Read sango 2 Agbia 8 Bible Online

2 Agbia 8 - sango bible

2 Agbia 8

¹Wali so lani Élisée azingo molenge ti lo na kuâ so, Élisée atene lani na lo: “Londo, mo na asewa ti mo, ala gue, aduti na ndo so ala lingbi ti duti daa. Biani, *KOTA GBIA aleke na be ti lo ti tokua kota nzara na ya ti kodro ni; kota nzara ni ayeke ninga ande ngu mbarambara.”

²Wali ni alondo si lo sara ye so zo ti Nzapa atene na lo. Gi hio tongaso, lo na asewa ti lo alondo, ala gue, aduti ngu mbarambara na sese ti azo ti Filistii.

³Na peko ti ngu mbarambara ni, wali ni alondo na sese ti azo ti Filistii, lo kiri na kodro ti lo. Lo gue na da ti gbia si lo hunda titene a kiri na lo da ti lo nga na yaka ti lo.

⁴Andaa gbia angba ti sara lisoro na Gehazi, zo ti kua ti Élisée. Gbia atene na Gehazi: “Fa na mbi akota ye so kue Élisée asara.”

⁵Gehazi angba ti fa na gbia tënë ti molenge so lani akui si Élisée akiri lo na fini so. Gi na ndembe so lo ngba ti tene tënë, mo ye ti baa, mama ti molenge ni asi si lo hunda na gbia titene a kiri na lo da ti lo nga na yaka ti lo. Gehazi atene: “Babâ gbia, baa wali ni laa! Baa molenge ti lo so lani Élisée akiri lo na fini so laa!”

⁶Gbia ahunda wali ni si wali ni afa na lo peko ti atënë ni kue. Na pekoni, gbia azia tënë ti wali ni na maboko ti mbeni kota zo ti kua ti lo oko. Gbia atene na zo ti kua ni: “Mbi ye titene a kiri na wali so aye ti lo kue. Nginza so kue azo awara na lege ti yaka ti lo, ti londo na lango so lo zia kodro ni ngbii asi fadeso, ala kiri nga na ni na lo.”

⁷Mbeni lâ, Élisée ague na gbata ti Damas. Na ngoi ni so Ben-Hadad, gbia ti Sirii ayeke na kobela. Azo atene na gbia ni, atene: “Zo ti Nzapa aga ngbii asi na ndo so.”

⁸Gbia atene na Hazael: “Mu mbeni matabisi, mo gue, mo baa zo ti Nzapa. Na pekoni, fade mo hunda *KOTA GBIA na lege ti lo, mo tene: ‘Mbi yeke ngba na fini na kobela so laa?’ ”

⁹Hazael ague, awara Élisée. Lo mu anzoni ye nde nde so ayeke na Damas, lo kanga na ndö ti *azambala baleosio si lo gue ti mu ni na Élisée. Lo si na dawa ti Élisée si lo tene na lo: “Molenge ti mo Ben-Hadad, gbia ti Sirii atokua mbi ti hunda mo, atene: ‘Mbi yeke ngba na fini na kobela so laa?’ ”

¹⁰Élisée akiri tënë na lo, atene: “Gue mo tene na lo: ‘Biani, fade mo yeke ngba na fini!’ Me KOTA GBIA afa na mbi so, fade lo yeke kui kuingo.”

¹¹Mo ye ti baa, Élisée abaa ndo kpoo, lo baa ndo mbage na mbage pepe. Na pekoni, lo to nda ti toto.

¹²Hazael ahunda lo, atene: “Kota zo, mo yeke toto ngbanga ti nyen?” Élisée akiri tënë: “Mbi yeke toto, ngbanga ti so mbi hinga sioni so mo yeke sara ande na azo ti Israel: mo yeke gbi agbata ti ala so ngangu gbagba ayeke na tere ni, mo yeke fâ amaseka ti ala na ya ti bira, mo yeke nika akete molenge ti ala, mo yeke suru ya ti amama ti ngo.”

