Read sango 2 Mbai 17 Bible Online

2 Mbai 17 - sango bible

2 Mbai 17

¹Yosafat, molenge ti Asa aga gbia na peko ti babâ ti lo. Lo ga ngangu na kodro ti Israel.

²Lo zia aturugu na ya ti agbata ti Juda so kue a sara angangu gbagba na tere ni. Lo zia agovoronere na ya ti agbata ti Juda na ti Efraim so babâ ti lo Asa amu na bira.

³*KOTA GBIA ayeke na Yosafat, ngbanga ti so lo mu peko ti akozo sarango ye ti kotara ti lo David. Lo gue na peko ti anzapa *Baal pepe.

⁴Me lo gi KOTA GBIA, Nzapa ti kotara ti lo, lo sara ye alingbi na atënë ti ndia ti Nzapa, lo sara ye tongana ti azo ti Israel pepe.

⁵KOTA GBIA asara si lengo-gbia ti lo akpengba. Azo ti Juda kue amu akadoo na Yosafat; nilaa lo wara mosoro mingi si azo agonda lo mingi.

⁶Lo zia be ti lo kue ti sara na KOTA GBIA. Nilaa lo zi na ya ti kodro-gbia ti Juda ando so azo aleke na ndö ti ahoto si ala yeke voro anzapa nde daa; lo zi nga akeke so azo aleke aluti na nduzu ndali ti nzapa-wali *Ashera.

⁷Na ngu ota ni so Yosafat ale-gbia, lo tokua ambeni kota zo ti lo ti fa ye na azo ti agbata ti Juda. Iri ti akota zo ni ayeke: Ben-Hail, Obadia, Zakarii, Netaneel na Mikaya.

⁸Ala na azo ti mara ti Lévi so laa ague: Shemaya, Netania, Zebadia, Asael, Shemiramot, Jonatan, Adonia, Tobia na Tob-Adonia. Awayango-sandaga Elishama na Yoram ayeke nga na tere ti ala.

⁹Ala mu mbeti ti *Ndia ti KOTA GBIA si ala gue na ni. Ala tambula na ya ti agbata ti Juda kue si ala fa ye na azo ti kodro ni.

¹⁰Akodro-gbia so kue ayeke na tere ti Juda asara mbeto ti *KOTA GBIA si mbeni oko atiri bira na Yosafat pepe.

¹¹Ataa azo ti Filistii kue aga na lo kadoo wala lapo ti wen ti nginza. A-arabu aga na lo anyama: akoli-taba 7 700 nga na akoli-ngasa 7 700.

¹²Ngangu ti Yosafat ayeke gue guengo na nduzu. Nilaa na sese ti Juda, lo sara agbata so angangu gbagba ayeke na tere ni nga na agbata so a yeke bata akobe daa.

¹³Lo bata aye gbani gbani na ya ti agbata ti Juda; lo zia akpengba turugu ti bira na Jérusalem.

¹⁴A kangbi aturugu ni na lege ti sewa ti ala. Ti mara ti Juda, amakonzi so ayeke na li ti aturugu saki oko ayeke so: makonzi Adna, lo yeke na li ti akpengba aturugu 300 000;

¹⁵na tere ti lo ayeke makonzi Yohanan, lo yeke na li ti aturugu 180 000;

¹⁶na tere ti lo, Amasia, molenge ti Zikri ayeke daa. Na be ti lo wani, lo yeda ti sara kua ti turugu na KOTA GBIA; lo yeke na li ti akpengba turugu 200 000.

¹⁷Ti mara ti Benjamin, makonzi ni ayeke Eliada, mbeni kpengba turugu; lo yeke na li ti aturugu 200 000; aturugu ni ayeke na akokora nga na *avala na maboko ti ala;

¹⁸na tere ti Eliada ayeke Yozabad; lo yeke na li ti aturugu 180 000 so aleke tere ti ala ti tiri bira.

¹⁹Aturugu so asara kua na gbia laa. Ambeni turugu ni ayeke na ya ti agbata ti Juda so a sara angangu gbagba na tere ni; a diko wungo ti ala na ndo so pepe.