Read sango 1 Mbai 12 Bible Online

1 Mbai 12 - sango bible

1 Mbai 12

¹Baa azo so amu peko ti David na gbata ti Siklag, na ndembe so lo kpe Saul, molenge ti Kish laa. Azo ni ayeke akpengba turugu so amu maboko na David na ngoi ti bira.

²Ala yeke azo ti pikango kokora; na maboko ti ala ti koli wala ti wali legeoko, ala lingbi bi têne na *mvingi wala ti pika ale ti kokora. Ambeni zo ni na popo ti ala ayeke azo ti mara ti Benjamin, so ti tene azo ti mara ti Saul:

³Ahiezer, makonzi ni, lo na ita ti lo Yoash, molenge ti Shema, zo ti Gibea; Yeziel na Pelet, amolenge ti Azmavet; Beraka na Yehu, azo ti kodro ti Anatot;

⁴Ishemaya, zo ti kodro ti Gabaon, mbeni makonzi ti aturugu ti batango gbia;

⁵Irmeya, Yaziel, Yohanan na Yozabad, zo ti kodro ti Gedera;

⁶Eluzai, Yerimot, Bealia, Shemaria na Shefatia, azo ti kodro ti Haruf;

⁷Elkana, Isia, Azarel, Yoezer na Yashobam, *ahale ti Kora;

⁸Yoela na Zebadia, amolenge ti Yeroam, azo ti kodro ti Gedor.

⁹Na popo ti mara ti Gad, ambeni kpengba turugu amu peko ti David na ndo so lo honde tere ti lo daa na benyama. Ala hinga ti sara bira nzoni, ala yeke tiri bira na *vala, na likongo, ngangu ti ala ayeke tongana ti abamara; ala yeke kpe loro tongana adengbe na li ti ahoto.

¹⁰Ezer ayeke na li ti azo ni, use ni Obadia, ota ni Eliab,

¹¹osio ni Mishemana, oku ni Irmeya,

¹²omene ni Atai, mbarambara ni Eliel,

¹³miombe ni Yohanan, gumbaya ni Elzabad,

¹⁴baleoko ni Irmeya, baleoko na oko ni Makbanai.

¹⁵Azo ti mara ti Gad so kue ayeke amakonzi ti aturugu. Kete zo na popo ti ala, ngangu ti lo alingbi na ngangu ti aturugu 100 si kota zo ni, ngangu ti lo alingbi na ngangu ti aturugu 1 000.

¹⁶Ala laa afâ ngu ti Jourdain na kozo nze, na ngoi so ngu ni asuku mingi si ala tumba azo so alango na apopo-hoto ni kue, na mbage ti To nga na mbage ti Do.

¹⁷Ambeni zo ti mara ti Benjamin na ambeni zo ti mara ti Juda amu peko ti David na ndo so lo honde tere ti lo daa.

¹⁸David aga na dawa ti ala si lo tene na ala: “Tongana ala ga na tënë ti siriri na mbi si ala ye ti mu maboko na mbi, fade mbi yeke yamba ala na be ti mbi kue. Me tongana ala ga ti handa mbi ti zia mbi na maboko ti awato ti mbi, ataa so mbi sara ye ti sioni oko pepe, ayeke nzoni Nzapa ti akotara ti e abaa ye ni si lo fâ ya ti tënë ni.”

¹⁹Tongaso yingo ti Nzapa agbu Amasai, makonzi ti aturugu ti batango gbia si lo tene: “E yeke ti mo, David; e yeke na mo, molenge ti Yese! Siriri, siriri aduti na mo! Siriri aduti na zo so ayeke mu maboko na mo, ngbanga ti so Nzapa ti mo amu maboko na mo awe.” David ayamba ala si lo zia ala amakonzi ti aturugu ti lo.

²⁰Ambeni zo ti mara ti Manase amu peko ti David na ndembe so lo na azo ti Filistii ague ti tiri bira na Saul. Me David na azo ti lo amu maboko na azo ti Filistii ni pepe, ngbanga ti so agbia ti azo ti Filistii ama tere si ala tumba David, ala tene: “Gbaa lo yeke kiri na peko ti wa ti lo Saul si lo yeke ka e na lo.”.

