Read sango 2 Mbai 16 Bible Online

2 Mbai 16 - sango bible

2 Mbai 16

¹Na ngu baleota na omene ni so Asa ale-gbia, Basha, gbia ti Israel aga ti tiri bira na azo ti Juda. Lo sara ngangu gbagba na tere ti gbata ti Rama ti kanga lege na Asa, gbia ti Juda titene lo na azo ti lo ali wala asigigi pepe.

²Tongaso Asa amu awen ti nginza na lôro so a bata na ya ti kubu ti mosoro ti kota da ti *KOTA GBIA na ti so ayeke na yangbo ti gbia si lo tokua ni na Ben-Hadad, gbia ti Sirii so ayeke lango na Damas. Lo tene na Ben-Hadad:

³“Ayeke nzoni mbi na mo, e ga *ambuki tongana ti so babâ ti mbi na babâ ti mo asara ando so. Baa, wen ti nginza na lôro laa mbi tokua ni na mo so. Gue mo buba ya ti mbuki ti mo na Basha, gbia ti Israel, tongaso si lo zia ti tiri bira na mbi.”

⁴Ben-Hadad ayeda na tënë ti gbia Asa si lo tokua amakonzi ti aturugu ti lo ti tiri bira na agbata ti Israel. Ala mu agbata ti Yon, ti Dan, na ti Abel-Maim nga na agbata so kue a yeke bata akobe daa na sese ti Neftali.

⁵Gi so Basha ama tënë ni, lo zia lege ti sarango ngangu gbagba na tere ti gbata ti Rama.

⁶Tongaso gbia Asa amu azo ti kodro ti Juda kue, ala ro atêne na akeke so Basha ayeke sara na ngangu gbagba na tere ti gbata ti Rama so, ala gue na ni. Asa amu atêne na akeke ni si lo sara na ngangu gbagba na tere ti agbata ti Geba na ti Mispa.

⁷Na ngoi ni so, Hanani, zo ti bango nda ti aye aga awara Asa, gbia ti Juda si lo tene na lo: “Mo zia be ti mo na *KOTA GBIA, Nzapa ti mo pepe; me mo zia be ti mo na gbia ti Sirii. Ndani laa aturugu ti gbia ti Sirii akpe na maboko ti mo.

⁸Aturugu ti Etiopii na ala ti Libii ayeke lani gbani gbani pepe? Ala yeke na apusu ti mbarata na azo ti kpengo na mbarata ni gbani gbani pepe? Me KOTA GBIA azia ala na maboko ti mo si mo kinda ala, ngbanga ti so mo zia be ti mo na lo.

⁹Biani, le ti KOTA GBIA ayeke baa ndo na ndö ti sese kue titene lo mu maboko na azo so azia be ti ala kue na lo. Me ye so mo sara so, mo sara ni tongana zo so li ti lo ayeke daa pepe. Ndani laa, ti fadeso, awato ti mo ayeke ga na bira na tere ti mo.”

¹⁰Asa asara ngonzo na tere ti zo ti bango nda ti aye si lo mu yanga titene a bi lo na da ti kanga, ngbanga ti so be ti Asa aso na tere ti lo ndali ti tënë so lo tene. Gi na ndembe ni so, Asa ato nda ti nika ambeni zo ti kodro.

¹¹Atënë na ndö ti Asa, na tongo nda ni ngbii asi na ndani, a su ni na ya ti “Mbeti ti Agbia ti Juda na ti Israel.”

¹²Na ngu baleota na gumbaya ni so Asa ale-gbia, mbeni ngangu kobela ti gere asara lo. Ataa na ya ti songo tere ti lo ni, lo gi *KOTA GBIA pepe, me lo gue ti baa awanganga.

¹³Na ya ti ngu baleosio na oko so Asa ale-gbia, lo kui si lo hon na peko ti ababâ ti lo.

¹⁴A lu lo na ya ti du ti kuâ so lo mu yanga si a zi ni na Gbata ti David. A zia kuâ ti lo na ndö ti mbeni gbogbo so asi singo na ayombo nde nde so awalekengo-yombo laa aleke ni na kode ti ala. A zö gba ti yombo ndali ti lo.