Read sango 1 Mbai 17 Bible Online

1 Mbai 17 - sango bible

1 Mbai 17

¹So David aduti na yangbo ti lo awe, lo tene na wayanga-Nzapa Natan: “Baa, mbi yeke lango ti mbi na ya ti da so a sara ni na keke ti sedre, me sanduku ti *mbuki ti *KOTA GBIA ayeke lango na gbe ti da ti bongo.”

²Natan akiri tënë na David: “Ye so mo leke na be ti mo ti sara, ayeke nzoni mo sara ni, ngbanga ti so Nzapa ayeke na mo.”

³Na bi ni so, tënë ti Nzapa asi na Natan, atene:

⁴“Gue mo tene na David, zo ti kua ti mbi, mo tene: Tënë so KOTA GBIA atene ayeke so: ‘Mo laa mo yeke sara da na mbi pepe titene mbi lango daa.

⁵Na lango so mbi sara si azo ti Israel asigigi na sese ti Ezipte ngbii asi laso, mbi de ti lango na ya ti mbeni da pepe; me mbi yeke lango gi na gbe ti ada ti bongo, na ndo so ge ti si kâ, na ndo so ge ti si kâ.

⁶Na ngoi so kue mbi na azo ti Israel kue, e tambula, mbi mu awafango-ngbanga ti fa lege na ala. Laoko mbi gboto mê ti mbeni wafango-ngbanga, mbi tene: Ngbanga ti nyen si mo sara na mbi da pepe na keke ti sedre?’

⁷Ti fadeso, mo tene na David, zo ti kua ti mbi, mo tene: Tënë so KOTA GBIA so ayeke na ndö ti dunia kue atene ayeke so: ‘Mbi laa mbi mu mo na ya ti ngonda, na peko ti ataba na angasa titene mo ga kota zo na ndö ti azo ti Israel, azo ti mbi.

⁸Na ndo so kue mo gue daa, mbi yeke fade na mo, mbi fâ awato ti mo kue na dawa ti mo. Fade mbi yeke sara titene iri ti mo awu tongana ti akota zo ti sese so.

⁹Mbi yeke mu mbeni ndo na azo ti Israel, azo ti mbi; mbi yeke zia ala na ndo ni so titene ala duti daa si mbeni ye ayingi ala pepe, titene ambeni mara so ayeke na sioni pialo akiri ti woko ala tongana ti kozoni pepe.

¹⁰Ti londo na lango so mbi zia awafango-ngbanga ti sara komandema na ndö ti azo ti Israel, azo ti mbi, mbi sara si awato ti mo kue ati na sese. Mbi tene na mo so KOTA GBIA laa ayeke sara da na mo.

¹¹Tongana ngoi ti mo alingbi awe titene mo gue na peko ti akotara ti mo, fade mbi yeke mu mbeni *hale ti mo, so ti tene mbeni molenge ti mo ti koli titene lo ga gbia. Mbi yeke sara titene lengo-gbia ti lo akpengba.

¹²Lo laa lo yeke sara da ndali ti mbi; mbi yeke sara titene lengo-gbia ti lo angba kpu na kpu.

¹³Fade mbi yeke duti babâ ti lo si lo yeke duti molenge ti mbi. Mbi yeke zi nzoni be ti mbi na lo pepe, tongana ti so mbi zi nzoni be ti mbi na lo so ayeke kozoni na mo.

¹⁴Mbi yeke sara titene lo ngba gbia kpu na kpu na ndö ti azo ti mbi nga na ya ti kodro-gbia ti mbi. Biani, lengo-gbia ti lo ayeke kpengba kpu na kpu.’ ”

¹⁵Natan atene na David peko ti aye so kue KOTA GBIA afa na lo na ya ti mbeni ye tongana bango-li.

¹⁶Gbia David ague, aduti na dawa ti *KOTA GBIA si lo tene: “KOTA GBIA Nzapa, mbi yeke zo wa? Asewa ti mbi ayeke zo wa si mo mu mbi, mo zia mbi na ndo so?

¹⁷Nzapa, ye ni alingbi na le ti mo pepe. Tongaso mo kiri mo mu zendo ndali ti ahale ti mbi ndali ti angoi so ayeke ga gbanda. KOTA GBIA Nzapa, mo baa mbi tongana mbeni kota zo.

¹⁸Tënë ti nyen laa, mbi David, mbi lingbi ti kiri ti tene na mo ndali ti iri ti mbi so mo mu na nduzu so? Mo hinga mbi, zo ti kua ti mo awe.

¹⁹KOTA GBIA, ndali ti mbi, zo ti kua ti mo, nga na lege ti ye so be ti mo aye, mo sara akota ye so kue ti fa ni na azo.

²⁰KOTA GBIA, mbeni nzapa ti lingbi na mo ayeke daa pepe. Na ya ti atënë so kue e ma, e ma a tene, mbeni nzapa tongana mo ayeke daa pepe, gi mo oko.

²¹Mbeni mara oko na ndö ti sese so alingbi na azo ti Israel, azo ti mo, ayeke daa? Mo gue, mo zi azo ti Israel na gbe ti ngbaa ti azo ti Ezipte ti sara si ala ga azo ti mo. Mbeni nzapa asara tongaso ndali ti azo ti lo awe? Mo sara si iri ti mo awu na lege ti akota ye nga na aye ti dongo be so mo sara ndali ti azo ti mo, mo tumba ambeni mara na dawa ti azo ti mo so mo zi ala na Ezipte.

²²Mo mu azo ti Israel titene ala duti azo ti mo kpu na kpu; ti mo KOTA GBIA, mo ga Nzapa ti ala.

²³Fadeso, KOTA GBIA, tënë so mo tene lani na ndö ti mbi nga na ndö ti ahale ti mbi, ayeke nzoni ye ni asi alingbi na tënë ni kpu na kpu. Sara ye alingbi na tënë ti mo.

²⁴Ayeke nzoni ye ni asi alingbi na tënë ni, tongaso si azo agonda iri ti mo kpu na kpu, ala tene: ‘KOTA GBIA so ngangu ti lo ahon angangu kue, Nzapa ti Israel ayeke Nzapa ndali ti Israel.’ Sara si lengo-gbia ti ahale ti mbi, zo ti kua ti mo, akpengba.

²⁵Biani, mo Nzapa ti mbi, mo wani, mo tene na mbi, mo tene, fade ahale ti mbi ayeke le-gbia na peko ti mbi. Nilaa mbi ga na ndo so, na dawa ti mo, ti sara sambela so.

²⁶Fadeso KOTA GBIA, mo laa mo yeke Nzapa, mo tene tënë ti nzoni ye so na mbi awe!

²⁷Fadeso, mo yeda awe ti sara tufa na ndö ti ahale ti mbi, tongaso si ala ngba kpu na kpu na dawa ti mo. Biani, KOTA GBIA, mo laa mo sara tufa na ndö ti ala; ye so mo sara tufa na ndö ni, tufa ni ayeke ngba kpu na kpu.”