²¹Na ndembe so David akiri na Siklag laa ambeni zo ti mara ti Manase amu peko ti lo; azo ni ayeke Adna, Yozabad, Yediael, Mikael, Yozabad, Elihu na Siletai. Ala yeke amakonzi ti aturugu saki oko.

²²Ala yeke mu maboko na David na li ti aturugu, ngbanga ti so ala kue ayeke akpengba turugu si ala ga amakonzi ti aturugu ti lo.

²³Na ya ti lango oko oko, ambeni zo ayeke ga na tere ti David ti mu maboko na lo, gi tongaso laa wungo ti aturugu ti David aga gbani ahon ndoni.

²⁴So ayeke wungo ti aturugu so amu peko ti David na gbata ti Hebron ti sara si lengo-gbia ti Saul aga ti David, alingbi na yanga so *KOTA GBIA amu.

²⁵Na popo ti azo ti mara ti Juda, aturugu so ayeke yo *avala na alikongo, wungo ti ala ayeke 6 800.

²⁶Na popo ti azo ti mara ti Siméon, akpengba turugu ayeke 7 100.

²⁷Na popo ti azo ti mara ti Lévi, akpengba turugu ayeke 4 600.

²⁸Yoyada nga ayeke daa, lo yeke makonzi ti kete mara ti Aaron; akpengba turugu 3 700 amu peko ti lo.

²⁹Sadok nga ayeke daa, lo yeke mbeni kpengba turugu si lo ngba maseka, lo na amakonzi 22 ti sewa ti lo.

³⁰Na popo ti azo ti mara ti Benjamin, azo ti kete mara ti Saul ayeke 3 000. Ambeni zo mingi na popo ti ala ayeke sara ando kua na Saul.

³¹Na popo ti azo ti mara ti Efraim, akpengba turugu ayeke 20 800; iri ti ala awu mingi na ya ti asewa ti ala.

³²Na popo ti ndambo ti mara ti Manase so alango na mbage ti Do, azo 18 000 laa a soro ala ti gue ti zia David gbia.

³³Na popo ti azo ti mara ti Isakar, amakonzi 200 ti aturugu ayeke daa, ala na a-ita ti ala so ayeke na gbe ti komandema ti ala; ala yeke na ndara ti hinga ngoi wa na kode wa laa azo ti Israel alingbi ti sara mbeni ye.

³⁴Na popo ti azo ti mara ti Zabulon, aturugu ayeke 50 000 so ahinga ti tiri bira nzoni, aye ti bira nde nde kue ayeke na maboko ti ala si ala hinga lege ti lekengo tere ti ala ti tiri bira na beoko.

³⁵Na popo ti azo ti mara ti Neftali, amakonzi ti turugu ayeke 1 000, ala yeke na aturugu 37 000 so ayeke yo avala na alikongo.

³⁶Na popo ti azo ti mara ti Dan, aturugu ayeke 28 600 so ahinga lege ti lekengo tere ti ala ti tiri bira.

³⁷Na popo ti azo ti mara ti Aser, aturugu ayeke 40 000 so amanda ti sara bira si ala hinga lege ti lekengo tere ti ala ti tiri bira.

³⁸Na popo ti azo ti mara Ruben, ti Gad na ti ndambo ti mara ti Manase so ayeke na mbage ti ngu ti Jourdain, aturugu 120 000 ayeke daa; aye ti bira nde nde kue ayeke na maboko ti ala.

³⁹Azo so kue ayeke aturugu so ahinga lege ti lekengo tere ti ala ti tiri bira. Ala ga na gbata ti Hebron si na beoko, ala zia David gbia ti azo ti Israel kue. Tanga ti azo ti Israel kue aga nga na beoko ti zia David tongana gbia.

⁴⁰Ala sara lango ota kâ na tere ti David, ala te, ala nyon aye so a-ita ti ala, azo ti kodro aleke ndali ti ala.

⁴¹Ataa azo so ayeke nduru na sese ti ala, ataa azo ti mara ti Isakar, ti Zabulon na ti Neftali aga na gba ti kobe na ndö ti alele, *azambala, *apâkârâ na abagara. Ala ga na akobe tongana: farini, gba ti aholengo le ti fige so akpa gatoo, gba ti aholengo le ti *vinye, vin na mafuta; ala ga na abagara na ataba gbani gbani. Biani, azo ti Israel kue ayeke na ngia.