Read sango 2 Agbia 6 Bible Online

2 Agbia 6 - sango bible

2 Agbia 6

¹Mbeni lâ, azo ti ya ti bongbi ti awayanga-Nzapa atene na Élisée: “Ndo so e yeke duti daa na tere ti mo so ayeke kete mingi; ndo ni alingbi na e pepe.

²Zia lege na e titene e gue na yanga ti ngu ti Jourdain, zo oko oko ade keke si e ga, e leke na mbeni gbefa titene e duti na gbe ni.” Élisée akiri tënë: “Ala gue ma!”

³Mbeni oko na popo ti ala atene: “Mbi gbu gere ti mo, tongana mo ye, e na mo, e gue!” Élisée akiri tënë: “Nzoni, mbi yeke gue!”

⁴Nilaa Élisée na ala ague. Ala si na yanga ti ngu ti Jourdain si ala yeke de akeke.

⁵Na ndembe so mbeni oko na popo ti ala angba ti de ti lo keke ni, le ti do ti lo azi na tere ti keke ni, ati na ya ti ngu. Lo dekongo, lo tene: “Ae babâ! Mbi hunda do ni hundango na maboko ti mbeni zo!”

⁶Élisée ahunda lo: “Do ni ati na ndo wa?” Lo fa na Élisée ndo so do ni ati daa. Élisée afâ mbeni nduru keke, lo bi na ndo so do ni ati daa. Do ni alondo na gbe ti ngu asigigi na le ti ngu ni.

⁷Élisée atene: “Mu ni!” Koli ni ayoro maboko ti lo si lo mu ni.

⁸Gbia ti Sirii ayeke tiri bira na Israel. Lo na aturugu ti lo ti kota kamba abongbi ti ma tere si lo tene na ala ndo so lo ye ti sara bâbâ ti lo daa.

⁹Me zo ti Nzapa atokua azo ti tene na gbia ti Israel, atene: “Mo sara hange! Mo hon na ndo tongaso pepe, ngbanga ti so aturugu ti Sirii asara bâbâ ti ala kâ.”

¹⁰Nilaa gbia ti Israel atokua aturugu ti baa ndo so zo ti Nzapa afa so. Ye ni so asi fani mingi: Élisée agboto mê ti gbia ti Israel daa, nilaa gbia ti Israel asara hange.

¹¹Li ti gbia ti Sirii akpe kue ndali ti ye so asi so. Lo bongbi aturugu ti lo ti kota kamba si lo tene na ala: “Mbeni zo na popo ti e ayeke ka e na gbia ti Israel! Ala ye ti fa zo ni na mbi pepe?”

¹²Mbeni turugu ni oko atene: “Babâ gbia, zo tongaso ayeke na popo ti e pepe! Me Élisée, wayanga-Nzapa so ayeke na Israel alingbi ti tene peko ti atënë so kue mo yeke tene na ya ti kubu ti mo na gbia ti lo.”

¹³Tongaso gbia ti Sirii amu yanga, atene: “Ala gue, abaa ndo so lo yeke daa; fade mbi yeke tokua azo ti gbu lo!” Azo aga atene na gbia ti Sirii: “Élisée ayeke na Dotan.”

¹⁴Gbia atokua ambarata, na apusu ti mbarata na gba ti aturugu. Ala si kâ na bi si ala ngoro gbata ni kue.

¹⁵Na kota ndaperere, zo ti kua ti Élisée alondo, lo sigigi na ya ti gbata ni. Lo baa aturugu, ambarata na apusu ti mbarata so angoro gbata ni. Lo dekongo, lo tene: “Ae babâ! Fade e yeke sara tongana nyen?”

¹⁶Élisée akiri tënë: “Sara mbeto pepe! Ala so ayeke na e ayeke mingi ahon ala so ayeke na ala.”

¹⁷Na pekoni, Élisée asambela, atene: “*KOTA GBIA, zi le ti zo ti kua ti mbi si lo lingbi ti baa ndo!” KOTA GBIA azi le ti zo ti kua ni si lo baa ambarata na apusu ti mbarata so aza wâ; ala si singo na li ti hoto si ala ngoro tere ti Élisée kue.

¹⁸Aturugu ti Sirii amu lege si ala gue na mbage ti Élisée. Élisée akiri asambela KOTA GBIA, atene: “Kanga le ti aturugu so si ala baa ndo pepe!” KOTA GBIA akanga le ti ala alingbi na tënë so Élisée atene.

