Read sango 1 Mbai 24 Bible Online

1 Mbai 24 - sango bible

1 Mbai 24

¹A kangbi *ahale ti Aaron na ya ti abongbi nde nde. Aaron adu amolenge-koli osio: Nadab, Abihu, Elazar na Itamar.

²Nadab na Abihu adu amolenge pepe; ala kui kozoni na babâ ti ala. Elazar na Itamar asara kua ti wayango-sandaga.

³David, lo na Sadok, hale ti Elazar, ala na Ahimelek, hale ti Itamar akangbi ahale ti Aaron na ya ti abongbi nde nde, alingbi na akua so ala yeke sara.

⁴Andaa wungo ti akoli na popo ti ahale ti Elazar ayeke mingi ahon ala ti ahale ti Itamar. Nilaa a kangbi ahale ti Elazar na ya ti bongbi baleoko na omene, a kangbi ala ti Itamar na ya ti bongbi miombe; bongbi oko oko ayeke na makonzi ti lo.

⁵A bi mbeni ye ti kangbi kua na ala, ngbanga ti so na popo ti ahale ti Elazar na ti Itamar, ambeni ayeke “amakonzi ti ndo so ayeke nde si ayeke nzoni kue” si ambeni ayeke “amakonzi ti Nzapa”.

⁶Wakuasu Shemaya, molenge ti Netaneel, zo ti mara ti Lévi, asu iri ti azo ti mara ti Lévi na dawa ti gbia, ti amakonzi, ti wayango-sandaga Sadok, ti Ahimelek, molenge ti Abiatar nga na dawa ti amakonzi ti asewa ti awayango-sandaga na ti azo ti mara ti Lévi. Ndali ti ahale ti Elazar, a yeke bi ye ni fani use; ndali ti ahale ti Itamar, a yeke bi ni fani oko; a yeke sara ni gi tongaso ti gue na ni.

⁷So ayeke iri ti amakonzi ti abongbi so a bi mbeni ye ti soro na ala laa: 1. Yoyarib — 13. Hupa 2. Yedaya — 14. Yeshebab 3. Harim — 15. Bilga 4. Seorim — 16. Imer 5. Malkia — 17. Hezir 6. Miamin — 18. Hapises 7. Hakos — 19. Petahia 8. Abia — 20. Ezekiel 9. Yeshua — 21. Yakin 10. Shekania — 22. Gamul 11. Eliashib — 23. Delaya 12. Yakim — 24. Maazia

¹⁹Lege so a kangbi ala titene ala sara akua ti ala na ya ti kota da ti *KOTA GBIA laa. Ala yeke sara kua ni alingbi na peko ti yanga ti kotara ti ala Aaron, alingbi nga na yanga so KOTA GBIA, Nzapa ti Israel amu.

²⁰So ayeke iri ti ambeni *hale ti Lévi: Na popo ti ahale ti Amram, Shubael ayeke daa; na popo ti ahale ti Shubael, Yedia ayeke daa.

²¹Na popo ti ahale ti Rehabia, Isia ayeke daa; lo yeke makonzi ti sewa ti lo.

²²Na popo ti ahale ti Isar, Shelomot ayeke daa; na popo ti ahale ti Shelomot, Yahat ayeke daa.

²³Amolenge ti Hebron ayeke osio: kozo molenge ni ayeke Yeria, use ni ayeke Amaria, ota ni ayeke Yaziel, osio ni ayeke Yekamam.

²⁴Molenge ti Uziel ayeke Mika. Na popo ti ahale ti Mika, Shamir ayeke daa.

²⁵Na popo ti ahale ti Isia, Zakarii ayeke daa; Isia ayeke ita ti Mika.

²⁶Amolenge ti Merari ayeke Mali, Mushi na Yazia.

²⁷Ahale ti Merari ayeke Shoham, Zakur na Ibri; ala ga na lege ti kotara ti ala Yazia, molenge ti Merari.

²⁸Amolenge ti Mali ayeke Elazar, so adu molenge-koli pepe,

²⁹na Kish so adu molenge oko, iri ti lo Yerameel.

³⁰Amolenge ti Mushi ayeke Mali, Eder na Yerimot. So ayeke ahale ti mara ti Lévi na lege ti asewa ti ala oko oko kue laa.

³¹Tongana ti so a-ita ti ala, ahale ti Aaron asara, ala nga abi mbeni ye ti baa na lege ti kua ti ala. Ala sara ye ni na dawa ti gbia David, lo na Sadok, Ahimelek, amakonzi ti asewa ti awayango-sandaga nga na azo ti mara ti Lévi. Tongaso, kua so a mu na kota zo ti sewa, gi ni laa a mu na ngambe ni.