Read sango 1 Mbai 16 Bible Online

1 Mbai 16 - sango bible

1 Mbai 16

¹Na peko ti so ala ga na sanduku ti mbuki ti Nzapa, ala zia ni na gbe ti da ti bongo so David aleke ndali ni. Ala mu *asandaga so ayeke gbi ni kue na wâ nga na asandaga ti beoko na Nzapa.

²So David amu asandaga ni awe, lo sara tufa na ndö ti azo ni na iri ti KOTA GBIA.

³Na pekoni, lo kangbi kobe na azo ti Israel kue, akoli na awali, zo oko oko awara mapa oko, gba oko ti aholengo le ti date so akpa gatoo na gba oko ti aholengo le ti *vinye.

⁴David amu ambeni zo ti mara ti Lévi si lo zia ala na dawa ti sanduku ti *mbuki ti *KOTA GBIA titene ala dabe ti azo na iri ti KOTA GBIA, ala sepela lo si ala gonda nga KOTA GBIA, Nzapa ti Israel.

⁵Asaf ayeke makonzi ti ala, Zakarii ayeke mu maboko na lo; Yeiel, Shemiramot, Yehiel, Matitia, Eliab, Benaya, Obed-Edom nga na Yeiel ayeke pika ti ala kete kundi na kota kundi si Asaf ayeke pika ti lo wen.

⁶Awayango-sandaga Benaya na Yaziel ayeke ngba ti ala ti huru tatalita na dawa ti sanduku ti mbuki ni.

⁷Gi na lango ni so laa David amu Asaf, lo na a-ita ti lo, ti kozoni titene ala gonda KOTA GBIA na bia.

⁸Ala sepela KOTA GBIA! Ala to mbela ti fa atene, lo yeke Nzapa! Ala sara si amara ahinga tënë ti akota ye so lo sara!

⁹Ala he bia na lo, ala pika mozoko na lo; ala tene tënë ti aye ti kpene so kue lo sara!

¹⁰Ala so ayeke gi KOTA GBIA, ala pika kate ndali ti iri ti lo so ayeke nde si ayeke nzoni kue, ala duti na ngia!

¹¹Ala gi KOTA GBIA, ala gi ngangu ti lo; ala gi le ti lo lakue.

¹²Ala, *ahale ti Israel, zo ti kua ti KOTA GBIA, ala, ahale ti Jacob, ala so KOTA GBIA asoro ala, ala dabe ti ala na aye ti kpene so lo sara; ala dabe ti ala na aye ti dongo be so lo sara, na atënë ti fango ngbanga so asigigi na yanga ti lo.

¹⁴Lo laa lo yeke KOTA GBIA Nzapa ti e, lo yeke fâ ngbanga na ndö ti sese kue.

¹⁵Ala dabe ti ala lakue na tënë ti mbuki ti lo, tënë ti yanga ti lo so ague ngbii asi na ahale ti ala ti molongo saki oko;

¹⁶mbuki so lo na Abraham asara, lo deba yanga ti lo na Isaac ti bata tënë ti yanga ti lo.

¹⁷Lo sara si mbuki ni aga tongana mbela ndali ti Jacob, tongana mbuki so angba lakue lakue ndali ti Israel,

¹⁸lo tene: “Mbi yeke mu na mo sese ti Kanaan titene aga ti mo na ti ahale ti mo.”

¹⁹Na ngoi ni so, ala wu mingi pepe, a lingbi ti diko wungo ti ala, ala yeke lani awande na sese ni.

²⁰Ala yeke londo na ndo ti ambeni mara, ala yeke gue na ndo ti ambeni mara nde; ala yeke londo na mbeni kodro-gbia, ala yeke gue na mbage ti ambeni kodro-gbia.

²¹Me Nzapa azia zo oko ti sara pasi na ala pepe, lo pika agbia ndali ti ala.

²²Lo tene: “Azo ti mbi so mbi soro ala so, ala ndu ala pepe, ala sara sioni na awayanga ti mbi pepe.”

²³Ala azo ti sese kue, ala he bia na KOTA GBIA! Na ya ti lango oko oko, ala fa so lo laa lo yeke soo zo na kuâ.

