Read sango 2 Mbai 29 Bible Online

2 Mbai 29 - sango bible

2 Mbai 29

¹Ezekias ayeke na ngu baleuse na oku si lo ga gbia; lo le-gbia ngu baleuse na gumbaya na Jérusalem. Iri ti mama ti lo ayeke Abi, molenge ti Zakarii.

²Ezekias asara ye so ayeke mbirimbiri na le ti *KOTA GBIA gi tongana ti David, kotara ti lo.

³Na ya ti kozo ngu ti lengo-gbia ti lo, na kozo nze ni, lo zi ayanga ti kota da ti KOTA GBIA si lo kiri lo leke ayanga ti da ni.

⁴Lo iri awayango-sandaga na azo ti mara ti Lévi ti ga si lo bongbi ala na kota le ti gbata ni so ayeke na mbage ti To.

⁵Lo tene na ala, lo tene: “Ala azo ti mara ti Lévi, ala ma mbi si! Fadeso, ala zia tere ti ala nde ndali ti Nzapa, ala zia nga kota da ti KOTA GBIA, Nzapa ti akotara ti ala nde ndali ti Nzapa. Aye so kue ayeke *sioni na ya ti da so ayeke nde si ayeke nzoni kue so, ala zi ni.

⁶Biani, ababâ ti e asara ando ye alingbi na tënë ti KOTA GBIA, Nzapa ti e pepe. Ala do lo azia, ala bi le ti ala yongoro na kota da so KOTA GBIA ayeke duti daa si ala zia peko ti ala na lo.

⁷Ataa ayanga ti kubu so azo ayeke hon daa ti li na ya ti kota da ni, ala kanga ni, ala mingo alamba, ala zia ti zö dukani, ti mu *sandaga so a yeke gbi ni kue na wâ ndali ti Nzapa ti Israel, na ndo so ayeke nde si ayeke nzoni kue.

⁸Aye so asara si kota ngonzo alondo na be ti KOTA GBIA na tere ti azo ti Juda na ti Jérusalem. Ndali ti aye ni, lo sara mbeni ye ti ziango mbeto na be ti zo, ye ti mawa nga na ye ti kamene so ala wani ayeke baa na le ti ala so.

⁹Ndani laa a fâ ababâ ti e na ya ti bira si a gbu amolenge ti e ti koli na ti wali nga na awali ti e ti ga azo ti kanga.

¹⁰Fadeso, mbi ye ti sara *mbuki na KOTA GBIA, Nzapa ti Israel, tongaso si sioni ngonzo ti lo ade na tere ti e.

¹¹Amolenge ti mbi, fadeso ala kiri asara mbana pepe, ngbanga ti so ala laa KOTA GBIA asoro ala titene ala luti na dawa ti lo ti sara kua na lo, ti ga azo ti kua ti lo nga ti zö dukani na lo.”

¹²Tongaso, azo ti mara ti Lévi aga aluti. Ti kete mara ti Kehat ayeke azo tongana: Mahat, molenge ti Amasai, Yoel, molenge ti Azaria; ti kete mara ti Merari: Kish, molenge ti Abdi, Azaria, molenge ti Yehalelel; ti kete mara ti Gershon: Yoa, molenge ti Zima, Eden, molenge ti Yoa;

¹³ti kete mara ti Elisafan: Shimri na Yeiel; ti kete mara ti Asaf: Zakarii na Matania;

¹⁴ti kete mara ti Heman: Yehiel na Shimei; ti kete mara ti Yedutun: Shemaya na Uziel.

¹⁵Ala bongbi a-ita ti ala, ala *sukula sioni ti ala. Na pekoni, gbia amu yanga na ala alingbi na tënë ti KOTA GBIA si ala ga na ya ti kota da ti KOTA GBIA ti zi *asioni ti da ni.

¹⁶Awayango-sandaga ali na ya ti kota da ti KOTA GBIA ti zi *asioni ti da ni. Aye ti *sioni so kue ala wara na ya ti kota da ti KOTA GBIA ni, ala sigigi na ni, azia na ya ti gbagba si azo ti mara ti Lévi amu ni, ague, atuku na popo-hoto ti Sedron.

¹⁷Ala to nda ti zi *asioni ni na kozo lango ti kozo nze ni. Na lango miombe ni, ala si na ya ti kubu so ayeke hon daa ti li na ya ti kota da ti KOTA GBIA. *Sioni so ayeke na ya ti kota da ni, ala zi ni na ya ti lango miombe ni. Ala hunzi kua ni kue na lango baleoko na omene ti kozo nze ni.

¹⁸Na pekoni, azo ti mara ti Lévi ague na ndo ti gbia Ezekias si ala tene na lo: “E zi *sioni na tere ti kota da ti KOTA GBIA kue awe. Gbalaka so a yeke mu na ndö ni asandaga so a yeke gbi ni kue na wâ nga na aye ti tere ni, e zi *sioni na tere ni awe. Meza so a yeke zia mapa na ndö ni na dawa ti KOTA GBIA nga na aye ti tere ni, e zi nga *sioni na tere ni awe.

¹⁹Akungba so kue gbia Ahaz asara si aga *sioni na ngoi so lo yeke le-gbia si lo ke KOTA GBIA so, e kiri e leke ni si e zia nde ndali ti KOTA GBIA awe. Ni laa ayeke na dawa ti gbalaka ti KOTA GBIA so!”

