Read sango 1 Mbai 22 Bible Online

1 Mbai 22 - sango bible

1 Mbai 22

¹Nilaa David atene: “Ndo so laa da ti KOTA GBIA Nzapa ayeke daa si ndo so nga laa gbalaka so azo ti Israel alingbi ti mu asandaga na ndö ni na Nzapa laa.”

²David amu yanga titene awande so kue ayeke na kodro ti Israel abongbi tere ti ala. Lo mu na ala kua ti dengo tere ti atêne titene a sara na kota da ti Nzapa.

³David amu gba ti wen titene a leke na apondi nga na *akongi ndali ti da ni; lo bongbi gba ti bengba wen so zo alingbi ti diko ni pepe.

⁴Lo bongbi nga akeke ti sedre so zo alingbi ti diko ni pepe, ngbanga ti so azo ti gbata ti Sidon na ti Tir aga na akeke ti sedre mingi na David.

⁵David atene na be ti lo: “Molenge ti mbi Salomon angba maseka, ade lo kpengba pepe. Kota da so fade a yeke sara ndali ti *KOTA GBIA so, alingbi akono si apendere; alingbi nga titene sango ni asi na ya ti akodro kue. Fade mbi yeke leke aye ti sarango na da ni ti ku na lo.” Tongaso David aleke aye mingi ndali ti kota da ni kozoni si lo kui.

⁶David airi molenge ti lo Salomon, lo mu yanga na lo titene lo sara kota da ndali ti *KOTA GBIA, Nzapa ti Israel.

⁷Lo tene na Salomon: “Molenge ti mbi, lani mbi leke na be ti mbi ti sara kota da ndali ti KOTA GBIA, Nzapa ti mbi.

⁸Me tënë ti KOTA GBIA asi na mbi, atene: ‘Mo tuku mene mingi, mo sara akota bira mingi. Mo laa mo yeke sara da ndali ti mbi pepe, ngbanga ti so na dawa ti mbi, mo tuku mene mingi na ndö ti sese.

⁹Fade mo yeke du molenge-koli: lo yeke zo so ayeke duti kpoo; mbi yeke sara titene awato so angoro lo azia lo kpoo. Iri ti lo ayeke duti ande Salomon; mbi yeke sara titene azo ti Israel aduti na siriri si kodro ni aduti kpoo na ngoi so kue lo yeke na fini.

¹⁰Lo laa lo yeke sara ande kota da ndali ti mbi; lo yeke duti molenge ti mbi si mbi yeke duti babâ ti lo. Mbi yeke sara titene lengo-gbia ti lo akpengba lakue na kodro ti Israel.’

¹¹Ti fadeso, molenge ti mbi, ayeke nzoni KOTA GBIA aduti na mo si kua ti kota da ni atambula nzoni alingbi na tënë so lo tene ndali ti mo.

¹²Ayeke nzoni KOTA GBIA amu na mo lege ti hinga popo ti nzoni na ti sioni, ti duti na hingango ndo na ngoi so lo yeke zia mo gbia ti Israel, titene mo sara ye alingbi na *Ndia ti KOTA GBIA, Nzapa ti mo.

¹³Tongana mo sara ye na lege ti aye so ndia afa nga na lege ti ambela ti KOTA GBIA so lo mu na Moïse ndali ti azo ti Israel, fade aye ti mo kue ayeke ga nzoni. Gbu ngangu, mo sara ye ti koli, zia mbeto asara mo pepe, zia mbeto ahon ndö ti mo pepe.

¹⁴Mbi baa pasi mingi ti bongbi aye so ndali ti kua ti da ti KOTA GBIA: kilo kutu ota ti lôro, kilo kutu baleota ti wen ti nginza, bengba wen na wen so zo alingbi ti diko ni pepe. Mbi bongbi nga akeke na atêne. Mo lingbi ti zia ambeni ye na ndö ni.

¹⁵Azo ti kua mingi ayeke na tere ti mo: ala so ayeke de tere ti atêne, ala so ayeke de nzoroko na tere ti atêne nga na tere ti akeke, ala so ahinga kode ti akua nde nde.

¹⁶Ti lôro, ti wen ti nginza, ti bengba wen na wen, a lingbi ti diko ni pepe. Londo mo gbu kua; ayeke nzoni KOTA GBIA aduti na mo.”

¹⁷David amu yanga na amakonzi ti Israel kue titene ala mu maboko na molenge ti lo Salomon; lo tene:

¹⁸“KOTA GBIA Nzapa ti ala ayeke na ala pepe? Lo sara si ala duti kpoo mbage na mbage kue pepe? Biani, lo zia azo so alango kozoni na kodro ni na gbe ti mbi si kodro ni ayeke na gbe ti KOTA GBIA nga na gbe ti azo ti lo.

¹⁹Tongaso, ala mu be ti ala na fini ti ala kue ti gi KOTA GBIA Nzapa ti ala. Ala londo, ala sara da so a zia ni nde ndali ti KOTA GBIA Nzapa; fade ala yeke mu sanduku ti *mbuki ti KOTA GBIA na aye so a zia nde ndali ti Nzapa ti zia na ya ti da so ala sara ndali ti lo.”