Read sango 1 Mbai 19 Bible Online

1 Mbai 19 - sango bible

1 Mbai 19

¹Na pekoni, Nahash, gbia ti azo ti mara ti Amon akui; molenge ti lo Hanun aga gbia na peko ti lo.

²David atene: “Mbi ye ti sara nzoni be na Hanun, molenge ti Nahash, ngbanga ti so babâ ti lo asara ando nzoni be na mbi.” Nilaa David atokua azo ti kangbi mua na lo ndali ti kuâ ti babâ ti lo. Tongaso azo ti kua ti David asi na kodro ti azo ti Amon, na tere ti Hanun ti kangbi mua na lo.

³Akota zo ti kodro ti Amon atene na Hanun: “Mo baa ti mo, mo tene, David aye ti ne kuâ ti babâ ti mo si lo tokua azo ti kangbi mua na mo so? Lo tokua azo ti lo so ti tambula, ti *bembe ndo na ya ti kodro ni si mbeni lâ, ala mu ni pepe?”

⁴Tongaso, Hanun agbu azo ti kua ti David, lo kio kua ti yanga ti ala, lo fâ bongo ti ala ngbii asi na ngbonda ti ala si lo tumba ala.

⁵Azo ague, atene tënë ni na David; lo tokua azo ti wara ala, ngbanga ti so kamene ahon ndö ti ala. Gbia David atokua yanga na ala, atene: “Ayeke nzoni ala ngba na Jéricho ngbii kua ti yanga ti ala akiri asigigi si fade ala kiri na kodro.”

⁶Hanun na azo ti Amon ahinga atene, ala ga sioni na le ti David awe. Ala tokua kilo ti wen ti nginza 30 000 ti futa na apusu ti mbarata nga na azo ti kpengo na ambarata na ndo ti azo ti Sirii, ala ti sese ti Mezopotamii ti nduzu, ala ti Maaka na ti Soba.

⁷Ala futa apusu ti bira 32 000; ala hunda nga na gbia ti Maaka na aturugu ti lo ti mu maboko na ala. Azo ni aga asara bâbâ ti ala na ndo so abaa le na Medeba. Andaa azo ti mara ti Amon asigigi na ya ti agbata ti ala si ala bongbi tere ti ala ti ku ti sara bira.

⁸So David ama tënë ni, lo tokua Yoab, lo na akpengba turugu.

⁹Azo ti Amon asigigi, ala leke tere ti ala na yanga ti gbata ni ti sara bira. Agbia so aga ti mu maboko na ala, aleke tere ti ala nde na ya ti ngonda.

¹⁰Yoab ahinga atene, ambeni zo ti bira ni aluti na dawa ti lo ti tiri na lo si ambeni aluti na peko ti lo. Lo soro akpengba turugu na popo ti azo ti Israel si lo zia ala ti tiri bira na aturugu ti Sirii.

¹¹Lo zia tanga ti aturugu ni na maboko ti ita ti lo Abishai; a zia ala, ala luti le na le na aturugu ti azo ti Amon.

¹²Yoab atene na ita ti lo: “Tongana azo ti Sirii ahon ndö ti mbi, fade mo yeke ga ti mu maboko na mbi. Me tongana azo ti Amon laa ahon ndö ti mo, fade mbi yeke mu maboko na mo.

¹³Mo gbu ngangu, e sara ye ti koli ndali ti azo ti e nga ndali ti agbata ti Nzapa ti e. Ayeke nzoni *KOTA GBIA asara ye so be ti lo aye.”

¹⁴Yoab na aturugu ti lo ague na dawa ti azo ti Sirii ti tiri bira na ala; azo ti Sirii ni akpe na dawa ti lo.

¹⁵So azo ti Amon abaa so azo ti Sirii akpe awe, ala nga, ala kpe na dawa ti Abishai, ita ti Yoab. Ala kiri na ya ti gbata ti ala; Yoab akiri ti lo na Jérusalem.

¹⁶So azo ti Sirii abaa so azo ti Israel ahon ndö ti ala na bira awe, ala tokua ti iri a-ita ti ala so ayeke na mbage ti ngu ti Efrate. Zo so ayeke na li ti ala ayeke Shofak, kota makonzi ti aturugu ti gbia Hadadezer.

¹⁷A tene tënë ni na David; lo bongbi aturugu ti Israel kue, lo na ala afâ ngu ti Jourdain, ala ga nduru na azo ti Sirii, lo leke aturugu ti lo, ala luti le na le na ala ti Sirii. Tongaso, David aleke ala ti tiri bira na azo ti Sirii. Azo ti Sirii ni alondo na bira na tere ti lo.

¹⁸Me azo ti Sirii agbu le ni pepe si ala kpe na dawa ti azo ti Israel. David na aturugu ti lo afâ azo ti kpengo na apusu ti mbarata 7 000, asenge turugu 20 000. Lo fâ nga Shofak, kota makonzi ti aturugu ni.

¹⁹So azo so ayeke na gbe ti gbia Hadadezer abaa so azo ti Israel ahon ndö ti ala na bira awe, ala leke tënë ti siriri na David si ala duti na gbe ti lo. Na pekoni, azo ti Sirii aye mbeni pepe ti mu maboko na azo ti Amon.