Read sango 2 Mbai 2 Bible Online

2 Mbai 2 - sango bible

2 Mbai 2

¹Salomon amu azo 70 000 ti yo akungba, azo 80 000 ti suru ya ti têne na ndö ti hoto nga na azo 3 600 ti baa ndo na ndö ti azo ni.

²Salomon atokua na Hiram, gbia ti Tir, atene: “Sara na mbi tongana ti so mo sara na babâ ti mbi David so mo tokua na lo akeke ti sedre titene lo sara na da ndali ti lo wani so.

³Mbi ye ti sara da ndali ti KOTA GBIA, Nzapa ti mbi, ti zia ni nde ndali ti lo. Na ya ti da ni, fade a yeke zö na dawa ti lo dukani so fion ni afun nzoni, a yeke leke mapa si a yeke zia na dawa ti lo lakue lakue, a yeke mu na lo *asandaga so a yeke gbi ni kue na wâ, na ndaperere nga na lakui, a yeke mu nga na lo asandaga ti *lango ti wungo tere, ti alango ti fini nze na ti alango ti amatanga ti KOTA GBIA Nzapa ti e; ye so a diko ndali ti azo ti Israel kpu na kpu laa.

⁴Da so mbi ye ti sara so ayeke duti kota da, ngbanga ti so Nzapa ti e ayeke kota ahon anzapa kue.

⁵Me zo wa laa alingbi ti sara da ndali ti lo, so yayu so akono ahon ndoni alingbi na konongo ti lo pepe so? Mbi so, mbi yeke ti mbi zo wa ti sara da na lo? Mbi ye ti leke gi mbeni ndo titene a zö dukani daa na dawa ti lo.

⁶Fadeso, tokua na mbi mbeni wakode-kua ti lôro, ti wen ti nginza, ti bengba wen na ti wen, wakode-kua so ahinga nga ti sara anzoroko na tere ti abongo: nzoroko so abe bengo, nzoroko so akpa le ti nduzu, nzoroko so abe si aza zango; lo hinga nga ti de alimo na kode na tere ti aye, lo na awakode-kua so babâ ti mbi David asoro ala lani si ala yeke na tere ti mbi na sese ti Juda nga na Jérusalem.

⁷Tokua nga na mbi akeke ti sedre, ti sipre na ti santal ti hoto ti Liban. Mbi hinga so, azo ti kua ti mo ahinga ti de akeke ti hoto ti Liban nzoni; fade azo ti kua ti mbi ayeke gue ti mu maboko na azo ti kua ti mo

⁸si ala yeke leke nga gba ti akeke na mbi, ngbanga ti so da so mbi ye ti sara so ayeke kono mingi si ayeke duti ye ti dongo be.

⁹Ti mbi, mbi yeke mu na azo ti kua ti mo so ayeke de akeke ni, kilo ti *ble 6 000 000, kilo ti *orze 6 000 000, litere ti vin 800 000 nga na litere ti mafuta 800 000.”

¹⁰Hiram, gbia ti Tir asu mbeti ti kiri tënë na Salomon, atene: “Ngbanga ti so KOTA GBIA aye azo ti lo, nilaa lo zia mo gbia na ndö ti ala.

¹¹Mbi mu singila na KOTA GBIA, Nzapa ti Israel so asara yayu na sese, ngbanga ti so lo mu na David mbeni molenge so ayeke na ndara, li ti lo ayeke daa si lo hinga ndo nzoni, lo ye ti sara da ndali ti KOTA GBIA si lo ye nga ti sara yangbo ndali ti lo wani.

¹²Fadeso, mbi yeke tokua na mo Huram-Abi, mbeni zo so ahinga kua ti lo nzoni mingi si lo hinga nga ndo nzoni.

¹³Lo yeke molenge ti mbeni koli ti Tir si mama ti lo ayeke zo ti mara ti Dan. Lo hinga ti sara kua ti lôro, ti wen ti nginza, ti bengba wen, ti wen, ti têne na ti keke. Lo hinga ti sara anzoroko na tere ti abongo: nzoroko so abe bengo, nzoroko so akpa le ti nduzu, nzoroko so abe si aza zango nga na bongo so a sara na *len; lo hinga nga ti de alimo na kode na tere ti aye, ti sara akua so kue a mu na lo ti sarango ni, lo na awakode-kua ti mo na ala so babâ ti mo David asoro ala lani.

¹⁴Ti mo gbia, mo tokua na e ble, orze, mafuta nga na vin so mo tene tënë ni so.

¹⁵Ti e, fade e yeke de akeke ti hoto ti Liban so kue be ti mo aye; e yeke kanga ni na gba ni, na gba ni si e yeke ga na ni na mo na le ti kota ngu-ingo ngbii asi na gbata ti Zafa. Kâ, mo yeke yo ni ti gue na ni na Jérusalem.”

¹⁶Salomon adiko wungo ti awande so kue ayeke na Israel, ala so babâ ti lo David adiko ala lani awe so; wungo ti ala kue ayeke 153 600.

¹⁷Lo mu azo 70 000 ti yongo kungba, azo 80 000 ti surungo ya ti têne na li ti hoto nga na azo 3 600 ti bango ndo na ndö ti azo ti kua ni.