Read sango 2 Agbia 3 Bible Online

2 Agbia 3 - sango bible

2 Agbia 3

¹Na ngu baleoko na miombe ni so Yosafat ayeke gbia ti Juda, Yoram, molenge ti Akab aga gbia ti Israel. Lo le-gbia ngu baleoko na use na Samarii.

²Yoram asara ye so ayeke sioni na le ti *KOTA GBIA. Me lo sara ni tongana ti babâ ti lo na mama ti lo pepe, ngbanga ti so têne so babâ ti lo aleke ando aluti na nduzu na iri ti *Baal so, lo zi ni.

³Me lo ngba ti sara siokpari so Yeroboam, molenge ti Nebat asara lani si lo pusu azo ti Israel ti sara ni; lo zia lege ni pepe.

⁴Mesha, gbia ti Moab ayeke na ataba mingi. Na ya ti ngu oko oko, lo yeke mu na gbia ti Israel akete taba saki ngbangbo oko, na akoli-taba saki ngbangbo oko so kua ti tere ti ala angba daa ti futa na lapo.

⁵Me tongana Akab akui awe, gbia ti Moab atomboka na tere ti fini gbia ti Israel.

⁶Gbia Yoram alondo hio na gbata ti Samarii ti gue ti baa aturugu ti Israel kue.

⁷Na pekoni, lo tokua azo ti tene na Yosafat, gbia ti Juda, atene: “Gbia ti Moab atomboka na tere ti mbi. Mo ye ti ga ti wara mbi titene e gue, e tiri bira na kodro ti Moab?” Gbia ti Juda akiri tënë, atene: “Nzoni, mbi yeke ga! Mbi na mo, e yeke oko; aturugu ti mbi ayeke aturugu ti mo; ambarata ti mbi ayeke ambarata ti mo.”

⁸Lo kiri lo tene: “Fade e yeke mu lege wa?” Yoram akiri tënë: “Fade e yeke mu lege ti benyama ti Edom.”

⁹Gbia ti Israel, gbia ti Juda na gbia ti Edom alondo ti gue. Ala mu mbeni lege so angoro ngorongo. Ala tambula na ya ti lango mbarambara. Me ngu atia ndali ti aturugu na anyama so ayeke tambula na peko ti ala.

¹⁰Tongaso gbia ti Israel atene: “Ae! KOTA GBIA airi agbia ota so ti zia ala na maboko ti azo ti Moab!”

¹¹Me Yosafat ahunda ndo, atene: “Mbeni wayanga-Nzapa ayeke na ndo so titene na lege ti lo, e lingbi ti hunda *KOTA GBIA pepe?” Mbeni zo ti kua oko ti gbia ti Israel akiri tënë: “Élisée, molenge ti Shafat ayeke na ndo so; lo laa lo yeke mu lani maboko na wayanga-Nzapa Élie.”

¹²Yosafat atene: “Biani, tënë ti KOTA GBIA ayeke na yanga ti koli so ti tene na e.” Tongaso gbia ti Israel, Yosafat na gbia ti Edom ague ti wara tere na Élisée.

¹³Élisée atene na gbia ti Israel: “Ti mo na mbi nyen? Gue mo baa awayanga-nzapa ti babâ ti mo na ti mama ti mo!” Gbia ti Israel akiri tënë na lo: “Ên-en! KOTA GBIA laa aga na e, agbia ota so ge ti zia e na maboko ti azo ti Moab.”

¹⁴Élisée akiri atene: “KOTA GBIA ayeke na fini, lo so ngangu ti lo ahon angangu kue si mbi yeke sara na lo so! Tongana ayeke fade ndali ti Yosafat, gbia ti Juda pepe, ka mbi ma tënë ti mo pepe, ka mbi baa nga le ti mo pepe!

¹⁵Fadeso, ala ga na mbi mbeni zo ti pikango mozoko.” Na ndembe so zo ti pikango mozoko ni ayeke pika mozoko, ngangu ti KOTA GBIA aga na ndö ti Élisée.

¹⁶Élisée atene: “Tënë so KOTA GBIA atene ayeke so: ‘Ala zi gba ti adu na popo-hoto so.’

¹⁷Tënë so KOTA GBIA atene ayeke so: ‘Fade ala yeke baa pupu pepe, ala yeke baa ngu-Nzapa pepe; me fade ngu ayeke si singo na popo-hoto so. Ala yeke nyon ngu ni, ala na anyama ti ala nga na anyama so ayo akungba.’

¹⁸Élisée akiri atene: Me ye ni so ayeke duti kete ye na le ti KOTA GBIA. Fade lo yeke zia azo ti Moab na maboko ti ala.

¹⁹Fade ala yeke buba agbata so kue asara gbagba ti bira na tere ni nga na akota gbata kue. Ala yeke fâ na sese akeke so kue ayeke le ka anzoni lengo ni, ala yeke kanga ali ti ngu kue, ala yeke tuku atêne na le ti anzoni sese ti yaka ti buba sese ni.”

²⁰Na ndaperere, na ngoi ti mungo *sandaga, ngu alondo na mbage ti Edom ayeke sua si amu ya ti kodro ni kue.

²¹So azo ti Moab kue ama a tene, agbia ota so aga ti tiri bira na ala, ala iri akoli so kue ngu ti ala alingbi ti gbu yongoro zeme na likongo. Ala zia akoli ni aluti, amu ndo kue na katikati ti kodro ni.

²²Na kota ndaperere, tongana azo ti Moab azingo awe, lâ ayeke su na le ti ngu. Ala ngba yongoro, ala baa le ti ngu ni aga tongana mene.

²³Ala dekongo, atene: “So mene laa! E hinga pepe, agbia na aturugu ti ala atiri na popo ti ala si ala fâ tere so! Fadeso ala azo ti Moab, ala londo e gue, e ro akungba ti ala!”

²⁴Azo ti Moab ague, asi na bâbâ ti azo ti Israel. Tongaso azo ti Israel alondo, atiri bira na azo ti Moab si azo ti Moab akpe na dawa ti ala. Azo ti Israel atumba peko ti ala ngbii asi na kodro ti Moab; ala fâ azo ti Moab sioni sioni.

²⁵Ala buba agbata, zo oko oko atuku atêne ti lo na le ti anzoni sese ti yaka si atêne asi singo na le ti sese ni; ala kanga ali ti ngu kue, ala fâ na sese akeke so kue ayeke le ka anzoni lengo ni. Gi gbata ti Kir-Heres oko laa angba nzoni; me azo so ayeke zia têne na yanga ti kamba ti bo na anyama, ala laa angoro gbata ni si ala mu na lege ti bira.

²⁶So gbia ti Moab abaa atene, bira ni ahon ngangu ti lo awe, lo mu aturugu 700 na tere ti lo, ala so ayeke yo ayongoro zeme titene ala suru mbeni lege nde ti kpe ti gue na ndo ti gbia ti Edom. Me ala ha gbaa.

²⁷Tongaso gbia ti Moab amu kozo molenge ti lo ti koli, lo so alingbi fade ti ga gbia na peko ti lo; lo mu molenge ni na sandaga so a yeke gbi ni kue na wâ na ndö ti gbagba ti gbata ni. Ngonzo agbu azo ti Israel ngangu mingi, nilaa ala zia lo si ala kiri na kodro ti ala.