²⁰Lango oko na pekoni, na kota ndaperere, gbia Ezekias abongbi amakonzi ti gbata ni si lo gue na ya ti kota da ti *KOTA GBIA.

²¹Kâ, azo ni ague na akoli-bagara mbarambara, akoli-taba mbarambara, akete taba mbarambara nga na akoli-ngasa mbarambara ti mu na *sandaga ndali ti zingo siokpari na li ti zo. A mu asandaga ni ndali ti azo ti da ti gbia, ndali ti ndo so ayeke nde si ayeke nzoni kue nga ndali ti azo ti Juda. Gbia amu yanga na awayango-sandaga so ayeke *ahale ti Aaron titene ala mu anyama so na sandaga na ndö ti gbalaka ti KOTA GBIA.

²²Awayango-sandaga afâ go ti akoli-bagara ni si ala fi mene ni na ndö ti gbalaka. Ala fâ go ti akoli-taba ni si ala fi mene ni na ndö ti gbalaka ni. Ala fâ nga go ti akete taba ni si ala fi mene ni na ndö ti gbalaka ni.

²³Na pekoni, ala ga na akoli-ngasa so a yeke mu na sandaga ti zingo siokpari na li ti zo na dawa ti gbia nga na dawa ti bongbi ti azo ni. Gbia na azo ni azia maboko ti ala na ndö ti akoli-ngasa ni.

²⁴Awayango-sandaga afâ go ti akoli-ngasa ni, ala tuku mene ni na ndö ti gbalaka ni ti zi siokpari na li ti azo ti Israel kue. Gbia wani laa amu yanga titene a mu amara ti sandaga use so ndali ti zingo siokpari na li ti azo ti Israel kue.

²⁵Gbia azia azo ti mara ti Lévi na ya ti kota da ti KOTA GBIA; awen so ayeke toto, akota kundi, na akundi ayeke na maboko ti ala. Lo sara ye ni alingbi na yanga so David, Gad, zo ti bango nda ti aye ti gbia, nga na Natan, wayanga-Nzapa amu. Andaa KOTA GBIA wani laa amu yanga so na lege ti awayanga ti lo.

²⁶Azo ti mara ti Lévi aluti na aye ti mozoko na maboko ti ala, aye ti mozoko so David aleke. Awayango-sandaga ayeke na atatalita na maboko ti ala.

²⁷Ezekias amu yanga titene a mu sandaga so a yeke gbi ni kue na wâ na ndö ti gbalaka. Na ndembe so a to nda ti mungo sandaga ni, gi na ndembe ni laa azo ato nda ti he bia ndali ti KOTA GBIA; ala yeke huru tatalita, ala yeke pika aye ti mozoko so David, gbia ti Israel aleke.

²⁸Bongbi ti azo kue angba ti kuku na sese na ndembe so azo angba ti he bia, ala yeke huru tatalita ngbii mungo sandaga ni ahunzi.

²⁹So ala mu sandaga ni kue awe, gbia na azo so ayeke na tere ti lo akuku, akpo li ti ala na sese.

³⁰Na pekoni, gbia Ezekias na amakonzi atene na azo ti mara ti Lévi ti he bia ti sepela KOTA GBIA na lege ti abia so David na Asaf, zo ti bango nda ti aye aleke ando so. Azo ti mara ti Lévi asepela KOTA GBIA na ngia, na pekoni ala kuku, akpo li ti ala na sese.

³¹Ezekias akiri amu tënë si lo tene: “Fadeso, ndali ti so maboko ti ala asi singo na asandaga, ala ga na asandaga ti ala ti beoko na asandaga ti mungo singila na KOTA GBIA na ya ti kota da ti lo.” Tongaso bongbi ti azo ni aga na asandaga ti beoko na asandaga ti mungo singila na KOTA GBIA. Azo so ayeke na nzoni be mingi aga nga na asandaga so a yeke gbi ni kue na wâ.

³²Wungo ti anyama so kue azo ni aga na ni ndali ti sandaga so a yeke gbi ni kue na wâ ayeke akoli-bagara balembarambara, akoli-taba ngbangbo oko, akete taba ngbangbo use; anyama ni kue, ala mu na sandaga so a yeke gbi ni kue na wâ na KOTA GBIA.

³³Ala kiri amu akoli-bagara ngbangbo omene, ataba na angasa saki ota ndali ti ambeni sandaga.

³⁴Me wungo ti awayango-sandaga ni ayeke kete mingi ti zi poro ti anyama so kue a yeke mu na sandaga so a yeke gbi ni kue na wâ; nilaa a-ita ti ala, azo ti mara ti Lévi, amu maboko na ala ngbii kua ni ahunzi, ti ku titene ambeni wayango-sandaga *asukula sioni na tere ti ala si. Biani, azo ti mara ti Lévi aleke be ti ala ti sukula sioni ti ala ahon awayango-sandaga.

³⁵Na tere ti gba ti asandaga so ayeke gbi ni kue na wâ, alingbi fade ala gbi mafuta ti anyama so a yeke mu na sandaga ti beoko, alingbi fade ala tuku nga samba ndali ti sandaga so a yeke gbi ni kue na wâ. Lege so ala kiri aleke lege ti vorongo KOTA GBIA na ya ti kota da ti lo laa.

³⁶Tere ti Ezekias na azo ti kodro kue anzere ndali ti ye so Nzapa asara ndali ti ala, ngbanga ti so a sara ye ni kue hio mingi.