata ti Jérusalem kue. KOTA GBIA ake ti zi tënë ni na li ti lo.

⁵Tanga ti atënë na ndö ti Yoakim, na aye so kue lo sara, a su tënë ni na ya ti “Mbeti ti aye so agbia ti Juda asara”.

⁶Yoakim akui, lo hon na peko ti ababâ ti lo. Molenge ti lo Yoakin laa aga gbia na peko ti lo.

⁷Gbia ti Ezipte akiri asigigi na ya ti kodro ti lo pepe, ngbanga ti so gbia ti Babilone amu asese so kue ayeke ando na gbe ti komandema ti gbia ti Ezipte, ti londo na katikati ti kodro ni na Banga ti Ezipte ngbii asi na *bale ti Efrate.

⁸Yoakin ayeke na ngu baleoko na miombe si lo ga gbia; lo le-gbia nze ota na Jérusalem. Iri ti mama ti lo ayeke Nehusheta, molenge ti Elnatan, zo ti Jérusalem.

⁹Yoakin asara ye so ayeke sioni na le ti *KOTA GBIA gi tongana ti babâ ti lo.

¹⁰Na ngoi ni so, aturugu ti Babilone ague ti tiri bira na Jérusalem. Aturugu ti kota kamba ti Nabukodonosor, gbia ti Babilone laa ayeke na ndö ti ala. Ala ngoro gbata ni kue ti mu na bira.

¹¹Na ndembe so aturugu ti lo angoro gbata ni, Nabukodonosor, gbia ti Babilone wani aga na dawa ti gbata ni.

¹²Tongaso Yoakin, gbia ti Juda, lo na mama ti lo, na amakonzi ti lo, na aturugu ti lo ti kota kamba nga na akota zo ti yangbo ti lo ague, awara gbia ti Babilone. Na ngu miombe ni so Nabukodonosor ayeke gbia ti Babilone laa lo gbu Yoakin si lo bi lo na da ti kanga.

¹³Nabukodonosor amu amosoro so kue a bata na ya ti kubu ti kota da ti KOTA GBIA, na amosoro so a bata na ya ti kubu ti yangbo ti gbia, lo gue na ni alingbi gi na tënë so KOTA GBIA atene. Lo fâ ya ti aye so kue Salomon, gbia ti Israel aleke na lôro si lo zia na ya ti kota da ti KOTA GBIA so.

¹⁴Nabukodonosor agbu azo ti Jérusalem kue, lo gue na ala na sese ti Babilone: akota zo kue, na angangu zo ti tiringo bira so kue wungo ti ala ayeke saki baleoko. Awakode-kua kue na azo ti pikango ndao kue, lo gbu ala, lo gue na ala; gi awayere laa angba na ya ti gbata ni.

¹⁵Lo gbu Yoakin, mama ti lo, awali ti lo, akota zo ti yangbo ti lo nga na akota zo ti kodro ti lo; lo gbu ala na Jérusalem si lo gue na ala na Babilone.

¹⁶Lo gbu nga angangu zo ti tiringo bira so wungo ti ala ayeke saki mbarambara, na awakode-kua na azo ti pikango ndao so wungo ti ala ayeke saki oko; lo gbu angangu koli so kue alingbi ti tiri bira si lo gue na ala na Babilone.

¹⁷Na pekoni, gbia ti Babilone amu Matania, ita ti babâ ti Yoakin, azia lo gbia ti Juda. Lo zia fini iri na ndö ti lo so atene Sedesias.

¹⁸Sedesias ayeke na ngu baleuse na oko si lo ga gbia; lo le-gbia ngu baleoko na oko na Jérusalem. Iri ti mama ti lo ayeke Hamutal, molenge ti Irmeya, zo ti gbata ti Libna.

¹⁹Sedesias asara ye so ayeke sioni na le ti *KOTA GBIA gi tongana ti so Yoakim asara lani.

²⁰Akpale so aga na ndö ti Jérusalem nga na ndö ti Juda ndali ti ngonzo ti KOTA GBIA; ye so asara si lo tumba ala yongoro na tere ti lo. Sedesias atomboka na tere ti Nabukodonosor, gbia ti Babilone.