Read sango 2 Agbia 9 Bible Online

2 Agbia 9 - sango bible

2 Agbia 9

¹Wayanga-Nzapa Élisée airi mbeni zo oko na popo ti azo ti bongbi ti awayanga-Nzapa si atene na lo: “Leke tere ti mo, mo mu ngbenda ti mafuta so, mo gue na gbata ti Ramot, na sese ti Galaad.

²Kâ, mo gi lege ti baa Yehu, molenge ti Yoshafat, molenge ti Nimshi. Fade mo iri Yehu na popo ti a-ita ti lo, mo gue na lo na ya ti kubu so ayeke na ngbonda ti da.

³Fade mo mu mafuta ni, mo tuku na li ti lo si mo tene: Tënë so *KOTA GBIA atene ayeke so: ‘Mbi tuku mafuta so na li ti mo titene mo ga gbia ti Israel.’ Na pekoni, mo zi yanga ti da ni, mo kpe, mo hon; mo ku pepe.”

⁴Wayanga-Nzapa ni ague na gbata ti Ramot, na sese ti Galaad.

⁵So lo si na Ramot awe, andaa amakonzi ti aturugu ti Israel abongbi tere ti ala kâ. Lo tene: “Kota zo, mbi yeke na mbeni tënë ti tene na mo.” Yehu atene: “Zo wa laa na popo ti e si mo ye ti tene tënë ni na lo?” Wayanga-Nzapa ni akiri tënë: “Mbi ye ti tene tënë ni na mo, kota zo!”

⁶Yehu alondo si lo na wayanga-Nzapa ali na ya ti da. Wayanga-Nzapa ni atuku mafuta na li ti lo si atene: “Tënë so KOTA GBIA, Nzapa ti Israel atene ayeke so: ‘Mbi tuku mafuta so na li ti mo titene mo ga gbia na ndö ti azo ti Israel, azo ti KOTA GBIA.

⁷Mo laa mo yeke fâ ande azo ti sewa ti Akab, kota zo ti mo! Ndali ti mene ti azo ti kua ti mbi, awayanga-Nzapa nga ndali ti mene ti azo ti kua ti KOTA GBIA so kue Yezabel atuku, fade mbi yeke kiri peko ti sioni na Akab.

⁸Biani, fade azo ti sewa ti Akab kue ayeke kui. Mbi yeke fâ akoli so kue ayeke na ya ti da ti Akab, angbaa wala azo so ayeke angbaa pepe si ala yeke na Israel.

⁹Mbi yeke sara titene azo ti sewa ti Akab aga tongana azo ti sewa ti Yeroboam, molenge ti Nebat, ala ga nga tongana azo ti sewa ti Basha, molenge ti Ahia.

¹⁰Ti Yezabel, fade ambo ayeke te kuâ ti lo na yaka ti Yizreel; fade zo ti lungo kuâ ti lo ayeke duti daa pepe.’ ” Na pekoni, wayanga-Nzapa ni azi yanga ti da si lo kpe, lo hon.

¹¹Yehu asigigi si lo kiri na tere ti amakonzi ti aturugu ti gbia. Ala hunda lo, atene: “Tongana nyen? Zo ti gbogbolinda so aga ti baa mo ngbanga ti nyen?” Yehu akiri tënë na ala, atene: “Ye ayeke daa pepe! Ala wani ahinga mara ti zo tongaso nga na atënë ti lo kue!”

¹²Me atanga ni atene na lo: “Mvene! Mo tene na e tënë ti ye so asi so ma!” Yehu atene: “Tënë so lo tene na mbi ayeke so: ‘Tënë so KOTA GBIA atene ayeke so: Mbi tuku mafuta na li ti mo titene mo ga gbia ti Israel.’ ”

¹³Gi hio tongaso, amakonzi ti aturugu ni kue amu bongo ti ala, ala zia na gbe ti lo na ndö ti eskalie. Na pekoni, ala huru didi si ala dekongo, atene: “E mu gbia Yehu na nduzu!”

¹⁴Yehu, molenge ti Yoshafat, molenge ti Nimshi aleke tënë na hondengo ni na tere ti Yoram. Andaa na ngoi ni so Yoram na azo ti Israel kue ayeke tiri bira ti bata gbata ti Ramot, na sese ti Galaad si Hazael, gbia ti Sirii aga amu ni pepe.

¹⁵Gbia Yoram akiri lani na gbata ti Yizreel titene a kanga ka so azo ti Sirii azia na tere ti lo na ndembe so lo yeke tiri bira na Hazael, gbia ti Sirii. Yehu atene na amba ti lo: “Tongana ala leke na be ti ala ti mu peko ti mbi, ayeke nzoni mbeni zo oko asigigi na ya ti gbata ni pepe ti gue na Yizreel ti tene tënë ti ye so asi so.”

¹⁶Na pekoni, Yehu ako na ndö ti pusu ti mbarata ti lo si lo gue na Yizreel. Kâ, Yoram ayeke lango na kobela na ndö ti gbogbo si Ahazia, gbia ti Juda aga ti baa lo.

¹⁷Sanziri so aluti na ndö ti da ti Yizreel so ayo na nduzu so, lo baa gba ti azo so amu peko ti Yehu si ayeke ga. Sanziri ni atene: “Mbi baa gba ti azo ayeke ga!” Yoram atene: “Tokua mbeni zo ti kpengo na mbarata ti wara ala na lege, ti hunda ala: Ala ga na tënë ti siriri?”

¹⁸Zo ti kpengo na mbarata ni ague, awara ala na lege si lo tene: “Tënë so gbia atene ayeke so: Ala ga na tënë ti siriri?” Yehu akiri tënë, atene: “Tënë ti siriri ni abaa mo? Kiri, mo mu peko ti mbi.” Sanziri ni atene: “Watokua ni ague ngbii asi na tere ti ala; me lo kiri pepe.”