¹⁹Élisée atene na aturugu ni: “Lege ni ayeke ge pepe; gbata ni ayeke nga ge pepe. Ala ga na peko ti mbi, mbi gue na ala na ndo ti zo so ala yeke gi lo so.” Nilaa Élisée ague na ala na Samarii.

²⁰Gi so ala li na ya ti gbata ni awe, Élisée akiri asambela, atene: “KOTA GBIA, zi le ti aturugu so titene ala baa ndo!” KOTA GBIA azi le ti ala si ala baa so ala yeke taa na ya ti gbata ti Samarii.

²¹So gbia ti Israel abaa ala awe, lo tene na Élisée: “Babâ, mbi lingbi ti fâ ala?”

²²Élisée akiri tënë: “Ên-en, mo fâ ala pepe! Lakue, tongana aturugu ti mo agbu azo na ya ti bira, mo yeke fâ ka ala pepe! Tongaso, ayeke nzoni mo mu na ala kobe, ala te; mo mu na ala ngu, ala nyon. Na pekoni, mo zia lege na ala, ala kiri na ndo ti gbia ti ala.”

²³Gbia amu na ala gba ti kobe; ala te, ala nyon. Na pekoni, lo zia lege na ala ti kiri na ndo ti gbia ti ala. Na peko ti ye so, aturugu ti Sirii azia lege ti li na sese ti Israel biani biani.

²⁴Na pekoni, Ben-Hadad, gbia ti Sirii abongbi aturugu ti lo kue si lo gue ti tiri bira na gbata ti Samarii.

²⁵Mbeni kota nzara ati na ya ti gbata ni. So bira ni angba ti ninga, ye ni asara si azo ayeke ka li ti lele oko na ale ti nginza balemiombe; kete puru ti mbipa, ala ka ni na ale ti nginza oku.

²⁶Mbeni lâ, gbia ti Israel ayeke tambula na ndö ti gbagba ti gbata ni. Mbeni wali adekongo na lo, atene: “Babâ gbia! Ga mo mu na mbi maboko maa!”

²⁷Me gbia ni akiri tënë na lo: “Tongana *KOTA GBIA amu maboko na mo pepe, fade mbi yeke mu maboko na mo na nyen? Mbeni *ble wala mbeni vin so mbi bata ni ayeke daa pepe.”

²⁸Na pekoni, gbia atene na lo: “Mo ye nyen?” Wali ni akiri tënë: “Wali so atene na mbi, atene: ‘Mu molenge ti mo, e te lo laso; kekereke, fade e te ti mbi.’

²⁹E to molenge ti mbi, e te lo awe. Lango oko na pekoni, mbi tene na lo: mu molenge ti mo, e te lo ma; me lo honde molenge ti lo ni.”

³⁰So gbia ama tënë so wali so atene, lo suru bongo na tere ti lo. Ndali ti so lo yeke na ndö ti gbagba ti gbata ni, azo ti gbata ni abaa so lo yu mbeni bongo ti mua na gbe ti bongo so lo suru so; bongo ni agbu tere ti lo gbungo.

³¹Gbia atene: “Laso, tongana li ti Élisée, molenge ti Shafat angba na ndö ti go ti lo, ayeke nzoni Nzapa asara ye ti ngangu mingi na mbi!”

³²Andaa Élisée aduti na ya ti da ti lo; *akangba aduti na tere ti lo. Gbia atokua mbeni zo ti kua ti lo oko na Élisée. Me kozoni si watokua ni asi, Élisée atene na akangba ni, atene: “Ala baa awe! Zo ti fango azo so atokua mbeni zo titene lo fâ go ti mbi. Ala sara hange! Tongana watokua ni asi, fade ala kanga yanga ti da ni, ala zia lo, lo li pepe. Baa, wa ti lo amu peko ti lo si ayeke ga; lo laa e ma toto ti gere ti lo so!”

³³So tënë angba gi na yanga ti Élisée, mo ye ti baa watokua ni asi, lo tene: “Asioni ye so kue asi na e so alondo na *KOTA GBIA! Nyen laa mbi yeke kiri ti zia be ti mbi ti ku na mbage ti KOTA GBIA, nyen?”