Read sango 2 Mbai 22 Bible Online

2 Mbai 22 - sango bible

2 Mbai 22

¹Azo ti Jérusalem amu Ahazia, tanga ti molenge ti Yoram ti ga gbia na peko ti babâ ti lo, ngbanga ti so ambeni arabu ali na ya ti bâbâ si ala fâ akozo molenge ti lo kue. Lege so Ahazia, molenge ti Yoram aga gbia ti Juda laa.

²Ahazia ayeke na ngu baleuse si lo ga gbia; lo le-gbia ngu oko na Jérusalem. Iri ti mama ti lo ayeke Atalii, zo ti ya ti sewa ti Omri.

³Ahazia amu nga peko ti sarango ye ti azo ti sewa ti Akab, ngbanga ti so mama ti lo ayeke mu na lo wango ti sara asioni ye.

⁴Lo sara ye so ayeke sioni na le ti *KOTA GBIA tongana ti azo ti sewa ti Akab. Na peko ti kuâ ti babâ ti lo, azo ti sewa ti Akab laa aga azo ti mungo wango na lo si wango ti ala ni ague na lo na kuâ.

⁵Gi na lege ti wango ti ala si lo londo, lo na Yoram, molenge ti Akab ague ti tiri bira na Hazael, gbia ti Sirii, na gbata ti Ramot, na sese ti Galaad. Na ya ti bira ni, azo ti Sirii azia ka na tere ti Yoram.

⁶Yoram akiri na Yizreel titene a kanga ka so a zia na tere ti lo na Ramot, na ndembe so lo yeke tiri bira na Hazael, gbia ti Sirii. Tongaso, Ahazia, molenge ti Yoram, gbia ti Juda, ague na Yizreel ti baa lo, ngbanga ti so ka ni ayeke so lo mingi.

⁷Nzapa agbu ndembe so Ahazia ague ti baa Yoram ti sara si Ahazia awara kuâ. Gi so Ahazia asi tongaso, lo na Yoram ague ti tengbi Yehu, molenge ti Nimshi. Andaa KOTA GBIA atuku mafuta na li ti Yehu ti ga gbia titene lo fâ azo ti sewa ti Akab kue ti hunzi ala.

⁸Tongaso, Yehu afâ ngbanga na li ti azo ti sewa ti Akab. Lo wara tere na amakonzi ti Juda nga na amolenge ti a-ita ti Ahazia so ala kue ayeke sara kua na gbia Ahazia si lo fâ ala kue.

⁹Na pekoni, Yehu amu yanga titene a gi Ahazia. Azo ague, agbu lo na Samarii, ndo so lo honde tere ti lo daa. Ala ga na lo na Yehu si a fâ lo. Ala lu lo, ngbanga ti so azo atene: “Lo yeke molenge ti ya ti sewa ti Yosafat, gbia so agi lani KOTA GBIA na be ti lo kue so.” Na ya ti sewa ti Ahazia, mbeni zo so alingbi ti le-gbia ayeke daa pepe.

¹⁰So Atalii, mama ti Ahazia ama a tene, molenge ti lo akui awe, lo londo, lo mu yanga titene a fâ *ahale ti gbia ti Juda kue.

¹¹Me na ndembe so a yeke fâ amolenge ni, Yosheba, molenge ti gbia ti wali amu Yoas, mbeni molenge ti Ahazia na hondengo ni. Lo honde molenge ni na wali ti batango lo na ya ti mbeni kubu so a zia agbogbo daa, na ya ti kota da ti Nzapa, tongaso si Atalii awara lege ti fâ lo pepe. — Yosheba, molenge ti gbia Yoram ayeke wali ti wayango-sandaga Yoyada, lo yeke nga ita ti Ahazia. —

¹²Yoas na azo ti batango lo angba ti honde tere ti ala na ya ti kota da ti Nzapa ngu omene. Andaa na ngoi ni so, Atalii ayeke le-gbia na ndö ti kodro ni.