¹³Hazael atene: “Mbi zo ti kua ti mo, mbi so mbi yeke ti mbi mbo so, fade mbi yeke sara akota ye tongaso tongana nyen?” Élisée akiri tënë: “KOTA GBIA afa na mbi atene, fade mo yeke ga gbia ti sese ti Sirii.”

¹⁴Hazael azia Élisée si lo kiri na tere ti kota zo ti lo. Gbia ti Sirii ahunda lo, atene: “Tënë ti nyen laa Élisée atene na mo, nyen?” Hazael akiri tënë: “Lo tene na mbi, lo tene, fade mo yeke ngba na fini!”

¹⁵Me lango oko na pekoni, Hazael amu balangeti, lo yoro na ya ti ngu, lo kanga na le ti gbia ni si lo kui. Hazael aga gbia na peko ti Ben-Hadad.

¹⁶Na ngu oku ni so Yoram, molenge ti Akab ayeke gbia ti Israel laa Yoram, molenge ti Yosafat aga gbia ti Juda.

¹⁷Lo yeke na ngu baleota na use si lo ga gbia; lo le-gbia ngu miombe na Jérusalem.

¹⁸Lo mu peko ti sarango ye ti agbia ti Israel tongana ti so azo ti sewa ti Akab asara, ngbanga ti so lo mu mbeni molenge ti Akab ti ga wali ti lo. Lo sara ye so ayeke sioni na le ti *KOTA GBIA.

¹⁹Me KOTA GBIA aye ti buba kodro-gbia ti Juda pepe ndali ti David, zo ti kua lo, ngbanga ti so KOTA GBIA atene na David, fade mbeni *hale ti lo ayeke duti gbia lakue lakue na peko ti lo.

²⁰Na ngoi so Yoram ayeke le-gbia laa azo ti Edom ake ti ngba na gbe ti komandema ti Juda si ala soro gbia ti ala wani.

²¹Yoram amu apusu ti mbarata ti lo kue si lo gue na Sair. Na be ti bi, lo na amakonzi ti aturugu ti kpengo na apusu ti mbarata alondo si ala suru lege ahon na popo ti azo ti Edom so angoro fade ala. Aturugu ti Juda akpe ague na ndo ti ala.

²²Ti londo na ngoi ni so ngbii asi fadeso, azo ti Edom ake ti ngba na gbe ti komandema ti Juda. Gi na oko ngoi ni so, azo ti gbata ti Libna ake ti ngba na gbe ti komandema ti Juda.

²³Tanga ti atënë na ndö ti Yoram na aye so kue lo sara, a su tënë ni na ya ti “Mbeti ti aye so agbia ti Juda asara”.

²⁴Yoram akui, lo hon na peko ti ababâ ti lo, a lu lo na tere ti ababâ ti lo na Gbata ti David. Molenge ti lo Ahazia laa aga gbia na peko ti lo.

²⁵Na ngu baleoko na use ni so Yoram, molenge ti Akab ayeke gbia ti Israel laa Ahazia, molenge ti Yoram aga gbia ti Juda.

²⁶Ahazia ayeke na ngu baleuse na use si lo ga gbia; lo le-gbia ngu oko na Jérusalem. Iri ti mama ti lo ayeke Atalii, zo ti sewa ti Omri, gbia ti Israel.

²⁷Ahazia amu peko ti sarango ye ti azo ti sewa ti Akab, lo sara ye so ayeke sioni na le ti *KOTA GBIA tongana ti ala, ngbanga ti so lo yeke kogara ti azo ti sewa ti Akab.

²⁸Ahazia na Yoram, molenge ti Akab ague ti tiri bira na Hazael, gbia ti Sirii na gbata ti Ramot, na sese ti Galaad. Na ya ti bira ni, azo ti Sirii azia ka na tere ti Yoram.

²⁹Gbia Yoram akiri na Yizreel titene a kanga ka so azo ti Sirii azia na tere ti lo na Rama, na ndembe so lo yeke tiri bira na Hazael, gbia ti Sirii. Tongaso, Ahazia, molenge ti Yoram, gbia ti Juda, ague na Yizreel ti baa Yoram, molenge ti Akab, ngbanga ti so ka ni ayeke so lo mingi.