Read sango 1 Mbai 13 Bible Online

1 Mbai 13 - sango bible

1 Mbai 13

¹David na amakonzi ti aturugu 1 000 na ala ti aturugu 100 nga na akota zo ti kodro kue abongbi ti ma tere.

²Na pekoni, lo tene na azo ti Israel so kue abongbi so, lo tene: “Tongana ala baa nzoni na le ti ala, tongana be ti *KOTA GBIA Nzapa ti e aye, ayeke nzoni e tokua na a-ita ti e so kue angba na sese ti Israel, ala na awayango-sandaga, azo ti mara ti Lévi so ayeke na ya ti agbata ti ala na asese so ayeke na tere ni; e tisa ala ti ga na popo ti e.

³Tongaso si e kiri na sanduku ti *mbuki ti Nzapa ti e na ndo ti e. Biani, na ngoi so kue Saul ayeke gbia, e gi lege ti mu ni pepe.”

⁴Bongbi ti azo ni kue abaa so tënë ni ayeke na legeni si ala ye titene a sara gi tongaso.

⁵David abongbi azo ti Israel kue, ti londo na katikati ti Ezipte na mbage ti Mbongo, ngbii asi na Lebo-Hamat na mbage ti Banga. Lo bongbi ala titene ala gue, amu sanduku ti mbuki ti Nzapa so ayeke na Kiriat-Yearim ti ga na ni.

⁶David na azo ti Israel kue ague na Baala, so ti tene na Kiriat-Yearim, na sese ti Juda. Ala gue ti mu sanduku ti mbuki ti Nzapa; a iri ni “sanduku ti KOTA GBIA, lo so lo yeke duti na ndö ti *asheruben”.

⁷Ala mu sanduku ti mbuki ni na ya ti da ti Abinadab, ala zia na ndö ti fini pusu ti abagara. Uza na Ahio laa ayeke baa ndo na ndö ti tambula ti pusu ni.

⁸David na azo ti Israel kue afa ngia ti ala na dawa ti Nzapa na ngangu ti ala kue. Ala yeke he bia na aye ti mozoko tongana akota kundi, akete kundi, akete ngo, awen so atoto nga na atatalita.

⁹So ala si na lakere ti Kidon awe, angba kete abagara asara titene sanduku ti mbuki ni ati. Uza ayoro maboko ti lo na mbage ti sanduku ni ti gbu ni.

¹⁰Ngonzo ti KOTA GBIA alondo na tere ti Uza si lo fâ lo, ngbanga ti so lo ye ti ndu sanduku ti mbuki ni. Lo kui na ndo so na dawa ti Nzapa.

¹¹Be ti David aso, ngbanga ti so KOTA GBIA apika Uza si lo kui. Nilaa a di iri ti ndo ni so Peres-Uza ngbii asi laso.

¹²Na lango ni so mbeto ti Nzapa asara David, lo tene: “Mbi lingbi ti ga na sanduku ti mbuki ti Nzapa na ndo ti mbi tongana nyen?”

¹³Tongaso David ague na sanduku ti mbuki ni na ndo ti lo pepe, so ti tene na Gbata ti David. Me lo zia ni na da ti Obed-Edom, zo ti gbata ti Gat.

¹⁴Sanduku ti mbuki ni angba nze ota na ndo ti Obed-Edom, na da ti lo si Nzapa asara tufa na ndö ti sewa ti lo na aye ti lo kue.