Read sango 2 Mbai 15 Bible Online

2 Mbai 15 - sango bible

2 Mbai 15

¹Yingo ti Nzapa aga na ndö ti Azaria, molenge ti Oded.

²Lo gue, lo wara Asa si lo tene na lo: “Gbia Asa, mo na azo ti Juda nga na azo ti Benjamin kue, ala ma mbi si! *KOTA GBIA ayeke na ala, tongana ala yeke na lo. Tongana ala gi lo, fade lo yeke zi lege na ala ti wara lo; me tongana ala zia lo, fade lo nga lo yeke zia ala.

³Aninga mingi so azo ti Israel ayeke na taa Nzapa pepe, ala yeke na wayango-sandaga pepe ti fa ye na ala, *Ndia ayeke daa pepe.

⁴Me lani, na ya ti ye ti ngangu so ala yeke daa, ala kiri na mbage ti KOTA GBIA, Nzapa ti Israel; ala kiri agi lo si lo zia lege na ala titene ala wara lo.

⁵Na ngoi ni so, zo alingbi ti fono na siriri pepe, ngbanga ti so kota wusuwusu ayeke na popo ti azo ti kodro kue.

⁶Mara ayeke tiri na mbeni mara, gbata ayeke tiri na mbeni gbata, ngbanga ti so Nzapa ayingi ala na lege ti aye ti ngangu nde nde.

⁷Me ti ala fadeso, azo ti Israel, ala gbu ngangu, be ti ala awoko pepe. Fade ala yeke wara futa ti kua ti ala.”

⁸So Asa ama atënë so nga na tënë so wayanga-Nzapa Oded atene na peko ti yanga ti Nzapa, lo wara ngangu si lo zi ayanda so ayeke na sese ti Juda na ti Benjamin; lo zi nga ayanda so ayeke na ya ti agbata so lo mu na bira si ayeke na sese ti Efraim, ndo so ahoto ayeke daa. Na pekoni, lo leke gbalaka ti KOTA GBIA so ayeke na dawa ti kubu so azo ayeke hon daa ti li na ya ti kota da ti Nzapa.

⁹Mingi ti azo ti mara ti Efraim, ti Manase na ti Siméon akiri na peko ti Asa si ala duti na kodro ti lo. Ala baa so KOTA GBIA Nzapa ti lo ayeke na lo. Tongaso lo bongbi ala, ala na azo ti Juda na ti Benjamin kue.

¹⁰Ala bongbi na Jérusalem na ya ti ota nze ni, na ngu baleoko na oku ni so Asa ayeke le-gbia.

¹¹Na lango ni so, anyama so ala gbu na peko ti bira si ala gue na ni, ala mu na *sandaga na KOTA GBIA: abagara ngbangbo mbarambara, ataba na angasa saki mbarambara.

¹²Ala deba yanga ti ala na lege ti mbuki ti gi KOTA GBIA, Nzapa ti akotara ti ala na be ti ala kue, na yingo ti ala kue.

¹³Zo so agi KOTA GBIA, Nzapa ti Israel pepe, fade a yeke fâ lo, ataa kete zo wala kota zo, ataa koli wala wali.

¹⁴Ala deba yanga ti ala na KOTA GBIA na dekongo na ngia, ala huru atatalita na adidi.

¹⁵Tere ti azo ti Juda kue anzere ndali ti deba ti yanga ti ala so ala de so, ngbanga ti so ala sara ni na be ti ala kue. Azo kue azia be ti ala ti gi KOTA GBIA; nilaa lo zia lege na ala ti wara lo. Lo mu na ala siriri mbage na mbage kue.

¹⁶Ataa mama ti lo Maaka, lo zi iri ti “Gbia-wali” so ayeke ndö ti lo, ngbanga ti so mama ti lo ni asara mbeni sioni yanda ndali ti nzapa-wali *Ashera. Asa amu yanga titene a kungbi yanda ni so na sese, a fâ ya ni nduru nduru si a gbi ni na ndo so ayeke na popo-hoto ti Sedron.

¹⁷Me ando so azo aleke na ndö ti ahoto ti voro anzapa nde daa, Asa azi ni na sese ti Israel pepe, ataa so be ti lo ayeke use use pepe na lango so kue lo ngba na fini.

¹⁸Aye so babâ ti lo amu na Nzapa nga na aye so lo wani, lo mu na Nzapa, lo mu ni lo ga na ni na ya ti kota da ti Nzapa; aye ni ayeke so: wen ti nginza, lôro na ambeni kungba nde nde.

¹⁹Ti gue ngbii ti si na ngu baleota na oku ni so kue Asa ale-gbia so, bira ayeke na ya ti kodro pepe.