Read sango 2 Mbai 30 Bible Online

2 Mbai 30 - sango bible

2 Mbai 30

¹Ezekias atokua azo na azo ti Israel kue nga na azo ti Juda. Lo tokua nga mbeti na azo ti Efraim na ala ti Manase titene ala ga na da ti *KOTA GBIA so ayeke na Jérusalem ti sara *matanga ti Pake ndali ti KOTA GBIA, Nzapa ti Israel.

²Andaa gbia, na amakonzi ti lo nga na bongbi ti azo ni kue ama fade tere na Jérusalem titene ala sara matanga ni na ya ti use nze ni;

³ala sara matanga ni na ngoi ni pepe ngbanga ti so, awayango-sandaga so *asukula sioni na tere ti ala, wungo ti ala ayeke mingi pepe si azo abongbi nga na Jérusalem pepe.

⁴Tënë so anzere na be ti gbia nga na be ti bongbi ti azo ni kue.

⁵Tongaso ala yeda ti tokua azo ti to mbela na ya ti kodro ti Israel kue, ti londo na Bersheba ngbii asi na Dan ti iri azo ti ga na Jérusalem ti sara matanga ti Pake ndali ti KOTA GBIA, Nzapa ti Israel. Biani, kozo titene azo asara matanga na ngu ni so, gi azo kete laa asara matanga ni alingbi na andia ni so a su na mbeti.

⁶Awatokua amu ambeti so gbia na amakonzi ti lo asu so si ala gue na ni na sese ti Israel kue nga na ti Juda. Na lege ti yanga so gbia amu, ala tene: “Ala azo ti Israel, ala so akpe na maboko ti azo ti Asirii so, ala kiri na mbage ti KOTA GBIA, Nzapa ti Abraham, ti Isaac na ti Jacob si fade lo kiri na mbage ti ala.

⁷Ala sara ye tongana ti ababâ ti ala na ti a-ita ti ala pepe so asara sioni ye mingi ti ke KOTA GBIA, Nzapa ti akotara ti ala. Nzapa asara si ababâ na a-ita ti ala ni aga ye so a buba ni kue; ye ni laa ala yeke baa so.

⁸Fadeso, ala sara ngangu li tongana ti ababâ ti ala pepe; ala mu tere ti ala na KOTA GBIA, ala kiri aga na ndo ti lo so lo zia nde ndali ti lo wani kpu na kpu; ala sara kua na KOTA GBIA, Nzapa ti ala, tongaso si sioni ngonzo ti lo akai na tere ti ala.

⁹Tongana ala kiri na mbage ti KOTA GBIA, azo so agbu a-ita ti ala na amolenge ti ala si ague na ala na kodro wande, fade azo ni ayeke baa mawa ti a-ita ti ala na amolenge ti ala ni, ala yeke zia lege na ala ti kiri na ya ti kodro so. Biani, KOTA GBIA, Nzapa ti ala ayeke sara nzoni be si lo yeke baa mawa ti zo. Tongana ala kiri na mbage ti lo, lo yeke bi le ti lo yamba na ala pepe.”

¹⁰Awatokua ni atambula na ya ti agbata oko na oko ti sese ti Efraim na ti Manase, ngbii ala si na sese ti Zabulon. Me azo ayeke he ala na ngia si ayeke dekongo na li ti ala.

¹¹Me ambeni zo ti mara ti Aser, ti Manase na ti Zabulon asara tere ti ala kete si ala ga na Jérusalem.

¹²Na sese ti Juda nga, Nzapa asara si be ti azo ni aga oko, ala yeda ti ma yanga so gbia na amakonzi ti lo amu, alingbi na tënë ti KOTA GBIA.

¹³Gba ti azo abongbi na Jérusalem na ya ti use nze ni ti sara matanga ti Mapa so a sara na mama ni pepe. Azo so abongbi so ayeke gbani gbani ahon ndoni.

¹⁴Ala to nda ti zi agbalaka so a yeke mu *asandaga na ndö ni na Jérusalem; ala zi nga agbalaka so a yeke zö dukani na ndö ni, ala tuku ni na popo-hoto ti Sedron.

