Read sango 2 Mbai 26 Bible Online

2 Mbai 26 - sango bible

2 Mbai 26

¹Ozias ayeke na ngu baleoko na omene si azo ti Juda kue amu lo gbia na peko ti babâ ti lo Amasia.

²Na peko ti so babâ ti Ozias akui, lo laa lo kiri lo mu gbata ti Elat si lo kiri lo leke ni.

³Ozias ayeke na ngu baleoko na omene si lo ga gbia; lo le-gbia ngu baleoku na use na Jérusalem. Iri ti mama ti lo ayeke Yekolia, zo ti Jérusalem.

⁴Ozias asara ye so ayeke mbirimbiri na le ti *KOTA GBIA gi tongana ti so babâ ti lo Amasia asara.

⁵Na ngoi so kue Zakarii angba na fini, lo so lo yeke ma ya ti ye so Nzapa afa na lo na ya ti mbeni ye tongana bango-li, lo fa na Ozias lege ti kpengo mbeto ti *KOTA GBIA Nzapa; Nzapa asara si aye ti Ozias aga nzoni.

⁶Ozias ague ti tiri bira na azo ti Filistii. Lo kungbi na sese angangu gbagba ti Gat, ti Yabne na ti Asdod. Na pekoni, lo sara agbata na sese ti Asdod nga na sese ti azo ti Filistii.

⁷Nzapa amu maboko na lo ti tiri bira na azo ti Filistii, a-arabu so ayeke lango na Gur-Baal nga na azo ti mara ti Meun.

⁸Azo ti mara ti Amon ayeke futa lapo na Ozias. Sango ti Ozias ague ngbii asi na ayanga ti kodro ti Ezipte, ngbanga ti so lo ga ngangu gbia mingi.

⁹Lo sara akota da so ayo na nduzu na Jérusalem, na yanga ti gbagba so iri ni Ti-Ndangoro, na yanga ni so iri ni Ti-popo-hoto nga na ndo so gbagba ni asi daa si angoro ti gue.

¹⁰Lo sara nga ada so ayo na nduzu na benyama si lo zi adu ti ngu mingi, ngbanga ti so lo yeke na anyama mingi na *Kodro-ti-gbeni nga na kpangbara sese. Lo yeke nga na azo ti fango yaka na azo ti fango yaka ti *vinye so ayeke na ndö ti ahoto nga na ndö ti hoto ti Karmel. Biani, Ozias aye kua ti yaka mingi.

¹¹Ozias ayeke na aturugu so alingbi ti sara bira. A kangbi ala na ya ti abongbi, alingbi na wungo ti aturugu ni. Wakuasu Yeiel na kota zo ti kua Maaseya adiko wungo ti azo ni, na gbe ti komandema ti Hanania, mbeni makonzi ti aturugu ti gbia.

¹²Wungo ti amakonzi ti kete mara so kue ayeke na li ti angangu turugu ayeke 2 600.

¹³Aturugu 307 500 ayeke na gbe ti komandema ti ala; ayeke angangu turugu so alingbi ti tiri bira ti bata gbia na dawa ti awato ti lo.

¹⁴Lakue so ala yeke gue na bira, Ozias ayeke mu na ala *avala, alikongo, akpoto ti bira, akazaka ti wen, akokora na atêne so a yeke zia na ya ti *mvingi.

¹⁵Na Jérusalem, Ozias aleke ambeni masini so mbeni kota wakode-kua asigigi na ni titene a zia ni na ndö ti ada so ayo na nduzu nga na ndö ti andangoro ti gbagba. Kua ti amasini ni ayeke ti bi ale ti kokora na akota têne na ndo kue. Nzapa asara ye ti kpene mingi ti mu maboko na Ozias; ndani laa lo ga ngangu mingi si sango ti lo asi na ndo kue.

¹⁶Ndali ti so lo ga ngangu awe, lo ga zo ti baba; baba ni ague na lo ngbii abuba lo. Lo ga zo ti ke KOTA GBIA, Nzapa ti lo si mbeni lâ, lo li na ya ti kota da ti KOTA GBIA ti zö dukani na ndö ti gbalaka.

¹⁷Kota wayango-sandaga Azaria, lo na ambeni wayango-sandaga ti KOTA GBIA balemiombe so ala yeke azo ti mbeto pepe, ali na peko ti lo.

¹⁸Ala luti na dawa ti gbia Ozias si ala tene na lo: “Gbia Ozias, kua ti zongo dukani na KOTA GBIA ayeke kua ti mo pepe; me kua ni ayeke ti awayango-sandaga so ala yeke *ahale ti Aaron, ala so a zia ala nde ndali ni. Mo sigigi na ya ti da so ayeke nde si ayeke nzoni kue so! Biani, mo sara ye so ayeke sioni mingi. Ye so mo sara so, mo yeke wara gonda ndali ni pepe na dawa ti KOTA GBIA Nzapa.”

¹⁹Ngonzo agbu Ozias na tere ti awayango-sandaga, andaa lo gbu kete ta ti zongo na dukani ni na maboko ti lo. Biaku tongaso, buruma asigigi na ndö ti le ti lo, na dawa ti awayango-sandaga, taa gi na ya ti kota da ti KOTA GBIA, nduru na tere ti gbalaka so a yeke zö dukani na ndö ni.

²⁰Kota wayango-sandaga Azaria na tanga ti awayango-sandaga kue abaa ndo na mbage ti lo, ala baa so buruma asigigi na ndö ti le ti lo. Ala tumba lo hio na ya ti da ni. Lo wani, lo sara hio ti sigigi, ngbanga ti so KOTA GBIA apika lo awe.

²¹Gbia Ozias angba na buruma ni ngbii lo kui na ni. Ndali ti kobela ti buruma ni, lo lango gi lo oko na ya ti mbeni da nde, lo lingbi ti kiri na ya ti kota da ti *KOTA GBIA pepe. Molenge ti lo Yotam, makonzi ti aye ti yangbo ti gbia laa asara komandema na ndö ti kodro-gbia ni.

²²Tanga ti atënë na ndö ti Ozias, na tongo nda ngbii asi na ndani, wayanga-Nzapa Ésaïe, molenge ti Amoz laa asu ni na mbeti.

²³Ozias akui, lo hon na peko ti ababâ ti lo, a lu lo na tere ti ababâ ti lo na ndo so a yeke lu akuâ ti agbia daa, me na sende ti agbia pepe, ngbanga ti so lo yeke zo ti buruma. Molenge ti lo Yotam laa aga gbia na peko ti lo.