²⁴Ala tene tënë ti gonda ti lo na amara nde, ala tene tënë ti akota ye so lo sara na popo ti azo kue.

²⁵Biani, KOTA GBIA ayeke kota, lo lingbi titene azo asepela lo mingi! Lo yeke sara ye ti ziango mbeto na be ti zo si lo yeke na ndö ti anzapa kue.

²⁶Anzapa kue ti amara nde ayeke gi asenge senge ye; me KOTA GBIA laa asara yayu.

²⁷Gonda na nengo ti lo ti gbia ayeke na dawa ti lo, ngangu na kota ngia asi singo na ndo ti duti ti lo.

²⁸Ala, azo ti amara kue, ala mu na KOTA GBIA, ala mu na lo gonda na ngangu so alingbi na lo!

²⁹Ala mu na KOTA GBIA gonda so alingbi na iri ti lo. Ala ga na *sandaga, ala ga na dawa ti lo. Ala kuku akpo li ti ala na sese na gbe ti KOTA GBIA na ndembe so gonda ti lo asigigi polele.

³⁰Ala azo ti sese kue, tere ti ala ado na dawa ti lo! Sese aluti ngangu, ye ayeke yingi ni pepe.

³¹Ayeke nzoni yayu asara ngia, ayeke nzoni sese adodo na ngia. Ayeke nzoni a tene na amara, atene: “KOTA GBIA laa ayeke gbia!”

³²Ayeke nzoni kota ngu-ingo na aye so kue ayeke na ya ni atoto ngangu; ayeke nzoni yaka na aye so kue ayeke na ya ni aduti na ngia!

³³Ayeke nzoni akeke ti gbako adekongo na ngia na dawa ti KOTA GBIA. Biani, lo yeke ga ti fâ ngbanga ti azo ti sese.

³⁴Ala sepela KOTA GBIA, ngbanga ti so lo yeke nzoni, nzoni be ti lo angba kpu na kpu!

³⁵Ala tene: “Soo e! Mo so mo yeke Nzapa ti songo e, mo soo e maa! Zi e na maboko ti amara nde, mo bongbi e na ndo oko, tongaso fade e yeke sepela iri ti mo so ayeke nde si ayeke nzoni kue. Fade e yeke pika kate ti e, ngbanga ti so e yeke sepela mo.”

³⁶Singila na KOTA GBIA, Nzapa ti Israel ngbene ye lakue lakue, kpu na kpu! Nilaa azo kue atene: “Amen! Aleluya!”

³⁷David azia Asaf na a-ita ti lo na tere ti sanduku ti mbuki ti KOTA GBIA titene ala sara kua ti ala lakue lakue, alingbi na ndia ti kua ni ti lango oko oko.

³⁸Lo zia Obed-Edom, molenge ti Yedutun, na Hosa nga na a-ita ti ala baleomene na miombe tongana azo ti batango ayanga ti gbagba.

³⁹Lo zia wayango-sandaga Sadok, lo na a-ita ti lo awayango-sandaga titene ala sara kua na ya ti da ti KOTA GBIA, da so ayeke nde si ayeke nzoni kue, na gbata ti Gabaon.

⁴⁰Lakue na ndaperere nga na lakui, ala laa ayeke mu asandaga so a yeke gbi ni kue na wâ na ndö ti gbalaka ti KOTA GBIA. Ala yeke sara aye kue na lege ti *Ndia so KOTA GBIA afa na azo ti Israel.

⁴¹Na tere ti ala, lo zia Heman na Yedutun, ala na ambeni koli so a soro ala gi titene ala mu singila na KOTA GBIA: biani, nzoni be ti lo angba kpu na kpu!

⁴²Heman na Yedutun ayeke huru tatalita, ala yeke pika wen so atoto mingi na ambeni ye ti mozoko so ala yeke he na abia ti Nzapa. Kua ti amolenge ti Yedutun ayeke ti bata ayanga ti gbagba.

⁴³Na pekoni, zo oko oko akiri na ndo ti lo. David akiri na ndo ti lo ti sara tufa na ndö ti azo ti da ti lo.