¹⁵Na lango baleoko na osio ti use nze ni, ala fâ anyama ndali ti *matanga ti Pake. Kamene agbu awayango-sandaga na azo ti mara ti Lévi si ala *sukula sioni ti ala. Na pekoni, ala ya asandaga na ya ti kota da ti *KOTA GBIA.

¹⁶Ala mu ndo ti kua ti ala alingbi na ndia ti Moïse, zo ti Nzapa. Azo ti mara ti Lévi amu mene ti anyama ni na awayango-sandaga si ala yeke fi na ndö ti gbalaka.

¹⁷Na ya ti bongbi ti azo ni, azo mingi ade ti *sukula sioni ti ala pepe. Tongaso ala lingbi pepe ti zia ambeni sandaga nde ndali ti KOTA GBIA. Nilaa azo ti mara ti Lévi afâ anyama ni ndali ti matanga ti Pake na plase ti azo so ayeke *nzoni pepe so.

¹⁸Gba ti azo, mbirimbiri azo ti mara ti Efraim, ti Manase, ti Isakar na ti Zabulon asukula sioni ti ala pepe. Ataa so kue, ala te anyama ti matanga ti Pake ni; ye so ala sara so alingbi pepe na tënë so a su na ya ti Mbeti ti Nzapa. Ndani laa Ezekias asambela Nzapa ndali ti ala, lo tene: “KOTA GBIA, mo so mo yeke nzoni, zi tënë na li ti

¹⁹azo so kue azia be ti ala ti gi mo Nzapa, KOTA GBIA, Nzapa ti akotara ti ala, ataa so ala sukula sioni ti ala pepe ti zia aye nde ndali ti mo.”

²⁰KOTA GBIA ama sambela ti Ezekias si lo zia ti sara sioni na azo ni.

²¹Tongaso, na ngia mingi, azo ti Israel so ayeke na Jérusalem asara matanga ti Mapa so a sara na mama ni pepe; ala sara ni na ya ti lango mbarambara. Na ya ti lango oko oko, azo ti mara ti Lévi na awayango-sandaga ayeke he bia ti sepela KOTA GBIA, ala yeke pika aye ti mozoko so ayeke toto ngangu ndali ti KOTA GBIA.

²²Ezekias atene tënë ti mu ngangu na be ti azo ti mara ti Lévi so kue kua ti KOTA GBIA agbu be ti ala. Na ya ti lango mbarambara kue, ala te kobe ti matanga ni, ala mu asandaga ti beoko si ala he bia ti sepela KOTA GBIA, Nzapa ti akotara ti ala.

²³Na pekoni, bongbi ti azo ni kue ama tere titene ala kiri asara matanga ni na ya ti lango mbarambara. Nilaa ala kiri asara matanga ni na ngia na ya ti lango mbarambara.

²⁴Andaa Ezekias, gbia ti Juda amu akoli-bagara saki oko na ataba saki mbarambara ndali ti bongbi ti azo ni. Amakonzi amu akoli-bagara saki oko na ataba saki baleoko ndali ti azo ni. Awayango-sandaga mingi asukula sioni ti ala.

²⁵Bongbi ti azo ti Juda kue, awayango-sandaga, azo ti mara ti Lévi, azo so kue alondo na Israel si aga, ala so aga ndali ti matanga ni wala ala so ayeke lango na sese ti Juda, ala kue ayeke na ngia.

²⁶Ngia ti azo ti Jérusalem ahon ndoni, ngbanga ti so ngbene ye na ngoi ti Salomon, molenge ti David, gbia ti Israel, ade ti sara mbeni matanga tongaso na Jérusalem pepe.

²⁷Na pekoni, awayango-sandaga so ayeke azo ti mara ti Lévi alondo si ala sara tufa na ndö ti azo ni. Sambela ti ala asi na yayu, ndo so ayeke nde si ayeke nzoni kue ti Nzapa si Nzapa ayeda na sambela ni.