¹⁹Yoram akiri atokua use zo ti kpengo na mbarata. Zo ni ague ngbii asi na tere ti ala si lo tene: “Tënë so gbia atene ayeke so: Ala ga na tënë ti siriri?” Yehu akiri tënë, atene: “Tënë ti siriri ni abaa mo? Kiri, mo mu peko ti mbi.”

²⁰Sanziri ni atene: “Use zo ti kpengo na mbarata ni ague ngbii asi na tere ti ala, lo kiri pepe. Me lege ti kpengo na pusu ti mbarata ti zo ni akpa gi ti Yehu, molenge ti Nimshi. Yehu ayeke kpe ka na pusu ti mbarata tongana mbeni zo ti gbogbolinda.”

²¹Tongaso Yoram atene: “Ala leke pusu ti mbarata ti mbi!” Nilaa ala leke pusu ti mbarata ti lo. Yoram, gbia ti Israel ako na ya ti pusu ti mbarata ti lo; Ahazia, gbia ti Juda, ako nga na ya ti pusu ti mbarata ti lo. Ala londo ti gue ti wara Yehu na lege. Ala gue si ala wara lo na yaka ti Nabot, zo ti gbata ti Yizreel.

²²Gi so Yoram abaa Yehu awe, lo tene: “Yehu, mo ga na tënë ti siriri?” Yehu akiri tënë: “Nyen? Siriri? So mama ti mo Yezabel angba ti voro anzapa nde si lo ngba ti sara mazi so!”

²³Yoram aturne pusu ti lo si lo kpe. Lo tene na Ahazia: “Ahazia, mbeni zo aka e awe!”

²⁴Yehu amu kokora ti lo si lo pika ni. Le ti kokora ni ague, awara Yoram na kate ti lo; akoro be ti lo si asigigi na mbeni mbage. Yoram ati na ya ti pusu ti mbarata ti lo si lo kui.

²⁵Yehu atene na Bidkar, turugu ti kota kamba ti lo, atene: “Mu kuâ ti Yoram, mo bi na yaka ti Nabot, zo ti gbata ti Yizreel. Dabe ti mo na tënë so *KOTA GBIA atene ando na ndö ti Akab, babâ ti lo na ndembe so mbi na mo, e yeke oko na ya ti pusu ti mbarata si e yeke mu peko ti lo so. KOTA GBIA atene:

²⁶‘Mbi wani, mbi baa lo. Biri, mbi baa mene ti Nabot na ti amolenge ti lo so mo tuku ni. Biani, mara ti ye so mo sara so, fade mbi yeke futa peko ni na mo gi na ya ti yaka so; so tënë ti yanga ti KOTA GBIA laa!’ Fadeso, mu kuâ ti Yoram, mo bi na yaka so, alingbi na tënë ti KOTA GBIA.”

²⁷So Ahazia, gbia ti Juda abaa ye ni tongaso, lo kpe, lo mu lege ti Bet-Gan. Me Yehu atumba peko ti lo si lo mu yanga na amba ti lo, atene: “Lo nga, ala fâ lo!” Azo ni akpo lo na ndö ti pusu ti mbarata ti lo na lege so ague na Gur, nduru na tere ti Ibleam. Me Ahazia awara lege ti kpe ti si na Megido si lo kui kâ.

²⁸Azo ti kua ti Ahazia ayo kuâ ti lo na ya ti pusu ti mbarata, ague na ni na Jérusalem. Ala lu lo na du ti kuâ ti lo, na tere ti ababâ ti lo, na Gbata ti David.

²⁹Na ngu baleoko na oko ni so Yoram, molenge ti Akab ayeke gbia ti Israel laa Ahazia aga gbia ti Juda.

³⁰Yehu ali na gbata ti Yizreel awe. So Yezabel ama tënë ni, lo kpaka ambeni ye ti pendere na tere ti kua ti le ti lo, lo leke kua ti li ti lo pendere si na pekoni, lo luti na le ti fenetere.

³¹Gi so Yehu asi na yanga ti gbata ni, Yezabel adekongo na lo, atene: “Zimri, mo ga na tënë ti siriri? Mo, zo ti fango gbia ti mo so?”

³²Yehu amu le ti lo na nduzu, na mbage ti fenetere ni si lo tene: “Zo wa laa aye mbi, zo wa?” Tongaso *ambaiwa use wala ota abaa ndo na mbage ti lo.

³³Yehu atene na ala: “Ala bi lo na sese!” Tongaso ala bi Yezabel na sese. Mene ti lo amu tere ti da nga na tere ti ambarata. Yehu atambula na ndö ti Yezabel na pusu ti lo.

³⁴Yehu ali na da, lo te, lo nyon; na pekoni, lo tene: “Ala baa lege ti sioni wali so, ala lu lo, ngbanga ti so lo yeke molenge ti gbia.”

³⁵Azo ni ague ti lu Yezabel, me ala wara gi bio ti li ti lo, le ti gere ti lo nga na ya ti maboko ti lo.

³⁶Ala kiri ague, atene tënë ni na Yehu si lo tene: “Tënë so *KOTA GBIA azia ando na yanga ti zo ti kua ti lo Élie, zo ti gbata ti Tishebe si lo tene laa. KOTA GBIA atene: ‘Fade ambo ayeke te kuâ ti Yezabel na yaka so ayeke na gbata ti Yizreel.

³⁷Fade kuâ ti Yezabel ayeke lango na ndö ti sese si aga tongana puru na ya ti yaka so. Zo so abaa kuâ ni, lo lingbi ti tene pepe: So Yezabel laa.’ ”